Duit Suap Bejuta Dollar Dikena Ngeluluka ‘Pemeri’ - Sekeda Ensera UMNO Ti Seruran Berubah-Ubah!

• 29 Oct 2012
• BM 翻译

Dini endur Michael Chia kena 14 haribulan Lapan taun 2008 suba?
UMNO udah ngeluarka penerang ti bebida-bida nyerumba ketegal ti endur sida nguji ngayanka bukti dikena nyukung penerang sida nya.
Cherita nya belabuh enggau maya Michael Chia, siku kepala kompeni kayu batang, ti ditangkap lebuh iya nguji mai RM40 juta dalam beg iya, di rantu jalai iya pulai ke Sabah ari Hong Kong.
Cherita tangkap Michael Chia udah nyadi pugu berita ba sebelah portal media, lalu dikena UMNO/BN nimbal cherita nya, mayuh bendar jaku sangkal. Michael Chia udah bebulaka penerang ti madahka iya kala ditangkap tauka bebula penerang pasal duit nyampau nya bisi kaul enggau iya empu, lalu Musa Aman mega bebulaka penerang ti madahka iya bisi kaul enggau Michael Chia.
Tang diatu, enda mukai-mukai, sepengudah empat taun, YB Nazri ari parti UMNO-BN udah madahka semua duit nya udah dianjung Michael Chia ngagai Musa Aman. Tang duit nya ukai ke guna Musa Aman kediri, tang nyadika ‘pemeri politik’ ngagai parti UMNO Sabah.
Nama kebuah dulu ari tu Musa Aman, Nazri enggau UMNO/BN enda mansutka penerang munyi nya?
Nyadika jaku talat iya, dalam bulan Empat tu tadi, Musa Aman bisi nyebut:

“Aku nadai kaul enggau sapa-sapa orang ti benama Michael Chia” [Penerang ari Musa Aman empu kena 12/04/2012]
Nama kebuah Musa Aman enda nyebut tu:
“Amat nya. Aku endang ngelala Michael Chia. Iya selalu bulih lisin ngulihka kayu batang ari opis Yayasan Sabah, ti betuaika aku empu. Michael Chia mega terang bendar udah ngirumka duit RM40 juta ngagai aku nyadika pemeri ke parti politik, ti mega betuaika aku dalam taun 2008 suba. Kami beterima kasih ke pemeri ari iya nya. Enti kita deka nemu enggau silik, kita tau meresa bup rekod pekara belanja parti kami tu.” [Musa Aman endang ENDA KALA nyebut jaku ti munyi tu]
Kami minta bala pemacha beratika semua peluang ti tau dikena Musa Aman/UMNO nerangka gaya utai ti udah nyadi maya nya. Ba pun cherita nya, repot pasal Michael Chia ditangkap dalam pejalai iya dalam taun 2008.
Nya mih maya ti betul bendar ti tau dikena Musa Aman enggau bakih iya Michael Chia madahka seduai iya napi penanggul lalu penanggul nya ukai pengawa ngelalaika duit baka ti diperatika raban penagang penyalah makai suap (ICAC) Hong Kong dalam pengelama tiga taun. Tang jaku tanya diatu pansut ari ‘pemeri’ RM40 juta Michael Chia ti deka disimpan dalam akaun bank parti UMNO, semina penyampau duit nya kelalu mayuh ari patut, jauh mayuh agi ari ti dikereja orang bukai.
Tang diatu sida iya bela nguji bebula ke Michael Chia nya bisi kaul enggau duit nyampau nya, tauka bisi kaul politik enggau Musa Aman!
Tang empat taun udah nya, UMNO diatu ngaku enggau terang-terang madahka Michael Chia nya ti nyadika orang ti meri duit RM40 juta/S$16 juta ngagai parti UMNO Sabah, ti betuaika Musa Aman. Endang amat bisi kaul politik nyadi dia.
Ingat kita, nyentuk ngagai minggu nyin kemari Musa Aman mengkang bebula ke penerang ti madahka iya bisi “kaul enggau sapa-sapa” ti benama Michael Chia.
Nya alai, nama kebuah sida seruran ngubah-ngubah cherita asal sida nya? Agi mega, versyen ke terubah cherita sida pansut udah beberapa taun udah nya. Lawyer Bansa, Abdul Gani Patail (ti siku ari sida Musa Aman sebilik) ditemu udah enggai meri bantu pengawa entara-menua enggau opis ICAC di Hong Kong, lalu ba taun 2011 sepengudah timpuh belepa pansik nya abis, raban ICAC Hong Kong lalu ngugurka kes nya (tang semina YB Nazri aja ari parti UMNO/BN ti udah ngumbai raban pemansik ICAC Hong Kong udah meresi nama Michael Chia, taja pan sida ICAC bedau mansutka sebarang komen tauka penerang).
Tang diatu mayuh bendar penerang, nyengkaum salin-salin penyata kira-kira bank ti dipegai Michael Chia bisi ba Sarawak Report. Kami udah meri semua salin penerang nya ngagai opis-opis perintah di menua Switzerland, ti diatu udah belabuh muka pansik atas bank UBS sida, ti benung ngemataka akaun-akaun bank Hong Kong ke Michael Chia.
Kami mega kala nuliska mayuh repot ti madahka Michael Chia nya bisi nerima mayuh bendar duit ari kompeni-kompeni kayu batang ti nyadika “duit simpan ke lisin kayu batang” lalu mega nunjukka Michael Chia nya bisi nyimpan duit masuk ngagai akaun bala anak Musa Aman sekumbang sida ke belajar di menua Australia maya nya.
Ulih tauka enda parti UMNO nerangka sekali ke duit ti dikirumka ngagai bala anak Musa Aman nya nyadika “pemeri politik” mega?
Ba pun cherita tu kemari, Musa Aman udah bebendar amat madahka semua surat nya udah dibali magang lalu surat nya mega dikena ngumbai iya bisi kaul enggau Michael Chia. Tang dalam dua iti kes court lalu pia mega jaku penerang ari opis perintah di Switzerland ti madahka pansik sida nya bisi ngaitka Musa Aman diatu nyau enda ulih seliahka iya agi.
Semua kes nya udah nganchurka jaku pengaku ari Michael Chia ti dikena iya madahka diri nadai kaul enggau UMNO tauka politik tauka bekereja ke Musa Aman.
Nya alai, Michael Chia udah tau ditekanka bisi meri duit ti mayuh ngagai Musa Aman lalu iya mega nyadika orang tengah ke Musa Aman bekaul enggau pengawa ngeluarka lisin kayu batang, ti endur cherita kelulu pasal Musa Aman ti nadai kaul enggau Michael Chia deka datai ba pengujung iya.
Tang diatu, ba versyen cherita ari parti UMNO bisi didinga ti endur sida ngaku duit RM40 juta nya endang amat datai ari Michael Chia lalu duit nya diterima Musa Aman. Tang UMNO mega bisi mansutka siti agi talat sida ti madahka duit RM40 juta nya pemeri “ti beresi ari dosa” ngagai parti UMNO.
Tang, baka ni duit nya tau dikumbai “pemeri ti beresi ari dosa” enti Michael Chia nya endang nyadi ke penerima lisin kayu batang ari Musa Aman ngari ke opis Yayasan Sabah?
Agi mega apai Michael Chia nya siku penerima dagang nengali ngangkut kayu batang nengah sungai dalam pengelama beberapa taun tu!
Kitai deka nemu sekali ke duit asil makai suap nya tau dikumbai beresi ari dosa enti duit nya nyadika pemeri politik? Enti saut iya ya, baka ni gaya duit ti dikirumka Michael Chia nya ngagai bala anak Musa Aman di menua Australia suba – beresi ari dosa mega?
Diatu nyau datai ba gintir Musa Aman ngasuh ati bala soldadu cyber UMNO/BN kesal sereta teguran laban deka nutup mata, pending enggau ngenyarutka runding bala pemacha blog tu, lalu enggai napi pemendar enggau pengamat.