Kami Agi Mengkang Ditu - Badu Agi Bula Madahka Penanggul Kami Udah Diputarka!

Bala menteri dalam BN ti betuaika Taib Mahmud udah berasai malu bendar ngutuk sekeda bala orang ti mansutka jaku petenah ti madahka penanggul ti nuntung raban bansa Penan enggau tekat Murum nya udah diputarka.
Bala menteri BN nya ti diuluka Awang Tengah udah ngumbai raban bansa Penan diatu berasai lantang ati enggau langkar pengawa pengentap pendiau ti baru nya ti udah diperambu enggau resia Perintah Sarawak ke pemanah pendiau sida dudi hari ila. Tang sapa ti deka diburu ari menua diri empu lalu dientapka ba menua ti enda gemu lalu berimbai enggau kebun dandang besai, lalu nambah ke nya dibayar pampas RM850 ti udah nya diturunka ngagai RM500 ke pintu ruang bilik ke sebulan dalam pengelama empat taun?
Nitih ke langkar pengawa nya ti udah tiris ngagai kami, bayar pampas nya deka diketuka udah empat taun. Engka Taib Mahmud udah nyain waran pemati ke raban bansa Penan.
Bala Penan agi mengkang mantah langkar pengentap pendiau ti diperambu nya, ti lalu ngujungka sida nirika empang jalai lalu sehari tu, hari ti ke-22, sida mengkang ngempang jalai masuk ngagai palan ngaga tekat Murum, taja pan bala menteri BN suah didinga durah-durah bejaku madahka bala Penan nya udah ngerumpang lalu ninggalka empang sida nya.

Pelilih menua Murum nya nyangka kelalu jauh di ulu sungai tauka di puak kampung puang, tang kemaya hari tu Taib Mahmud enggau perintah BN iya enda patut nguji lari ari pemendar. Pengawa nya ukai semina salah, tang sida mega tau dikamatka besalah. Bala pengarang berita enggau tukang gambar diatu benung datai ngelawa endur bala Penan nirika empang jalai nya laban deka ngambi gambar pasal pengawa ngempang jalai nya, lalu bala pemacha enda patut arapka jaku bula Taib Mahmud enggau bala menteri iya.
Beserimbai enggau nya, semua surat berita ti nyadika dilah Taib Mahmud udah nguji nerangka sapa orang ti untung ari projek tekat ai Murum nya ila. Ba pun minggu tu tadi Taib enggau bala menteri ti dikerinduka iya bisi nemuai ke menua Arab laban deka ngulih sukung orang ti dipinta sida beranakka puku enggau chara mentas ngadaka upah ti manah-manah. Tang baka ni enti sida mentas mega enggau bala orang asal ti lenyau tanah sida empu?
Lebuh sida ditanya bala pengarang berita pasal peminta bansa Penan di Murum ba minggu tu tadi dia sida, ti betuaika menteri Awang Tengah, madahka diri berasai tekenyit ninga peminta bansa Penan ti ngemesai nya.
Nama kebuah enda ulih diturutka sida? Pengawa dagang nengah projek tekat ai Murum nya udah dipromosika nyadika penguntung ke bala rayat. Tang orang ti deka untung agi ba Murum nya Taib Mahmud enggau sida sebilik, ti udah nerima kontrak bejuta-juta ringgit laban sida udah meri kabel-kabel elektrik, ngaga jalai alun enggau meri bekal simen.
Awang Tengah udah mutuska runding diri empu ngutuk tindak raban bansa Penan ti endang udah dituntung penyuntuk nya. Enggau pengawa iya ti nyadi Menteri Perambu, iya udah enda ibuh ke pengawa orang bukai ti ngambi tanah ari bansa Penan ti patut dikena bansa nya belajarka pengawa betanam-betupi dikena sida ngidupka diri! Tambah mega iya empu benung ngulihka penguntung bejuta-juta ringgit ari tekat nya, lalu nyerumba nya mega iya diatu ditemu bisi sebuah rumah ti besai bendar di menua Perth di Australia.
Nama kebuah bansa Penan ditagang minta sebagi ari penguntung ari pengawa dagang perintah ngena tekat ai Murum nya? Komuniti bukai ti udah dituntung penanggul ari projek-projek tekai ai di endur bukai udah dibayar pampas ketegal sida udah ngawakka projek ti bansa nya digaga ba endur sida. Nama kebuah bansa Penan dianu sereta dikutuk ketegal peminta nya?
Ke bendar, bansa Penan di Murum diatu enggai nejuka Taib ngalahka sida tauka enda takutka Taib agi, laban Taib udah ngasuh sida putus pengarap lalu nganchurka pengarap sida.
Sekumbang pengawa ngambi gambar ba semak empang jalai ti didirika bala Penan nya, bisi dipeda ba endur nya mega mayuh lori enggi kompeni Shin Yang, kroni Taib Mahmud ti mansa bala Penan lalu bisi mega sida deka becherita utai ti benung nyadi dia.
Kami meri besai terima kasih ke semua orang ti mantu pengawa ngempang jalai di Murum tu. Naka ke diatu semua duit tulung nya udah dikena kami meli pemakai enggau perengka ti diguna bukai dikena mantu bansa Penan ti mantah perintah ti madahka sida enda surut ari endur nya, nyentuk ke peminta sida dikamatka perintah belalauka undang-undang entarabansa bekaul enggau pengelikun mensia.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments