“Nadai Elemen Makai Suap”? – Ambu BN Ti Enda Masuk Akal!

• 12 Oct 2012
• BM 翻译

Ditambahka enggau pemayuh penerang enggau tuduh kriminal dalam court menua Switzerland, diatu perintah BN mupuk-mupuk ngaku diri bisi kaul dalam pengawa salah ngubah pemindah duit baka ti dikereja Michael Chia ti dikaitka enggau Musa Aman, Kepala Menteri menua Sabah.

Dulu ari tu Musa Aman kala madahka diri enda ngelala sereta nadai kaul dagang enggau siku orang ti benama Michael Chia. Lalu nitihka penerang Nazri Aziz, Menteri dalam Opis Menteri Besai, duit ti mayuh bendar dalam akaun Musa Aman di menua tasik nya duit pemeri ke parti UMNO Sabah lalu ukai ke guna Musa Aman kediri.

Nitihka penerang Nazri mega, nadai pansut sebarang elemen makai suap dalam kes tu.
MP Tian Chua ari PR kala betanyaka, enti duit nya ukai ke guna Musa Aman tang ke UMNO Sabah, tang raban pemansik penyalah makai suap SPRM lalu bedau ditemu madahka penyalah makai suap nadai nyadi. Nama tuju duit nya lalu nama kebuah bisi orang dagang meri duit ngagai UMNO Sabah?
Nyentuk ke sari tu nadai siku bala orang ari BN/UMNO deka meri penerang!
Isi pekara dalam penerang ari Nazri Aziz ke bendar iya nya Musa Aman endang kala nguji mai duit RM40 juta pansut ari Hong Kong lalu tama ngagai menua Sabah.

Tambah mega Musa Aman nya Pengerusi parti UMNO Sabah. Beduduk ari nya, iya nyadika penerima semua duit nya, lalu nya mega sebarang ko iya ngatur pejalai masuk duit nengah Michael Chia.
Diatu maya iya kitai patut ningaka jaku ambu ari Musa Aman empu madahka diri udah bula ngenggaika pasal kaul iya enggau Michael Chia, ti diatu benung didawa dalam Court Tinggi!
Nazri Aziz mega udah mansutka penerang ti madahka Musa Aman ngembuan tuju politik enggau duit ngemayuh nya, lalu pengawa nya ‘dikemendarka’ lalu pia mega nadai pansut penyalah makai suap!
Penerang ari Nazri Aziz nya nadai nyaut tanya kami nama kebuah Musa Aman ti nyadi Pengerusi UMNO Sabah meri arah ngagai orang siku mai RM40 juta duit tunai pansut ari menua Hong Kong?

Enti duit ngemayuh nya dikemendarka undang-undang menua ke guna politik, nama kebuah Pengerusi UMNO nya enda mindahka duit nya terus ngagai akaun bank ti direjista atas nama UMNO Sabah? Enggau chara nya, pengawa mindahka duit ti mayuh nya ulih diterangka ngena surat lalu dikemendarka undang-undang!
Nyentuk ke sari tu nadai siku orang di menua Malaysia berani besumpah ngena sebarang bup kudus ti ngumbai parti UMNO nya enda ngereja penyalah makai suap atas pengundi sida dalam pengawa bepilih besai. Kami bisi nyimpan mayuh penerang dalam laman blog tu pasal penyalah makai suap nyengkaum video ti ngayanka baka ni Menteri Besai Najib Razak enggau Kepala Menteri Sarawak Abdul Taib Mahmud ti bisi nyuap duit ngagai bala pengundi sida!

Enti Nazri Aziz ngaku duit nya enggi UMNO, nama kebuah iya nadai meri penerang pasal ari ni tauka ari sapa duit nya datai? Senutuk bendar mega duit RM40 juta nya datai ari akaun ti dikemataka Michael Chia enggau bala bakih iya, lalu pia mega Michael Chia bisi ditemu diasuh mindahka duit dikena melanja dua iku anak Musa Aman ti benung besekula di menua Australia maya nya!

Diatu BN/UMNO arap bendar ke bala Lawyer Bansa di menua Switzerland ngatur pechara nya udah tembu pengawa bepilihbesai Malaysia tu ila.