6 Oct 2012

NGEMUNASKA BANSA! – Resia “Langkar Pengawa Pengentap Pendiau Ti Baru” Murum Diayanka – REPOT LENAK

This post is also available in: English, Malay

Diatu kami ulih ngayanka sebengkah repot ti lenak pasal pengawa nirika empang jalai nuju palan ngaga tekat ai Murum, ti endur mayuh lori udah ditagang seraban bansa Penan.
Raban orang asal ti merinsa nya udah ngayanka bantah enggau ngempang jalai udah sida nemu pasal langkar pengentap pendiau enggau penyampau pampas ti digaga Perintah Sarawak datai ba maya kampung enggau genturung pendiau sida diampuhka ai tekat ila.
Langkar pengentap pendiau nya benung diresiaka perintah nyentuk ngaga iya tiris lalu diterima Sarawak Report ba pun minggu tu tadi.

Resia nya balat bendar belaban reti enggau sekeda protokol entarabansa, ti begunaka sanding penemu enggau atur ti silik ngagai bala orang ti kena tanggul sebedau pengawa belabuh dikereja.
Siti ari salin Langkar Pengentap Pendiau (RAP) ti bisi diterima kami nya ngayanka jaku tuduh penemu ti endang NADAI nyengala nyebut pasal pampas ti lurus ti deka diberi ngagai raban bansa Penan ti udah nguan endur nya kenyau ari berapa serak tubuh lalu pia mega ti udah lenyau menua endur sida ngidupka diri ngagai pengawa orang ti ngulihka kayu batang enggau muka kebun dandang besai sawit, lalu ke penudi, deka diampuhka ai ari tekat nya.

Ba atur RAP nya, raban bansa Penan deka dientapka pendiau ba sebengkah kandang menua ti jauh ba tisi kebun dandang besai, ti endur sida nadai endur betanam-betupi enggau ngasu-beburu agi baka ke selama.
Penyampau pampas ti diperambu nya nyau deka sebaka reti enggau elaun bulan ti jauh mimit ari penyampau ba ikas penyuntuk di menua Sarawak, lalu pekara tu amat ngemaluka!
Duit bantu ari perintah menua ti semina RM500 ke sepintu ruang bilik nya deka diketuka 4 taun udah nya!

Langkar Pengentap Pendiau 168 limpir surat nya, ti udah diperambuka Perintah Menua Sarawak enggau dibantu kompeni Chemsain Konsultan Sdn Bhd nya dikena nguji ngumbai surat nya deka diterima undang-undang lalu pia mega deka diterima entarabansa.
Repot nya ngundan mayuh jaku semaya, tang iya enda diayanka, nadai jaku lalau, nadai program pematih, nadai program pengawa sekula, nadai bantu ba perubat enggau pengerai, nadai bantu ba raban indai ti beranak, nadai ngangkatka gaya idup enggau nadai bayar pampas tauka pilih ba penatai pemisi ke bansa Penan.

Siti pengelemi ba langkar nya, ambi ke banding, sepintu ruang bilik bansa Penan deka diagihka semina 14 hektar tanah umai ba genturung pendiau ti baru enggau pengawa pematih dikena mantu sida ngubah chara ngidupka diri ari pengawa ngasu-beburu ngagai pengawa betanam-betupi lalu ngeluarka asil ke pemakai sida empu.
Langkar Pengentap Pendiau nya ngaku pengawa bejuraika penemu udah kala diatur.
Pengarang berita kami, ti udah nemuai ngagai genturung pendiau, udah ngelala bendar udah iya macha lalu beratika repot nya, bala orang penan mengkang enda nemu sekali ke sida deka dipampas tauka enda.

Udah ti meri elaun bantu, Kepala Menteri Sarawak (ti udah begela orang ti pemadu kaya di Malaysia bepelasarka pengawa ngerusak rampa menua orang bansa asal nya) udah ngaga pemutus runding deka ngetuka bantu ari perintah menua!
Penerang baka ti manah bendar didinga dalam langkar nya udah besemaya ngagai bansa Penan nyadika pampas sida udah sanggup nyerahka rampa menua enggau daya idup sida. Ke bendar, orang ti deka bulih penguntung dudi hari ila nya Taib Mahmud empu!

Pengarang berita kami nya udah ngumpul mayuh penerang ari raban bansa Penan pasal penanggul ti nuntung sida datai ari atur pengawa Taib Mahmud enggau pengerindu iya ba pengawa ngulihka kayu batang enggau muka kebun dandang besai.
Semua penanggul nya bisi dilansa dalam langkar ti dipelalaika nya, ti ngayanka gaya ti bendar pasal serebana ari raban bansa Penan. Perintah Sarawak udah besemaya mantu raban bansa orang asal nya nyadika sebengkah ari atur pengentap pendiau di Murum, tang dalam pengelama 5 taun ti dikena ngaga tekat Murum nya, bala orang bansa asal nya deka ditejuka idup dalam lapar-pungkang laban rampa kampung sida udah ditukar nyadi kebun dandang besai.

Nama kuasa Taib Mahmud ti ngumbai sebarang orang deka arapka iya deka mantu sida diatu tauka mantu sebarang orang bansa asal ti bukai di Sarawak ti endur sida dientapka pendiau ngagai endur ti baru ngambika dikena meri awak ngagai projek ngaga mayuh agi tekat ai?
Beserimbai enggau nya, Sarawak Report minta diterangka Perintah Tasmania ti bepengarika siku pemesai ari Opis Kuasa Elektrik Tasmania, Nick Wright, ti diatu diambi bekereja nyadi Sapit Presiden dalam Sarawak Energy Berhad (nyengkaum Program Pengentap Pendiau Murum nya).

Nama kebuah Hydro-Tasmania diatu bekaul enggau Sarawak Energy Bhd bejalaika projek ngaga tekat ai ke projek SCORE, ti udah melakangka standard ti patut bisi dalam pengawa ngulihka sanding penemu, terang lalu bisi tanggung pengawa ngagai rampa menua enggau sosial lebuh ti bedagang di menua Sarawak? Sarawak Report deka mantaika isi ti penuh ari Langkar Pengentap Pendiau Murum, nyengkaum penerang ti silik pasal SCORE ti diperambu runding gila Taib Mahmud.