Penyerakup Bala Orang Di Serata Dunya Diatu Meri Sukung Ke Bansa Penan Murum

Sekumbang raban bansa Penan di Murum nyau masuk ba minggu ke-empat sida ti nirika empang jalai nuju tapak projek ngaga Tekat Murum, mayuh raban NGO ari menua Malaysia empu enggau entarabansa diatu nyau betambah lalu meri sukung enggau bantu sida.
Ba hari Lima tu tadi, seraya ti dikelingi bala pengarang berita, ba luar indu-opis Hydro Tasmania di nengeri Hobart laban minta kompeni nya badu agi ngaga kaul enggau Sarawak Energy Berhad (SEB) di menua Sarawak, Hydro-Tasmania udah diayanka ketegal meri sukung ba pengelandik enggau nyali pengereja pengawa ngagai SEB, sebengkah ungkup pengawa ti kala dikumbai sida ungkup ti mimit aja.
Tang, ari ti udah diayanka kami diatu, SEB udah ngaku dalam repot taun sida madahka kaul Hydro-Tasmania enggau pengawa ti nyali pengereja pengawa sida ba penuduk-penuduk ti tinggi-tinggi nya “beguna” bendar dikena ngemujurka perambu rangka Taib Mahmud lalu mega perambu iya ti deka ngaga 12 buah agi tekat ai ba sebelah puak-puak rampa kampung di Borneo. Lalu pengawa nya deka ngujungka raban bansa asal di Borneo enda tau enda dipindahka ngagai palan pengentap pendiau ba endur bukai. Pengawa bala orang ti begempuru di nengeri Hobart nya diatur mayuh bengkah raban NGO, ti udah nulis surat ngagai Menteri Luar Australia Robert Carr, enggau mega ngagai Menteri Besai Tasmania Lara Giddings, minta ngambika kompeni Hydro-Tasmania ngetuka meri bantu sida dalam projek ngaga tekat ai ke Taib Mahmud. Raban NGO nya nyengkaum International Rivers, Bruno Manser Fund, Rainforest Action Network, JATAN enggau raban NGO ke bukai.
Isi surat sida nya madahka sida irau bendar ke kompeni Hydro-Tasmania ti dipeda ngambi bagi ti penuh dalam pengawa ngaga tekat ai ti terang bendar ngelanggar atur enggau undang-undang enggau mega ngelanggar atur pengelantang mensia di Australia ti endang nyadi kaban dalam gerempung UNDRIP.
Sida udah madahka perintah Sarawak udah ngena timpuh ti kelalu lama endur nerangka pasal langkar atur pengentap pendiau ke bansa Penan ari Murum nya.
Pengawa ngaga tekat ai nya udah belabuh 5 taun ke udah lalu diatu nyau ka manggai ba ikas ngenembuka iya.
Dalam penetap UNDRIP, semua langkar pengawa enda tau enda dipadahka lalu aum enggau raban bansa orang ti deka dituntung penanggul ari projek nya, sebedau projek nya belabuh dikereja.
Kami udah mega ngayanka sekeda salin ari langkar atur nya ti tiris ari opis perintah menua Sarawak ti bisi kaul enggau projek nya.

Gerempung NGO, Borneo Project, ti bepalan di menua Amerika mega udah nyain petisyen kami dalam pengawa ngelaban sereta mantah projek Tekat Murum nya.

Beserimba enggau nya, Palan Rampa Menua Lebak Huon di Tasmania ti udah mantah pengawa ngulihka kayu batang ari kampung sida dikena nyukung kilang kayu Ta Ann Tasmania (enggi Hamed Sepawi ti petunggal Taib Mahmud), udah nerangka ngagai media sida mega meri sukung ngagai raban bansa Penan di Murum, Sarawak. Cherita nya udah ditaburka di serata menua Australia nengah stesyen Channel 9; Daily Telegraph; The Australian; News.com. Beserimbai enggau nya mega, sukung ti diberi nya deka ngelantangka ati bala bansa Penan di Murum, ti kala udah ngasuh ati kesal nyadi dalam opis kompeni Hydro-Tasmania di menua Tasmania. Bala eksekutif kompeni nya ba pun iya udah bebulaka cherita pasal bansa Penan ti nirika empang jalai, diatu nyau ngenataika diri, madahka sida endang bisi ungkup pengawa. Bala orang ti begelumu ba mua opis Hydro-Tasmania udah ngenggaika nya semadi Hydro-Tasmania badu agi bekereja di menua Sarawak!
Datai ke diatu, kompeni enggi perintah Tasmania nya udah madahka kaul sida enggau perintah Taib Mahmud ti korup nya lalu mega enggau perambu gila iya ti deka ngerusak rampa menua di Borneo ti mega deka ngeruga pengidup orang bansa asal.
Bisi sekali bedau lama ke udah, kompeni Hydro-Tasmania udah ringatka program TV Dateline ti ngeluarka cherita bekaul enggau penanggul ti nuntung pengidup bala orang asal di Sarawak laban pengawa ngaga tekat ai, ti udah nya mega dikeluarka nengah TV Al Jazeera. Kepala Eksekutif sida, Roy Adair, udah tama ke dalam bilik studio radio lalu mansutka jaku gerah madahka kompeni SEB nya sebengkah kompeni ti tampak nama lalu patut ngaga kaul dagang enggau Hydro-Tasmania. Tang lebuh iya dipejalka enggau jaku tanya, iya udah puntan meri penerang baka ni kompeni iya udah bejalaika pansik ti silik, semina iya madahka sida udah bejalaika “pra-semakan” ti madahka SEB udah nyadi kaban dalam gerempung International Hydro-Power Association (IHA) (ti ukai dikereja ba maya nya).
Ba maya nya mega, Kepala Hydro-Tasmania, David Crean, udah berandau nengah telefon enggau Kepala kompeni TV SBS lalu minta program nya dipadamka lalu enggau lengkas iya meri kebuah Hydro-Tasmania ti bedagang di menua Sarawak nya ngena ungkup pengawa ti mimit aja.
Ketegal tu enda ulih nyadika seliah ke Hydro-Tasmania ti bejalaika pengawa nitihka atur entarabansa enti sida deka bekereja enggau sebarang rejim perintah ti ngelanggar hak pengelantang mensia, tang stesyen TV SBS udah kelalu beguai mansutka jaku minta ampun lalu madahka repot sida nya ‘berat sepiak’.
Ba minggu nyin kemari, Senator ti dikerinduka Hydro-Tasmania, Eric Abetz, mega ngambi peluang dalam aum Komiti Undang-undang Rampa Menua enggau Pemadah endur iya ngutuk pengarang berita veteran ari SBS nya. Lebuh kepala eksekutif SBS madahka bisi lima penyaru ti mit, Abetz lalu ngumbai SBS udah besetuju madahka selampur program ti dikeluarka nya “salah”. Beduduk ba nya, kepala eksekutif SBS lalu enggai ngaga nama-nama ubah agi.
Ukai semina sekali dua aja, tang datai ke kilah ensana, Hydro-Tasmania udah ngamatka pengirau ati ba kaul sida enggau perintah Taib Mahmud ti majakka projek tekat ai ti balat dibantah orang ketegal bisi kaul enggau pengawa makai suap sereta ngelanggar undang-undang hak pengelantang mensia.
Tang ba pengangkat bantah bansa Penan ti ngaga empang jalai ti diumbaka enggau sukung enggau bantu raban-raban NGO nyengkaum NGO entarabansa, tekan ba kompeni Hydro-Tasmania diatu nyau makin betambah
Ke bendar iya kemari, hydro-Tasmania udah enda tau enda nerangka pasal dagang-kunsi sida, iya nya SEB udah “salah” ketegal “ngemesaika” pasal ungkup pengawa sida dalam projek tekat ai Murum nya.
Pengari Pengawa Pemadah ke kompeni Hydro-Tasmania udah madahka bala orang ti ngayanka bantah sereta enggau bala pengarang berita di mua opis sida nya, madahka Repot Taun SEB ti endur Hydro-Tasmania bejalaika ungkup pengawa sida enggau chara ti ngisi penuduk ti tinggi-tinggi lalu meri sanding penemu ba pengelandik nya enda amat!
“Atur ngambi pengereja pengawa ke bala ekspatriat nya ngayanka pengelandik enggau penuduk nya endang beguna bendar ke SEB dikena ngemujurka program SCORE ti nadai dikembuan SEB enggau menua Sarawak empu” [Repot Taun SEB ke taun 2010]
Beduduk ari nya, nitihka penemu Hydro-Tasmania, ukai semina Sarawak Report ti enda betul, ukai semina stesyen TV Dateline ti enda betul, ukai semina gerempung-gerempung NGO ti enda betul, ukai semina bala bansa Penan ti merinsa lalu kena tuntung projek tekat ai nya ti enda betul, tang SEB mega enda betul!
Kompeni Hydro-Tasmania nya sebuah kompeni awam ti deka diatur bedagang ngati ke diri. Naka ke diatu mensia mayuh di Australia enggau bala orang politik sida deka belematika sekali ke sida deka betanggungpengawa laban ngelanggar hak pengelantang mensia di Sarawak tauka sekali ke sida bepuas-ati ke Hydro-Tasmania nya tau ngambi bagi dalam agenda Taib Mahmud ti deka ngerusak pengidup bala rakyat iya empu di Sarawak.
Ba undang-undang entarabansa, sebarang kaul ti ngelanggar Hak Pengelantang Mensia enda ulih diterima, sekali ke kaul nya mimit tauka enda, deka nyukung meri pemutus penemu dia.
Beserimbai enggau nya, Hydro-Tasmania mega betanggungpengawa ngagai Lembaga Kaban IHA. IHA nya nyadika pelasar sida ngemanahka rekod tanggungpengawa sida ke sosial enggau korporat lalu bekereja dalam gelung undang-undang UN.
CEO sida, Roy Adair udah ngumbai SEB nyadi kaban dalam IHA ti ngujungka sida nanggam kaul enggau Hydro-Tasmania. Ke bendar iya, SEB nyadi kaban dalam IHA SEPENGUDAH Hydro-Tasmania nanggam kaul enggau SEB.
Nambahka nya, David Crean udah nemuai ke Sarawak lalu meri sanding penemu ngagai SEB ngatur aum besai IHA dalam taun 2013 ila.
Sekali ke Hydro-Tasmania nya ngumbai SEB nyadi kaban dalam IHA udah bekau beberapa bulan udah nya, taja pan sida udah mayar yuran £3,000 setaun lalu udah nya ulih nyadi tuai rumah ngatur aum besai nya?
Sekali ke ari ti nyadi kaban dalam IHA, Hydro-Tasmania ngambi tindak iya ngelakuka imej SEB dalam IHA, lalu sekali agi mantu Taib Mahmud ngamatka perambu iya deka ngaga mayuh agi tekat ai lalu ngemanahka agi program SCORE ti tau pulai ke penguntung iya empu aja?
Ba sebengkah penerang dalam suratberita tu tadi, Hydro-Tasmania udah ngumbai kaul sida enggau Sarawak ketegal penyinu sida ke penusah ti nuntung raban bansa asal di menua nya.
Sida nya patut dibai ngagai forum awam sama-sama enggau bansa Penan enggau bepuluh ribu iku bansa orang asal ti bukai ti udah kena tuntung penanggul ti datai ari projek tekat ai di menua Sarawak ngambika nerangka nama pemanah enggau penguntung ti ulih sida.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments