Polis Madahka Bantu Ke Penan Di Murum Nya “Dikena Ngasut”

• 24 Oct 2012
• BM 翻译

Pemayuh bala raban polis benung ditambah ba endur empang jalai ti didirika bansa Penan ba jalai penama ngagai tapak tekat Murum. Urung ensana bala polis bisi ditemu nangkap siku kaban NGO ti datai ngagai endur nya laban deka nganjung bantu pemakai, lalu enggau nya polis madahka orang nya datai kia laban deka ngasut bansa Penan terus betan seraya ngayanka bantah sida.

“Pengawa nya ukai nyadika sebengkah penyalah enti iya udah nganjung bantu bekal ngagai rumah panjai bansa Penan”, ko jaku siku tuai raban polis ba endur nya. Jaku ti munyi nya ngayanka bansa Penan endang enda nerima sebarang bantu ari perintah kenyau ari kandang menua sida ditebang ba pengawa meresi tapak endur ti deka ngaga tekat ai lalu pia mega mayuh bala anak mit bansa Penan bisi ditemu kena serang penanggul pengerai kurang pemakai ti ke guna tubuh sida.

Tang, tuai polis nya mengkang madahka pengawa nganjung bantu pemakai ngagai bala orang ti benung ngibun empang jalai nya sebengkah pengawa ti ditagang.
Pengirau ati enggau penakut bala orang di endur nya nyau majak nambah lebuh perintah ti dipelabaka deka ngelaban bala orang ti ngayanka bantah sida dia, taja pan bala orang bansa asal nya dikemendarka ngayanka bantah sida baka ti ditemu dalam adat Gerempung Bansa-Bansa Besatu (UN) ti endur menua Malaysia endang nyadi kaban.

Lapan buah genturung pendiau bansa Penan udah begempung nirika empang jalai nya sepengudah sida nemu Langkar Pengawa Pengentap Pendiau (RAP) ti udah tiris ngagai sida. Langkar pengawa nya udah dipelalaika sekumbang pengawa perintah ti ngaga tekat ai, taja pan atur entarabansa madahka orang bansa asal enda tau enda diterangka dulu sebarang pengawa ti deka dikereja ba rampa menua sida lalu minta sida besetujuka pengawa nya ngambika sida tau nyediaka diri napi sebarang empas ari pengawa nya.
RAP nya ngundan perambu ti deka mayar pampas ti jauh mimit ari ikas penyeranta ke ninting ruang bilik lalu sida nya deka dibayar dalam pengalama empat taun aja. Kandang menua ti diagihka endur ngentapka pendiau sida nya mega kelalu mit sereta sekut.

Enggau nya bala Penan lalu berumban-rumban nirika empang jalai lalu mantaika peminta-peminta sida. Peminta-peminta sida nya nyengkaum bayar pampas RM500,000 ke tiap ruang bilik, diberi bagi dalam pengawa dagang ba tekat ai Murum nya enggau diagihka sebengkah kandang endur ti besai ti ukai diagihka ngagai sebarang kompeni kebun dandang besai kelapa sawit.

Ba pun penanggul tu perintah Barisan Nasional udah madahka penanggul tu udah mujur diputarka. Pengari rayat ba menua nya, YB Liwan Lagang, nadai nemuai ngagai empang jalai nya ngambika meda gaya penanggul ke diri empu.

Diatu terang bendar empang jalai nya bedau dirumpang, lalu enggau nya YB Liwan Lagang enggau menteri bukai dalam perintah BN nyau belabuh ngutuk bansa Penan ketegal ti udah kena asut, laban belalauka penemu ti ngumbai bansa Penan nya enda nemu berunding ke diri empu.
Tang bansa Penan nya udah ngereja pengawa ti udah kala dikereja orang bukai, Sida angkat ngelaban ngambika bansa sida empu enda pupus ketegal kena keduan orang sepeneka ati.

Dalam pengelama betaun-taun, sida suah disemayaka utai ti deka diberika ngagai sida, tang ngelama tu sida endang nadai kala diterangka utai ti dimuatka ke dalam langkar pengentap pendiau ti digaga BN ke sida nya.
Bala orang ti udah kala tanggul laban pengawa pengentap pendiau ba endur bukai baka bala Iban di Batang Ai enggau bala orang bansa asal ti bukai di Bakun diatu udah nemu reti baka ni semaya BN udah nadai dikamatka ngagai sida. Raban bansa Penan di Murum diatu udah nemu sereta nyadang bepuluh-puluh ribu iku bala orang bansa asal deka dipindahka ninggalka menua asal sida laban meri awak endur ngaga tekat ai Baram, Baleh enggau 12 buah agi tekat ai ti udah diperambuka, enda tau enda ngambi tindak sida ba chara-chara ti dikena orang ba sida.

Dalam surat Tanya & Saut ti diayanka bala ari raban NGO ba minggu nyin kemari, dia Kepala Eksekutif Sarawak Energy Berhad ti kaya raya nya, Torstein Sjotveit, siku peranak menua Norway, udah madahka bansa Penan endang udah diterangka dulu lalu sida nya mega udah besetuju ke penyampau bayar pampas ti diterima sida.

Enggau nya kami deka nemu nama kebuah nadai sebarang surat dituliska dalam jaku bansa Penan dikena ngamatka sida udah besetuju lalu nama kebuah sida madahka sida nadai kala diterangka lebuh maya bala pemesai kompeni SEB nemuai ngagai sida lalu semua semaya nya nadai dituliska dalam langkar pengentap pendiau nya?

Lalu enti bala Penan dikumbai gaga ati nyambut langkar pengentap pendiau ti diberi Perintah BN nya, nama kebuah langkar pengawa nya mengkang dipelalaika lalu nama kebuah sida diatu angkat madahka sida enda kala meda surat nya?
Jaku ari Torstein Sjotveit nya diatu benung dipansik bala raban NGO belalauka atur-atur entarabansa. Lalu beserimbai enggau nya mega, peranak menua Norway nya udah diayanka ba surat berita menua iya empu laban dikaitka enggau penyalah makai suap.

Ba hari Enam tu tadi surat berita Dagbladet di menua Norway udah nuliska sebengkah repot ti madahka raban NGO ari menua Switzerland, Bruno Manser Fund, udah nganjung jaku tuduh sida ngelaban Torstein Dale Sjotveit ti benung bekereja enggau SEB di Sarawak, enggau raban pemerati penyalah makai suap, Okokim, bekaul enggau sekeda ‘penyelai’ ti nyadi dalam pengawa ngatur pejalai projek ti digela enggau nama “Sarawak Corridor of Renewable Energy (SCORE)”.

Igat Torstein Sjotveit ti begaji bejuta-juta dollar nya, udah madahka pasal semua kontrak enggau SEB dikereja ngena “atur ti terang” lalu jaku tanya pasal “pengempu” ba kompeni-kompeni ti bisi bekaul enggau SEB nya “enda relevan”. Ari saut Torstein nya, dia bala NGO lalu minta penerang ti silik pasal penatai enggau pemansut pekara belanja dia.

Enti Taib deka milih ngena kuasa polis nangkap bala Penan lalu ngerumpang empang jalai sida nya tauka dikena nagang pemasuk bantu pemakai, ke tebal agi bala orang ke indu, pengawa nya enda ulih dilalaika iya agi.
Perintah BN Sarawak udah dipeda puntan ngereja pengawa laban enda nitihka atur ti telus, atur pengawa jurai enggau atur besetujuka sekumbang ngaga tekat ai ngena penetap UN bekaul enggau kuasa orang asal enggau mayuh agi atur ti udah nanggam menua Malaysia enggau menua buklai, baka ti endang udah ditemu bala pemacha blog tu.

Dikena sida ngayanka bantah sida, pengangkat bansa Penan ti ngelaban nya dikemendarka undang-undang entarabansa, lalu atur ti dikereja perintah BN Sarawak dikena nagang pengangkat bansa Penan nya salah.
Ba urung bulan Lima taun 2013 tu ila dia serakup International Hydropower Association (IHA) udah diperambuka deka ngatur aum besai sida di nengeri Kuching, ti dipelabaka sekeda orang dikena ngelai sida taluk ke tanggungpengawa sosial enggau korporat bekaul enggau pengawa ngaga tekat ai, baka ti diperambuka Torstein Sjotveit enggau bakih iya ari kompeni Hydro-Tasmania, ba perambu sida ti deka ngaga mayuh agi tekat ai.

Pengawa kasar dikena beduan raban bansa Penan nya enda ulih nyadika ketegal ti deka ngumbai sida Penan nya ba tanah salah.