Ruang Bilik Ti Lantang Sereta Gaga? Ragad Nyipak Taib Ba Mua Orang Mayuh!

• 30 Oct 2012
• BM 翻译

Kena hari Lima, 12hb Sepuloh bedau lama tu udah, bala orang mayuh di rumah Wisma Bapa Malaysia di Kuching udah tekenyit meda sebengkah pekara ti nyadi. Kepala Menteri enggau bini biak iya Ragad bisi dipeda belaya ba luar opis iya, nyentuk ke Ragad enggau enda mukai-mukai lalu nyipak tulang betis Taib.
Dulu ari nya Ragad udah ngelawa opis Taib laban minta deka betemu enggau orang tuai nya, ti udah dianti iya nyentuk ke Taib lalu nurun ari opis iya. Nitih ke cherita siku ari bala orang mayuh ti meda penyarut dua iku melaki bini nya:

“udah seduai iya tembu belaya, orang tuai (Taib) nya disipak bini iya ba kaki ba mua mensia mayuh!”
Udah nya seduai iya lalu beserara lalu ngena kerita diri empu ninggalka endur nya.

Penyarut nya ukai ke terubah dipeda nyadi entara dua iku melaki bini nya. Bisi sekali Ragad dipeda nempalung ke beg nuju Taib ba mua sida Taib nya sebilik.
Ke bendar Taib Mahmud nya ukai siku orang ti nelap. Bisi sekali dalam bulan Dua-belas 2010 iya ditemu ngesal ke ati sida sebilik enggau chara nimbak ke pistol emas iya ke langit ketegal iya ti ringat ke Ragad enda madahka penunga diri mindah sehari nya.

Nadai siti ari penyarut ba mua mayuh nya udah dituliska dalam surat berita ti belisin di menua Sarawak laban kompeni-kompeni surat berita nya nangika lisin sida dibatak pulai. Tang penyarut dua iku melaki bini nya seruran nyadi ke buah kenang sekeda orang dalam ruang bilik Taib empu lalu pia mega nyadika buah uti sekeda orang di Kuching.
Nya meh asil tikah ti dikereja enggau beguai-guai dalam kandang beberapa minggu kejang deka napi pengawa bepilihbesai nyin kemari.

Ari sukut perening orang tuai nya, nya ngelai ke pengiruh iya ngayanka diri agi regas sereta berupai biak, taja pan udah lebih 50 taun dalam pengawa politik lalu diatu ditinggang mayuh macham penyakit ti berat, lalu tiap iku rakyat Sarawak ngasaika iya patut nyurutka diri ari pengawa menteri iya nya.
Nambahka nya mega Menteri Besai Malaysia, Najib Razak, kala nangkan Taib enggau jaku madahka iya patut besemaya enggau rakyat iya empu iya deka badu mangku pengawa, tang semaya nya lalu enda dikingatka iya agi udah iya mujur bulih penuduk menteri iya nya.

Ari perening Ragad, nama kebuah indu ti beumur 29 taun nya sanggup nyadika bini siku lelaki ti ngenuai Taib ti kaya-raja nya ti lebih dua kali lipat tuai ari iya, lalu enda kala dikelala iya lalu mega benung ditinggang penyakit riman perut?
Tikah nya ti udah diatur menyadi apai Ragad, Robert Geneid, dalam timpuh ti enda lama, lebuh Robert enggau bini iya Raziah (iya nya menyadi indu Taib), benung ngiga sukung ari Taib lalu mega dipeda nyadika malin pengawa enggau pendiau Kepala Menteri ti udah tuai bendar nya.

Taja pan baka nya, Taib enggau Geneid udah salah kira pasal Ragad. Agi mega Ragad nya beumur 29 taun lalu ukai 19 taun lebuh iya disabung belaki Taib lalu iya endang udah teleba idup chara orang di nengeri besai, nyadi pramugari bilun ti mindah-mindah sebelah dunya tu. Utai ti enda dikibuhka Taib maya iya baru jadi enggau Ragad, iya nya Ragad endang udah balu lalu bisi dua iku anak ti udah besai!
Ke bendar iya, Ragad nya ukai siku indu ti lembut sereta balat mentas baka ti dikinginka Taib. Ragad nya indu ti kering sereta bingking lalu mar bendar dialahka.
Taib Mahmud seruran ngumbai diri tuan ke semua orang lalu iya bisi dua iku anak lelaki ti ditemu kala menyati bini diri empu, diatu nemu diri jauh mit tubuh dibandingka enggau Ragad. Nya alai, tiap kali seduai iya bisi besengki penemu, Taib endang enda telabanka Ragad!

Bisi bala pemacha blog tu ngembuan penyinu ati ke Taib? Anang enda meri komen kita.
Bisi orang udah ngumbai timpuh Taib nyau datai ba pengujung iya.
Agi mega Ragad selalu dipeda sama-sama enggau laki iya nya lalu ngena gari enggau pengias tubuh ti mar-mar. Penyarut entara seduai enda kala dituliska dalam surat berita laban nangi ke tau ngenyaika nama seduai.

Taib mega selalu dipeda nyuap pemakai ngagai mulut Ragad lebuh maya pengerami makai besai lalu Ragad mega dipeda enda tau enda ngayanka mua ti manis sereta lantang ati, seraya ke ngena gari ti manah-manah enggau pengias tubuh ti mar-mar lalu enda kala ngena semua utai nya dua kali.
Tang, kitai tentu deka mar amat dipeda lantang ati enggau bini/laki diri lebih agi enti kaul/tikah kitai nya ukai ari peneka kitai empu. Taib nyangka nya enggai bisi peturun ari Ragad, lalu pia mega iya tentu enggai dipeda orang beranak mit ba umur maya enggi iya nya. Bisi sekeda orang ngumbai Ragad diatu udah teparuk pendiau. Bisi sekali Ragad bebaika bala sida sebilik ngagai rumah Taib di Demak Jaya ti udah nya lalu ngenataika asai enda lantang ba sida Taib sebilik, enggau Taib empu mega.

Mayuh orang deka ngumbai ulah kitai ngenang pasal pendiau enggau pengidup orang bukai baka tu nya pengawa ti nengkilaka sereta kiruhka orang. Tang ba orang ti bekuasa baka nya, rakyat mayuh di Sarawak bisi kuasa patut nemu nama utai ti nanggul tuai sida empu. Laban penanggul dalam ruang bilik tuai nya mega deka mai penanggul ba pendiau rakyat iya empu.
Ba bala orang ti ngarapka diri bulih penguntung ari Taib ngelama tu, bisi siti utai ti nyemaka ke sida, ngulihka pengeraja ke diri empu. Ragad datai ke menua Sarawak enggau nadai utai dikemisi lalu iya semina teleba idup chara orang di nengeri ti udah nya ngasaika pengidup iya kaya enggau naka penyampat.

Sama baka menyadi apai iya empu, Robert Geneid, enggau ibu iya, Raziah ti jauh dulu ari iya, ti udah bulih pengaya ari ti ngeruga tanah NCR orang bansa asal enggau bulih mayuh kontrak ti dikuasa opis Taib, diatu Ragad empu udah ngayanka pengingin iya masuk champur dalam pengawa ngaga pemutus runding ba bejalaika atur perintah di Sarawak. Tuju iya berupai bendar, iya nya ngulihka pengeraja enggau naka pemayuh sebedau laki iya parai lalu iya enda tau enda bekereja bebendar enggau naka penyampat.
Bisi penerang ari orang dalam madahka Ragad diatu bisi ngujika diri ngulihka kuasa atas kontrak-kontrak ari opis Taib – kontrak ti patut dikeluarka ngena chara tender tebuka, tang dalam perintah Taib, pengawa ngeluarka kontrak nya enda dikereja enggau atur ti betul.

Penerang ari orang dalam mega madahka semekih ngulihka kontrak entara sida Taib sebilik diatu nyau majak balat nyadi. Raziah enggau laki iya Robert diatu nyau ngasaika seduai sama enda dikibuhka agi ukai semina laban Ragad, tang laban anak indu Taib ti benama, Hannifah, ti mega ditemu seruran nyemekih ibu iya, Raziah, tang nyerumba nya ngembuan ati ti enda lantang ngagai indai tiri iya, Ragad, ti jauh bendar biak ari umur iya empu.

Ruang bilik ti lantang? Kitai orang biasa tu seruran ditangkan ngulihka pengeraja nya enda deka mai pengelantang ngagai ruang bilik. Sipak Ragad ba Taib nya ngayanka iya udah putus pengarap udah ti jadi melaki bini enggau Taib lalu ukai ketegal pengelantang dalam ruang bilik.
Tang pengerangka ti tumbuh ba tengah-tengah sistem autokrasi Taib mega udah ngeruga pengelantang pengidup rakyat iya empu di Sarawak.
Sida Taib Mahmud sebilik nya patut dibuai lalu perintah ti lebih landik, beresi enggau manah patut dipulaika ke penguntung rakyat menua Sarawak lalu ukai dikena mai penguntung ke bala orang ti rangka ti datai ari menua Eropah, Australia enggau ari Timur Tengah.