Agi Mayuh Jaku Bantah Ba Taib Lebuh Kompeni WTK Dituduh Mai Penanggul Reba Rarat

Surat berita pemadu tebilang di menua UK, Daily Mail, udah nuliska sebengkah berita bekaul enggau jaku kutuk ti ditujuka ngagai bank entarabansa, HSBC, laban ti ditekanka melanja pengawa ngerusak rampa menua di menua Sarawak ti balat dikereja Abdul Taib Mahmud ti balat rangka nya.

Gerempung NGO entarabansa, Global Witness, udah mujur mansutka asil pansik sida ti nunjukka bank HSBC nya ti ngumbai polisi sida empu nya belalauka batang penemu ‘bebasaka rampa menua’ ba siti ari atur sida nyali duit ngagai kompeni-kompeni kayu batang enggau kebun dandang besai baka kompeni Shin Yang, Ta Ann, WTK enggau Sarawak Oil Palm.
Semua kompeni tu nyadika kompeni kroni ti bekereja enggau Taib Mahmud ti balat mai pengerusak rampa menua di Sarawak, tang penyalah sida tu enda direpotka dalam sebarang surat berita tauka nengah media elektronik, lalu nadai mega meri penguntung ngagai bala rakyat Sarawak empu, tauka mai penguntung ngagai pengawa dagang ke menua Sarawak.
Repot nya ngamatka penuduk Taib Mahmud ti nyadi orang jai lumur satu dalam dunya tu ba penyalah ngerusak rampa menua, lalu repot nya mega ngamatka penerang ti madahka kompeni WTK udah betanggungpengawa ngujungka penusah reba rarat ti bisi udah nyadi di sepemanjai Batang Rajang dalam taun 2010 suba.

Opis Kampung Sarawak nadai mansutka penerang ti silik pasal penusah tu kemari tang sida majak nekanka penusah reba rarat nya datai ari pengawa orang ti ngulihka kayu batang enggau chara belalai. Tang, raban Global Witness udah mujur bulih asil pansik sida ngena gambar satelit ari langit ti ngayanka kandang menua ngulihka kayu kampung ti dikereja kompeni WTK nya ke pun penusah reba rarat nya kemari, tang kompeni nya enda diukum tauka enda dibatak lisin kampung sida.

Global Witness udah ulih ngamatka pasal dua iku anak indu Abdul Taib Mahmud nya nyadikaka pemegai share pemadu besai dalam kompeni WTK begulai enggau menyadi apai sida, ti benama Tufail Mahmud, baka ke direpotka Sarawak Report dulu ari tu. Nyangka nya siti ari kebuah penusah reba rarat nya enda direpotka dalam suratberita tauka media elektronik di menua Sarawak suba?
Kompeni WTK mega ditemu bisi ngelanggar undang-undang rampa menua di Papua New Guinea enggau di Amazon, ti endur kompeni ti rangka nya enggau bala pemegai share iya ari sida Taib Mahmud sebilik udah nguji ngemesaika kandang rampa menua ti deka ditebang sida.

Ari kaul bala anak indu Taib Mahmud enggau Tufail Mahmud dalam WTK nya, Global Witness ulih nunjukka bank HSBC bisi nyali duit ngagai sida ti dituduh ngelanggar undang-undang menua ketegal penyalah ngubah duit ngagai Orang Siku-Siku Dalam Politik Ti Udah Ditetapka (PEP). Pia mega enggau pengawa beranakka puku kompeni Ta Ann, laban pengerusi iya, Abdul Hamed Sepawi (ti siku ari petunggal ke Taib Mahmud) mega dinamaka PEP.

Utai ti ngasuh kitai alit ati ba asil pansik tu, iya nya baka ni kompeni Shin Yang ti ngereja kampung di Ulu Belaga, tau bekereja dia taja pan kandang kampung bungas nya udah ditetapka perintah Sarawak nyadika Kampung Galau (Taman Negara) ba tengah-tengah pulau Borneo, tang dalam taun 2005 suba, rampa menua dia udah dikeruga, terima kasih ke Kepala Menteri Sarawak Abdul Taib Mahmud laban gerah bendar jari ngeluarka lisin kampung ngagai kompeni nya.

Repot nya mega madahka baka ni bala orang asal di menua nya udah napi emba enggau keruga bala apek bayat ti diupah kompeni baka Shin Yang, lalu repot nya mega madahka kompeni nya bisi nyuap bala orang asal ngambika sida terus ngundi parti Barisan Nasional ti nyadika sebengkah chara sida ngetanka kuasa Taib Mahmud ngambika sida ulih terus bejalaika pengawa sida ti ngulihka kayu batang.
Repot nya mega ngayanka baka ni bank HSBC udah nyali duit RM3.6 juta ngagai sida Ling sebilik ngambika bisi diperanakka dalam pengawa nya. Ba sebengkah chunto penyalah makai suap ti ngeruga menua Sarawak, Global Witness ulih ngamatka penerang ti madahka siku Direktor Opis Kampung Sarawak ke dulu suba, Leo Chai, udah diberi buah jari sebagi ti besai bendar ba anak kompeni Shin Yang, ti udah nya mai penguntung ari lisin ti dikeluarka ngagai sida.

Sebengkah agi kompeni ti direpotka Global Witness nya, iya nya Sarawak Oil Palm Berhad ti dikemataka Gerald Rentap Jabu, iya nya anak lelaki Sapit Kepala Menteri Sarawak, Alfred Jabu Anak Numpang, terang bendar ngayanka penyalah bebalutka batang pengawa (percanggahan kepentingan).
Global Witness udah ngayan empas pengerusak ti silik ba rampa menua ti dikereja Sarawak Oil Palm dalam beberapa taun tu, terima kasih ke lisin kebun dandang besai ti diberi Taib Mahmud mega.
Sarawak Oil Palm nya mega sebengkah ari kompeni ti nerima duit jail ari bank HSBC. HSBC bisi kala ngatur pengawa randau enggau bala pengarang berita bekaul enggau pengawa ngemataka pemanah rampa menua di Kuching dalam taun 2005 suba.

Ba penusah mai pengangat ke dunya ti datai ari pemansut angin karbon ti kelalu mayuh baka ti dikereja Sarawak Oil Palm ketegal sida ti ngerusak rampa menua, repot tu enda bebelah bagi.
Global Witness mega bisi ngayanka kompeni Ta Ann nyadi sebengkah agi kompeni ti bisi nginjau duit ari HSBC taja pan kompeni nya (ti enggi Hamed Sepawi, iya nya petunggal Taib Mahmud) ukai kompeni ti amat-amat ngemerankan ‘basa ke rampa menua’ munyi ti ditebah-tebah sida. Tang Ta Ann majak ngiga rampa kampung ke ditebang nyentuk ke ngagai menua Tasmania lalu sida sekali agi ngaku asil kayu sida nya ‘bebasaka rampa menua’.

Repot nya mega netapka Hamed Sepawi nya siku ari PEP, ti sebaka enggau HSBC ti bisi bekaul enggau penyalah ngubah duit, lalu udah nya mai pengirau ati ngagai perintah Tasmania ti lama udah nanggam sempekat dagang enggau iya.

Semua repot ari Global Witness nya udah ngaga simpul penemu ti padat baka ni Abdul Taib Mahmud enggau sida sebilik sereta mega enggau bala kroni iya tau dikumbai munsuh rampa menua, ukai semina ke rampa menua di Sarawak empu tauka ngagai rakyat Sarawak, tang mega nyadika munsuh rampa menua di endur bukai di dunya tu.
Beserimbai enggau penatai Abdul Taib Mahmud ngagai aum besai ITTO di menua Tokyo di Jepun ba pun minggu tu, iya patut ditanya bekaul enggau penuduk iya lalu mega bekaul enggau pemerinsa menua iya empu ketegal penyalah iya nya.

Bank HSBC udah mujur bendar bulih untung manggai ngagai £100 juta ari pengawa nyali duit ngagai kompeni-kompeni kayu batang enggau kebun dandang besai di menua Malaysia ti udah balat bendar mai pengerusak ngagai rampa menua lalu ngelanggar undang-undang pengelantang mensia, nitih ke repot nya baru.
Pansik Global Witness mega tetemuka baka ni HSBC nyali duit ngagai kompeni-kompeni ti dijangka bisi kaul enggau penyalah makai suap di Sarawak, Malaysia.
Sarawak ditemu nyadika sebengkah menua ti nyual kayu tropika pemadu mayuh bebanding enggau Amerika Selatan enggau Afrika dipegulaika sekali, lalu duit jail HSBC ngagai kompeni-kompeni kayu batang ari Sarawak nya mujur mansutka asil enda kurang ari £80 juta ba bungai duit enggau bayar ti bukai.
NGO Global Witness udah terang bendar mansutka jaku tuduh sida ti madahka semua kompeni ti disebut sida nya bempu tanggungpengawa ngeruga sereta ngerusak rampa menua di pulau Borneo lalu mai penusah ke raban orang bansa asal iya.

Naka ke diatu kompeni-kompeni nya benung nebang kayu kampung ti bulih tiga kali besai agi ari menua Norway.
Dalam sebengkah agi repot, sida udah meri buah penemu ti madahka HSBC patut dikaitka enggau penyalah ngubah duit laban sida bisi bekaul enggau ngambi bagi dalam sektor kampung di Malaysia ti korup.
Ari ketegal menua Sarawak ti betuaika Taib Mahmud, ti benung dipansik raban SPRM, HSBC mega patut sama-sama dipansik mega. Taib Mahmud dikumbai udah salah guna kuasa politik iya empu dikena iya mansutka penguntung ke bala sida sebilik enggau bala bakih iya, munyi ti direpotka NGO nya.
Global Witness madahka sida diatu bisi ngembuan mayuh macham penerang ti tegap ti ngayanka Taib Mahmud enggau sida sebilik lalu mega enggau bala bakih iya bisi dibalut penyalah makai suap enggau ngubah duit ti besistematik.

Repot Global Witness bisi nyebut empat buah kompeni ti tau dikaitka enggau duit jali ari HSBC ketegal ditemu ngelanggar undang-undang kampung ti ditetapka bank nya dalam taun 2004 suba, ti minta semua kompeni ti deka bejalaika pengawa sida ba atas rampa menua enda tau enda dikemendarka Opis Stewardship Kampung (FSC). Tang nadai sebuah ari kompeni nya bulih pemendar ti diletakka nya.
Kompeni-kompeni nya nyengkaum:

• Raban Shin Yang, ti dituduh nebang kampung ti udah ditagaka nyadi Taman Negara. Bala orang asal di menua nya ti kena tuntung penanggul ari pengawa sida Shin Yang enggau bala orang ti kala bekereja enggau sida udah madahka kompeni nya bisi ngupah raban apek bayat dikena ngemba orang tauka sapa orang ti deka bejaku tauka beserebana.
• Sarawak Oil Palm, ti dituduh muka kandang menua kampung paya endur nanam sawit, ti udah nya ngujung pengawa sida nya mansutka gas karbon ti mayuh ngagai angin.
• Raban WTK udah ditemu ngerusak kandang menua ba tengah-tengah pulau Borneo ti ngujungka penusah tanah tusur enggau reba rarat nyadi ba batang sungai pemadu panjai di Sarawak dalam taun 2010 suba.
• Raban Ta Ann udah muka kandang kampung ti endur jelu mayas diau lalu diatu udah ngujungka pengusut ba penyampau jelu nya.
Nitihka jaku pengari Global Witness, bank HSBC udah bedagangka tanggungpengawa sida ba mua orang mayuh, tang sida enda mujur bejalaika pengawa munyi ti ditebah sida. Bank nya patut ngelengkaka bala penginjau duit jali sida lalu datai ke mua lalu mayar pampas enggau ganti rugi ke pengerusak rampa menua ti dikereja kompeni-kompeni ti udah dijali sida duit.
Pengari ari HSBC bisi mansutka jaku madahka isda enda tau madahka sapa-sapa bagi orang ti nginjau duit ari sida ketegal atur sida bebasaka pengelantang orang nya.
Nitihka penerang HSBC baru, sida deka meresa repot pasal pekara kampung di Sarawak, lalu deka bebasaka semua penerang bekaul enggau empas pengawa ngeruga kampung ba atas sosial enggau rampa menua lalu sida besemaya deka ngambi tindak ti patut.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments