Nya Alai Sapa Ke Dikumbai Taib Pemula?

Taun nyin kemari Abdul Taib Mahmud udah ngumbai Sarawak Report nya pemula laban udah narit perening orang mayuh ngagai sebengkah penerang ti madahka pengerusak kampung enggau rampa menua di Sarawak diatu besai bendar.
Kami udah nuliska repot kami ti madahka enda lebih ari 5% pemesai laluh rampa kampung bungas agi tinggal di Sarawak ti bedau dikeruga tauka ditebang.
Tang Taib majak madahka 70-80% kampung bungas di menua Sarawak endang bedau dikeruga tauka ditebang!
Enti jaku ambu nya enda ngasuh kitai tusah ati, nyangka jaku ti munyi nya tau mega ngasuh kitai ketawa.

Tang Taib enggau raban penyamun iya terus ngumbai penerang begambar ari satelit enggau angka kira-kira renggat entarabansa nya dikena nyukung angka kira-kira iya ti enda masuk akal nya ti endur iya ngumbai Sarawak Report udah nempa cherita bula ti “salah sereta mai penyaru runding”.
Adi ipar iya empu ti rangka, Robert Genied, ti benung bekuasa ba Mulu lalu mega ngulihka penguntung ari lisin-lisin kayu batang ti besai-besai udah ditemu numbuhka tabung iya empu ‘dikena nyukung pengawa ngintu rampa menua’. Sekali ke tu tau nyadi ke utai ti ngasuh kitai geli ati?
Tang Taib diatu mar bendar ngiga orang ti tau dikarapka iya dikena iya nyukung penuduk iya. Besakal enggau penemu entarabansa ti benung ngerembai sereta nyukung bantah kami ba pengerangka iya ngeruga rampa kampung ba menua iya empu lalu melakangka hak rakyat iya empu.

Ari sebengkah artikel ti dikeluarka enggau silik dia majalah The Economist ba minggu nyin kemari, sekali ke Taib mega deka ngumbai The Economist nya bula?
Artikel ti ditulis dalam The Economist nya endang belalauka pansik ti silik ti dipejalaika raban NGO rampa menua ti pemadu dipebasaka orang mayuh di serata dunya tu, Global Witness.
Diatu Global Witness nya benung ngeluarka mayuh artikel pasal pengawa ngerusak rampa menua ti dikereja Taib Mahmud. Global Witness numpuka perati sida ngagai sebengkah gerempung penyali duit ti bemata dua, ti ngumbai diri nyukung pengawa ngintu pemanah rampa menua taja pan sida nyukung pengawa ngulihka kayu batang enggau naka pengerangka, baka bank HSBC.
Nya alai, sekali ke Taib deka ngumbai gerempung NGO Global Witness nya mega bula?

Dalam repot Global Witness, sida suah bendar nandu jaku bantah sida enggau tuduh sida dikena ngelaban Taib ti madahka Sarawak Report udah narit tumpu perati orang mayuh lalu NGO nya udah ngayanka angka kira-kira ti tau ngasuh kitai tekenyit.
Kepala Menteri nya nyangka enda ulih napi jaku bantah kami lalu nulak semua dawa iya pasal rinduka rampa menua enti iya mandingka pansik ti dipejalaika Global Witness nya.
Ba hari Satu tu ila, Taib deka nemuai ke menua Tokyo lalu betemu enggau sebengkah atur pengawa ti tau ngemalu iya empu ti endur iya deka diasuh mansutka jaku enggau penerang pasal rekod pengawa ngulihka kayu batang di Sarawak rambau aum di UN ti dipelanja gerempung ITTO.

Baka ni chara iya deka ngenanka sereta ngelalaika rekod jai ba mua orang mayuh ba aum nya ila ti tebal agi datai ari raban NGO enggau bala orang ti landik ti udah bebendar ngereja pengawa ngintu pemanah rampa kampung ti agi tinggal di dunya nya? Ingat pemesai rampa kampung ti agi tinggal di Sarawak diatu semina 0.5% aja, tang Sarawak nyadika menua ti nyual kayu batang pemadu besai bebanding enggau menua Amazon enggau Afrika dipegulaika sekali dalam taun 2010 suba!
Mayuh ari asil kayu kering ti ditebang nya digaga nyadi papan lapis ti enda manah kualiti, lebuh pengawa nebang ti betagang-tagang patut dipejalaika ngambika dikena nentuka pemanah rega enggau asil iya mega.

Gerempung Bruno Manser Fund ti suah mansutka pengerangka Taib Mahmud dalam pengawa iya ti ngerusak rampa kampung bungas, lalu mega udah bejalaika kempen Ngetuka Pengawa Nebang, udah mansutka jaku chabar sida ngagai gerempung ITTO lalu dikena sida nanya nama pelasar sida ngangauka Taib bejaku maya aum entarabansa nya ila, taja pan ‘Kepala Apek Bayat Kayu Batang’ nya udah enda mujur bejalaika atur ngulihka kayu enggau chara beterus ti ditetapka ITTO 20 taun ke udah?

Ke bendar iya, sebengkah ari mayuh bengkah chara Taib udah nyeliahka diri kena bantah orang iya nagang orang ari menua bukai tama ke menua Sarawak sepeneka ati iya. Raban-raban NGO ti udu mantah iya (nyengkaum Sarawak Report) udah dirintaika iya dalam rintai chelum iya.

Baka nya mega, Kepala Menteri ti bekukut-besi nya ti mega nyadi Menteri Pekara Belanja enggau Menteri Perambu Pengawa enggau Pengeraja Asal Sarawak endang seruran nentuka penumbuh sebarang media ti ngati ke diri enda mudah nuliska sebarang berita di Sarawak, reti nya, iya tau nyebut penerang nitihka peneka iya empu lalu enda tau disakal tauka dibantah.
Enti Taib Mahmud deka ngumbai laluh rampa kampung di Sarawak diatu agi bisi 80%, orang mayuh pan enda tau enda nerima penerang nya mata-mata. Agi mega, sapa ti berani madahka Tuan Raja nya nadai ngena gari serepik?

Bala deligesyen ba aum ITTO nya ila patut ngena peluang sida maya nya nangkan Taib pasal iya ti tuai umur nya seruran bemimpi laban seruran ngumbai pemesai laluh rampa kampung ti agi tinggal di Sarawak nya 80% endang bedau kala dikeruga.

Nyangka bini baru iya Ragad patut sekali agi nyipak tulang betis iya sebedau iya nurun ke Tokyo nya dikena ngerak iya ari mimpi iya?
Agi mega udah Ragad dipeda orang nyerang laki iya ba mua opis iya ba Wisma Bapa Malaysia kena hari Lima 12 haribulan Sepuluh tu tadi, kami dipadahka baru pasal serang ti kedua ba mua mensia mayuh rambau sebengkah pengerami makai hari Lima nyin kemari!

Nyau deka sampal bala orang Sarawak patut sinu ke bini iya, Ragad, nya tang laban bala orang Sarawak nya bansa orang ti nelap, sida patut ngena undi sida ngelabuhka Taib Mahmud ba pengawa bepilihbesai ti deka diatur di sebarang maya tu ila!

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments