Latest Stories
Sections
Idris Buang – Pengari SEB ti mansutka jaku sepeneka ati
Peminta mensia mayuh ngambika kangau enggau sada sida dipendingka dulu suba ti enda disunting entara pengari SEB, Idris Buang, enggau siku pengarang berita TV Dateline ari menua Australia, bekaul enggau perambu perintah Taib di Sarawak ti deka ngaga 50 buah tekat ai nyau udah belabuh ngayanka pengamat iya.
Lebuh iya ti ditanya, Idris Buang enda ulih enda malik ke belakang ngagai bala penyanding penemu iya ari kompeni Hydro-Tasmania ni maya tekat ai Baram deka belabuh digaga, ti deka ngampuhka pendiau bepuluh-ribu iku orang bansa asal dipelilih menua nya. Sida SEB diatu beentaruhka pengidup orang bansa asal lalu pia mega ngerusak rampa menua ti besai bendar di Sarawak. SEB udah ngasuh Idris Buang ngambika ngarika sida ditanya dalam jaku randau, lalu lebuh iya ke ditanya nama kebuah orang di Bakun lalu bedau dipampas taja pan diatu udah lebih sepuluh taun sida ninggalka menua Bakun nya, iya semina madahka raban bansa asal nya enda tau enda dipampas, sebengkah jaku saut ti kenu ku iya ulih ngemuaska ati bala peninga iya. Jaku saut Idris Buang nya nunjukka iya nya siku ari bala orang ti enggai ngelala tanggung pengawa menua Malaysia ti nyadi kaban dalam gerempung UNDRIP, laban iya agi kakang penemu pasal sekali ke pampas kala dibayar tauka bedau ngagai orang bansa asal ti dipindahka ngagai tumpuk pendiau ti baru ketegal tekat Bakun nya!
Gerempung UNDRIP madahka perintah menua Sarawak enggau kompeni SEB udah melakangka jurai penemu enggau raban bansa asal sebedau sida belabuh ngaga tekat enggau chara belalai ti endur orang bansa asal nadai diberi peluang ngaga pemilih diri empu, baka ti udah disebut Idris Buang dalam jaku randau iya enggau pengarang berita TV nya.
Ari jaku saut iya nya, Idris Buang dipeda baka orang ti tinggal ari arus pemansang dunya baru, ukai baka orang ari raban bansa asal ti minta diperundingka tauka dipampas ketegal pemindah sida nya. Bisi siti saut nama kebuah perintah Sarawak enda tau enda ngaga 50 iti tekat ai. Kontrak masang kabel ti beungkus RM90 juta udah diberi perintah ngagai anak Taib, iya nya Mahmud Abu Bekir, nya nyadika siti chunto ti nyata bendar.
Tang Idris Buang tetap madahka penyalah makai suap endang nadai nyadi dalam projek nya! Tender projek enggau chara tebuka endang enda disebut iya, ti bekaul enggau projek SCORE, taja pan tender nya diberi enggau chara belalai di belakang pintu opis kepala menteri Abdul Taib Mahmud.
Jaku penerang ti nengkeman? – email tu ngayanka pechara-pechara bekaul enggau Kebebasan Bepenerang
Enggau nya, berupai bendar jaku saut Idris Buang lebuh iya ti ditanya nya endang udah disediaka Sapit Presiden Nick Wright ari Hydro-Tasmania, baka ti ditusui iya ngagai CEO Hydro-Tasmania, Roy Adair nengah email iya nya.
Sekali ke bala orang ari menua Tasmania deka bendar bekaul enggau projek-projek nya?
Nick Wright nya siku orang ti ngiring kompeni SEB lebuh sida nuliska surat jaku bantah nyukung Hydro-Tasmania mantah program TV Dateline, ti udah madamka mayuh bengkah penerang ari Idris Buang ti bisi kasar munyi lalu tau mangkung pala sida empu.
Nuliska email ari SEB (dikemetulka) ti ditujuka ngagai SBS. Baka tu chara orang ti landik ba pekara kaul enggau orang bukai? Diatu Nick Wright nyadi Sapit Presiden dalam SEB.
Isu-isu nya udah nambahka mayuh jaku tanya baka ni kaul dagang entara SEB enggau Hydro-Tasmania, enggau nama batang pengawa bala pemesai-pemesai kompeni Hydro-Tasmania dalam ngemujurka projek SCORE.
Sehari tu, gerempung Bruno Manser Fund (BMF) udah ngeluarka jaku penerang ti baru ti minta semua pemesai dalam kompeni Hydro-Tasmania angkat lalu ninggalka menua Sarawak, sepengudah berita pasal ngetu mangku pengawa siku Pengarah Projek sida ba projek Murum, Andrew Pattle, ba ujung bulan nyin kemari, sepengudah jaku sangkal CEO Hydro-Tasmania, Roy Adair, ti madahka kompeni nya nadai bekaul enggau pengawa ngampuhka menua Sarawak, tauka bekaul enggau ngaga tekat Baram.
Nadai bekaul enggau pengawa ngampuhka menua Sarawak, tauka bekaul enggau ngaga tekat Baram?
Gerempung BMF udah nya majak minta mayuh agi penampak diayanka lalu mega minta Hydro-Tasmania bekaul enggau atur sida ti nyali bala pengereja pengawa bekereja di Sarawak. Penerang pasal Andrew Pattle, baka ti bisi ayan dalam laman web “LinkedIn” iya berupai bendar belaban reti enggau penerang media ti dipansutka tuai iya dalam Hydro-Tasmania ba minggu nyin kemari.
Bala raban NGO mega bisi betanyaka nama kebuah CEO Hydro-Tasmania, Roy Adair, mengkang melakangka Idris Buang dalam penerang iya bekaul enggau Sarawak. Enti Roy Adair kala udah macha enggau silik tauka lenak semua isi Atur Pengentap Pendiau (RAP) baka ti direpotka ngagai perintah Sarawak bekaul enggau projek Murum, iya tentu deka nemu sekeda penanggul ti ditapi bala orang ari raban bansa asal ba pengawa sida ti ngulihka kad pengelala diri ngambika ulih dikena sida ngundi ngelaban atur perintah ti ngerusak pendiau enggau pengidup sida nya.
Roy Adair – CEO Hydro-Tasmania. Diatu iya patut ngetu bejaku durah-durah tang belabuh muka pending iya ningaka penemu orang bukai
Diatu bisi seraban orang bansa asal ti mimit agi tubuh ti benung napi empas ari projek tekat ai nya dikemendarka perintah Taib Mahmud nya ngundi, taja pan sida nya bebendar udah nguji ngulihka kuasa sida dikena sida ngundi.
Tu udah nyadika sebengkah skandal lalu bala pemesai dalam Hydro-Tasmania patut ngetu bekelulu ngumbai semua kontrak sida nya betul sereta nengkeman, lalu sida mega patut ningaka jaku bantah bekaul enggau pengawa sida di menua Sarawak ti mega bebalut enggau penyalah makai suap ti tau mai pengerusak ke menua.
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.