Matak Diri! - Hydro Tasmania Deka NINGGALKA Menua Sarawak EKSKLUSIF!

Roy Adair ngamatka penerang pasal kompeni iya ti deka matak diri lalu ninggalka menua Sarawak

Sarawak Report kemari udah diterangka ti endur seraban bala pejuang kempen diatu tau beselamatka pemenang sida udah bekau kepala eksekutif ke Hydro Tasmania, Roy Adair, udah mansutka penerang ti madahka kompeni iya deka matak diri ari pengawa sida mantu ngemansangka program ngaga tekat-tekat hidro-elektrik ti besai-besai ke perintah BN Sarawak ti betuaika Abdul Taib Mahmud.

Roy Adair, dulu suba kala madahka pengaga ati diri ke kaul dagang entara kompeni iya enggau kompeni Sarawak Energy Berhad (SEB) mantu ngaga 50 buah tekat dikena nyukung pengawa ‘gudang’ SCORE, diatu udah madahka nadai siku ari bala pemesai sida deka tinggal sereta bekaul enggau sebarang projek datai ba ujung taun 2013 ila.

Jaku semaya Hydro Tasmania nya dipansutka ba sebengkah aum begulai enggau bala pejuang kempen Save Rivers ari menua Sarawak ti diatur di nengeri Launceston, Tasmania kena hari Satu tu tadi.

Kepala Eksekutif sida ngamatka penerang tu, ti endur semua tang semina empat iku ari sida pengurus kanan ti udah dijali sida ngagai projek hidro-elektrik di menua Sarawak, deka diasuh pulai datai ba ujung taun tu, lalu empat iku sida nya enda tau enda nembuka laluh pengawa bekontrak sida.

Seraban delegasi ari gerempung Save Rivers Peter Kallang enggau Tuai Raban Bansa ari Baram James Nurang sama enggau MP ari Parti Green, enggau siku pemacha berita ke Radio Free Sarawak Peter John Jaban

Penerang nya nyadika pengawa matak diri beraban ti besai ari batang pengawa sida baka ti disebut Roy Adair, lebuh iya ti ditanya pengari stesyen TV Dateline ari Australia ba pun taun tu tadi. Lebuh iya ke ditanya maya nya suba, Roy Adair udah madahka pengaga ati diri ba kaul kompeni iya dalam pengawa ngaga tekat ai ke perintah Taib Mahmud ti deka ngujungka rampa menua deka ditiki ai tekat lalu ngerusak pendiau enggau pengidup bepuluh ribu iku orang ari raban bansa asal di menua Sarawak.

Kepala Eksekutif nya mega muji kompeni SEB ti enggi perintah Sarawak lalu mega ti betuaika petunggal Taib Mahmud, iya nya Abdul Hamed Sepawi, ketegal ‘standard pengawa dagang ti pemadu manah’ enggau mega pemanah ‘standard atur pengelikun ti tinggi’!

Tang, sehari tu Hydro Tasmania udah madahka sida enda agi rindu ngulihka ‘pun peluang’ tu lalu sida udah alah ba kayau propaganda ngelaban orang bansa asal ngambika projek ngaga tekat ai Taib Mahmud nya terus diketuka.

Betanya meh ba orang bansa asal tu – Gerempung Save Rivers ti disukung lebih 50 buah gerempung NGO ari serata dunya diatu udah menang dalam kayau propaganda ngelaban Hydro Tasmania ti udah kelalu balat ‘ngena peluang ti manah’ di menua Sarawak

Berita pasal kaul Hydro Tasmnia dalam projek besai SCORE enggi Taib Mahmud berengkah enggau filem renchana ti diayanka dalam program TV Dateline, ti udah nya lalu ngeruga runding mensia mayuh ti endur sida irau bendar ba projek hidro-elektrik, lalu pia mega ngemunka mayuh bengkah jaku tanya ba pemanah standard-standard baka ti disebut Roy Adair.

Mangku pengawa ngatur pemindah raban orang bansa asal ti tanggul laban projek tekat ai – Nick Wright balat nerima jaku kutuk orang di Murum

Program TV nya udah ngayanka baka ni perintah menua Sarawak melakangka pengelantang pendiau raban bansa asal di Batang Ai enggau di Bakun lalu penanggul-penanggul nya diatu tampak di menua Murum enggau di Baram.

Dateline mega ngeripotka pasal penyalah makai suap ti ngeirauka ati ti majak dikereja di menua Sarawak baka ti balat dikereja Kepala Menteri Pehin Seri Abdul Taib Mahmud enggau sida sebilik. Sama bisi diripotka dalam program TV nya mega iya nya Pengerusi SEB ti mega nyadi Pengerusi enggau Pemegai Share pemadu mayuh dalam kompeni-kompeni kayu batang di Sarawak enggau ba kompeni Ta Ann, iya nya Abdul Hamed Sepawi, ti mega bisi kaul dalam penanggul pengawa ngulihka kayu batang di menua Tasmania.

Program nya udah bulih timbal ari Hydro Tasmania, ti udah nya madahka pengawa sida di menua Sarawak semina mimit aja, lalu sida enda tau dikaitka dalam penyalah ngelanggar undang-undang ti dikereja SEB.
Tang pansik-pansik ba ‘pengawa mit’ baka ti disebut nya terang bendar nunjukka Hydro Tasmania enggau Opis Kuasa Elektrik di Tasmania udah ditemu nyali bala pakar hidro ngambika mangku pengawa dalam SEB ba sebengkah atur ti dikumbai sida “pengawa-pengawa pengurusan ti kritikal”.

Hydro Tasmnia udah ngamatka penerang ti madahka penyampau tubuh bala pemesai sida ti dijali sida bekereja dalam SEB nya bisi 12 iku.

Agih pengawa udah ditetapka ngagai 30 iku bala pengereja pengawa ti baka nya (dikena nambahka penyampau pengereja ari menua Norway ti dibai tama ke dalam SEB betuaika CEO Torstein Sjotveit, ti nerima gaji nyentuk ke USD$4 juta dalam setaun).

Perambu pengawa besai ti udu charut – Sebengkah agi kompeni ti udah ngelala bekunsi ngereja pengawa dalam SCORE enggi Taib Mahmud nya sebengkah penanggul

Tambah mega, ba repot taun sida ti diayanka sida dalam laman web sida, SEB udah nyebut pengawa dagang kunsi sida enggau Hydro Tasmania nya sebengkah atur ti “enda tau enda” dikena ngemujurka SCORE.

Tang kemari, Roy Adair udah madahka SEB nya “sebengkah silap” lalu pengawa Hydro Tasmania udah enda dipeguna agi! Terang bendar meh kompeni, ti dulu suba madahka pengaga ati diri nyadi sebagi ari projek SCORE, diatu udah enda rindu dikumbai nyadi pangan dagang kunsi.

Tu meh kebuah Abdul Taib Mahmud udah nujuka serang ba minggu siti nyin kemari ba utai ti dikumbai iya Sabotaj Ekonomi, enggau chara nuduh gerempung-gerempung NGO ari menua tasik ti seruran betanyaka pemanah perambu ti besai-besai lalu muru kompeni menua tasik baka sida Hydro Tasmania.

Kepala menteri Sarawak nya belabuh nyerang udah bekau iya nerima berita pasal siku pemesai ti mantu dalam projek di Murum, Baleh
enggau Baram, iya nya Andrew Pattle ari Hydro Tasmania, ti enggau enda mukai-mukai udah ngelekaka pengawa lalu pulai ninggalka menua Sarawak!

Empang jalai di Murum didirika dalam pengelama 6 minggu dalam bulan September-Oktober

Tang, Kepala menteri Sarawak nya nyadika orang ti patut dipesalahka dalam pekara tu.

Sehari tu bala pejuang tau beselamatka pemenang sida ngelemika jaku penerang Roy Adair pasal standard-standard tinggi enggau atur beintegriti di menua Sarawak. Penyalah makai suap enggau pengerusak ke rampa menua di Sarawak baka ti dikereja Abdul Taib Mahmud udah suah bendar direpotka raban NGO ba ikas entarabansa.

Penemuai gerempung SaveRivers ke Australia dua minggu tu udah udah narit focus mensia mayuh, gerempung berita, enggau NGO bukai, dikena ngenegapka agi repot bekaul enggau pengawa orang asal nirika empang jalai di Murum enggau di Baram, ti ngelama tu udah merinsa laban peminta-peminta sida enda dikibuhka.

Siku ari pemesai ti dijali Hydro Tasmania, Nick Wright, ti mangku pengawa ngemataka Atur Pemindah enggau Pengentap Pendiau dalam pengelama dua taun sebedau ngisi tekat Murum, bala Penan ti dituntung penanggul udah mansard diri nirika empang jalai dikena sida mantah pengurang ba jurai enggau mayar pampas enda baka ti dituliska dalam Atur Pemindah enggau Pengentap Pendiau nya, ti udah tiris lalu enda senutuk enggau atur-atur entarabansa.

Siku agi pemesai sida ti benama Andrew Pattle, udah ditemu bejalai matau menua di Baram laban deka ngulihka sukung raban bansa asal besetuju ninggalka menua sida dikena meri awak ngagai projek tekat ai.

“Bala orang menua Tasmania mengkang enggau kita” – Kepala parti Green, Christine Milne, muji raban ari Save Rivers di Hobart ti minta kompeni Hydro Tasmania pansut ninggalka menua Sarawak

Sehari tu gerempung Save Rivers udah ba hari ti penudi kempen sida di Hobart lalu dibai mendingka sara aum dalam Parlimen menua nya pasal pengawa Hydro Tasmania di Sarawak.

Sida udah betemu enggau kepala parti Green, Christine Milne, ti sama enggau sida ngansak Hydro Tasmania dikena ngenataika jaku pesan ngagai Taib Mahmud nya sida ninggalka menua Sarawak.

Bekempen di Tasmania – berandau enggau pengari media

Juluk ati Save Rivers nya terang benar. Sida minta kompeni Hydro Tasmania enda tau enda badu bekaul enggau perintah Taib Mahmud ti korup ba projek ngaga tekat ai ti udu dibalut penyalah makai suap. Sida mega minta penerang pasal atur pemansut bala pemesai Hydro Tasmania sebedau ujung taun tu enggau sebarang sapa ari raban ari kompeni nya ti agi tinggal di menua Sarawak mantu Taib dalam SCORE dalam pengelama 12 bulan ti deka datai.

“Ke bendar iya, kami minta semua sida nya badu bekereja lalu pansut ninggalka menua kami diatu” pia ko jaku siku ari pejuang gerempung Save Rivers nya sehari tu tadi.

Bala pemesai Hydro Tasmania ti bekereja dalam SEB iya nya:

Miles Smith (Sapit Presiden, Kepala Perancangan enggau Strategi); Graeme Maher (Pengurus Kanan, Pemansang Kuasa Hidro); James Hannon (Pengurus Kanan, Atur Kontrak) and Nick Wright (Sapit Presiden, Komunikasi Strategik enggau CSR – betanggungpenagawa ba atur pemindah enggau pengentap pendiau).

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments