8 Dec 2012

Taib Belabuh Ngulihka Minyak Di Sarawak!

This post is also available in: English, Malay

Peluang ngilah tebing! – Malaysia udah nginsap kesemua minyak enggau gas menua Sarawak, tang rezab minyak enggau gas menua Sarawak deka diinsap Taib Mahmud

Udah setaun dulu ari tu Sarawak Report kala nusui pasal Taib enggau kroni iya Tiong Hiew King udah belabuh begigaka rezab minyak enggau gas di menua Sarawak.

Diatu jaku penerang pasal pengawa nya udah belabuh dipansutka!

Kompeni RH Petrogas ti enggi Tiong Hiew King udah mujur bulih 80% ari semua share dalam dagang kunsi enggau Petronas bejalaika pengawa ngulihka minyak enggau gas ba telaga SK331 di Balingian, 11,600 kilometer pesegi.

Raban bansa asal nguan menua nya ti udah lenyau kampung enggau temuda sida udah ti ditebang lalu dibukaka nyadi kebun sawit dandang besai diatu deka napi penanggul kamah rampa menua ari industri minyak enggau gas nya ti nyadi sebagi ari telaga minyak enggau gas ngilah tebing tasik Bintulu.

Raban bansa asal nya nadai bulih sebarang penguntung ti nyata ari asil bumi menua sida. Rekod-rekod ti lama udah nyadika penerang ti madahka mayuh agi penguntung ari pengawa ti baka nya deka pulai ngagai Taib Mahmud enggau sida sebilik.

Pengerusak di Balingian – sitak bepilihbesai Taib Mahmud empu

Dalam kandang taun-taun 1980, Taib Mahmud ti baru mangku pengawa nyadi Kepala Menteri udah bejuraika atur pengawa dagang ngulihka minyak Sarawak enggau menua Malaysia.

Taib Mahmud udah ngumbai diri endang patut nyadi kaya raya dalam pengelama 30 taun udah bekau iya betebangka kampung di menua Sarawak

Ke terubah iya suba iya udah besetuju ngemendarka Perintah Besai ngulihka SEMUA asil minyak enggau gas ari Sarawak, amat meh iya bulih pemendar ngeluarka lisin nebang kampung enggau muka kebun sawit dandang besai!

Udah nya, iya bisi nyima ketegal pengeringat bala penyukung iya, ti endur iya pulai ke Sarawak lalu madahka menua Sarawak  enda minta tambah ba pemayuh royalti minyak 5% ti diulihka ari menua Sarawak empu.

Tang ba maya nya iya udah mujur nentuka semua pengeraja iya enggau chara beambi ulih ba industri nebang kayu kampung enggau muka kebun sawit nya udah numbas pemayuh ke guna iya empu, lalu udah nya besetuju ngelepaska beratus ribu juta ringgit baka nya aja ti patut tau dikena iya ngubah pendiau enggau pengidup rakyat iya empu.

Uji kitai beratika penyamai orang di menua Brunei ngidupka diri, dibandingka enggau pengidup di Sarawak.

Lengis, nadai utai agi tinggal – tanah iya tu udah abis tekeliti. Siku ari pengundi Taib di sitak Balingian.

Rambau nya suba, pengeraja menua Semenanjung Malaysia ti begela “Rimau Pengawa Dagang Menua Asia” endang bepanggai bendar ba pemujur iya nerumpak asil menua Sarawak enggau Sabah.

Taib Mahmud udah bulih puji ti tinggi ari Tun Dr Mahathir Mohamed, Menteri Besai Malaysia maya nya, laban udah mujur ngatur asil tanah menua iya empu, tang mayuh agi nya ke guna iya empu.

Beduduk ari nya, pengelantang pendiau bala orang Malaysia ari asil minyak enggau gas Sarawak, raban bansa Dayak di Sarawak empu nyau nyadi makin merinsa sereta suntuk.

Dua bengkah menua Malaysia Timur nya, ti dulu suba kala dikumbai nyadika menua pemadu kaya di Malaysia sebedau begempung enggau Tanah Melayu dalam taun 1963, diatu ngembuan pemadu mayuh tubuh rakyat ti suntuk dalam serakup Malaysia.

Abdul Taib Mahmud ukai siku ari bala orang Sarawak ti suntuk nya, tang iya udah nyadika siku orang ti pemadu kaya di pelilih Asia Tenggara. Enti pengawa iya nya “Kepala Eksekutif (CEO) Sarawak”, nyangka laban iya endang mangku pengawa nyadi siku ari CEO ti udu ngelakar bala pelabur iya!

‘Sir’, Datuk Tiong Hiew King
‘Tuan’, Datuk Tiong Hiew King

Siku ari bala pemayuh kroni ti endang bebakih bendar enggau Taib dikena iya ngulihka peluang di Sarawak, Tiong Hiew King, udah nyadi orang ti signifikan dalam beberapa taun tu.

Kompeni Rimbunan Hijau enggi Tiong Hiew King udah bulih mayuh penguntung ari lisin ngulihka kayu batang, nyadika sebengkah kompeni ti dikerinduka Taib Mahmud sebilik.

Udah nya Rimbunan Hijau bulih sebengkah kandang endur muka kebun sawit ti besai bendar diberi Taib. Kandang-kandang endur nya dijual nengah bala menyadi tauka nengah sida sebilik, dikena nentuka semua sida nya bulih perepasan beratus ribu ringgit ari pengawa jual beli tanah temuda nya.

Beserimbai enggau nya mega, Rimbunan Hijau udah ditemu nyadika sebengkah kompeni kayu batang ti pemadu rangka di dunya tu, ari ti ngeruga kampung di menua-menua Papua New Guinea, Pulau-Pulau Solomon enggau ba endur bukai. Ba beberapa taun tu Tiong belabuh meli telaga minyak di sebelah menua-menua nya.

Enggau nya, kitai enda tentu tekenyit ninga cherita ti madahka RH Petrogas nya udah nyadika lubang belanja Taib ari lisin ngulihka minyak iya.

Perengka Tiong di menua Indonesia. Bisi utai baka tu kini orang di menua Balingian ila?

Peluang ti baru tu udah dikena Taib nguasa lisin-lisin ngulihka minyak enggau gas ba darat Sarawak, bebanding enggau ngilah tebing tasik Sarawak. Nitih ke sempekat, Taib patut nguasa semua utai ti ba atas darat menua Sarawak empu (seagi-agi iya nyadi Kepala Menteri).

Tiong bisi ditemu ngupah siku eksekutif ti kala bekereja enggau Petronas suba, ti bisi bulih penerang ti beguna pasal rezab minyak enggau gas, lalu angka kira-kira pekara belanja RH Petrogas udah terang bendar nunjukka orang ti megai share pemadu mayuh dalam kompeni nya, Tiong Hiew King empu, udah besedia deka meli semua telaga minyak nya.

“Kompeni awam” di Singapura. Tang sida Tiong sebilik bisi beempu mayuh agi share enggau anak kompeni dalam RH ti bepalan di luar menua British Virgin Islands.

Enggau nya, Taib ti nyadi sebagi ari orang dalam jurai pengawa nya, kroni iya, Tiong, udah mujur bulih pegai ba share ti pemadu besai ari lisin nya. Enggau nya mega, bala orang Sarawak patut diberi kuasa nemu enggau silik ni pemayuh untung pulai ngagai sida Taib sebilik, lalu berapa iti share ti enda ditemu ti deka dipegai bala pengari sida dalam pengawa dagang kunsi enggau RH Petrogas?

Kelalu mayuh bala pemegai share ti enda dikelala. Dulu suba sida Taib sebilik nyadika seraban orang diri sebilik ti megai share pemadu mayuh dalam kompoeni Jaya Tiasa enggau anak kompeni Rimbunan Hijau ti bukai.

Pekara ti besai agi reti nya, sekali mensia mayuh kala diterangka pasal pengelepas reta menua baka ti dikereja Perintah Menua Sarawak tu? Nama bansa jurai penemu dalam rumah DUN Sarawak ke sebengkah perintah ti seruran begendangka diri bejalaika atur demokrasi ti amat?

Gambar pendiau ti suah dipeda dini-dini endur di menua Sarawak

Terang bendar mensia mayuh di Sarawak endang bedau dipadahka pasal pengawa dagang ti bansa tu. Jaku penerang pasal pengawa dagang tu lalu bedau ditusui dilah BN, iya nya Borneo Post, lalu nambahka nya BP lalu mengkang bedau nusui pasal telaga minyak ba darat ti keterubah di Balingian, ba sebarang suratkhabar. Pekara tu mega lalu bedau dipejuraika dalam sebarang randau politik.

Enggau nya, mujur tauka enda menua Sarawak bulih untung ari lisin nya, dikena mantu bala rakyat Sarawak lebuh maya penyuntuk baka ke diatu? Udah tauka bedau Taib bejalaika tender enggau chara ti lurus sereta terang, ngambika kitai sama nemu berapa pemayuh asil ti dibayar sida Tiong ngagai menua Sarawak?

Bala pemacha Sarawak report enggau orang bukai udah idup dalam pemerinsa dalam pengelama 30 taun dalam perintah Taib ti dibelit penyalah makai suap, deka nemu enda lama agi.

Nambah ke nya, pengeraja Bumi Kenyalang udah dikeruga Raja Buk Burak enggau bala bakih iya ti rangka.

Sebagi ari gamal rumah orang di menua Brunei, ti endur asil minyak menua nya endang ditagaka dikena ngangkatka pemanah pengidup bala rakyat sida ti suntuk. Nasib ti baka tu nadai dipeda di menua Sarawak

Sign up to receive regular updates from Sarawak Report

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments