Latest Stories
Sections
Dini endur duit nya, Taib? – Menteri Pekara Belanja/Kepala Menteri/Menteri Perambu Pengawa Sarawak dalam kerita Rolls Royce ti dikerinduka iya.
Penerang ti majak betambah pasal ikas penyalah makai suap Malaysia ti majak niki di mata dunya udah nambahka jaku tanya bala orang ke kompeni-kompeni entarabansa ti deka beentaruhka pemanah nama sida masuk pengawa dagang enggau Abdul Taib Mahmud.
Ambi ke banding, pengari DAP udah sekali agi narit timpai mensia mayuh ngagai Lupak ti bisi dalam akaun awam ti dikeluarka di menua Sarawak bedau tentu lama tu udah.
Penyampau ti disebut nya manggai RM11 billion duit awam ti lenyau enda temu penunga lalu nadai diterangka ti nyadika 50% ari kesemua bajet menua Sarawak kenyau ari 8 taun tu udah!
Nama kebuah Abdul Taib Mahmud, ti nyadi Menteri Pekara Belanja lalu mega Kepala Menteri, udah enda mujur nerangka kini penunga pengelenyau semua duit nya?
Dua taun ti udah, belanja ti enda dikira nya bisi kusut ari setengah penyampau nya ba RM4.6 billion, lalu nama utai ti udah dikereja Taib enggau duit ti ngemayuh nya, lalu ni maya pengawa nya deka diketuka?
Agensi-agensi ti dikemendarka?
hong Chieng Jen ari DAP udah mujur nunjukka lapang ti ayan dalam bajet menua Sarawak.
Baka ti udah dirara DAP, Taib Mahmud nadai nyerangkum RM11 billion ke dalam kategori ti nyelai sereta ngalitka ati dalam bajet ti benama “Pemeri Ari Perintah Ke Tabung Agensi-Agensi Ti Dikemendarka”.
Nadai mega diterangka nama bansa agensi-agensi nya, nama batang pengawa sida nya tauka sapa ti ‘ngemendarka’ penumbuh sida nya. Sida nya tentu ukai dikemendarka Dewan Undangan Negeri.
Sekali ke perintah bukai bisi ngagihka duit ti baka nya dalam akaun sida? Nadai.
Atur perintah ti lurus enda begunaka tabung nyelai ti dilalaika lalu bisi nama ti nyelai-nyelai ti endur setengah ari wang simpan dipasukka kia enggau enda ditemu penerang. Sida dikarapka nerangka semua pekara belanja sida, ngambika semua orang nemu enggau terang baka ni pejalai belanja sida lalu duit simpan sida nya enda dichuri sapa-sapa.
Tang Taib Mahmud seruran ngumbai diri tau ngereja sebarang pengawa nitihka peneka diri empu di menua Sarawak. Iya mega ngumbai diri ulih nyuap semua pengundi ba tiap kali bepilihbesai, awakka sida ngemendarka iya nerumpak menua sida. Perintah Besai udah enda mujur nagang pengawa Taib, laban sida mega udu makai suap sebaka enggau iya.
Lalu kitai mayuh tu ditejuka ngaga mayuh macham peragam enggau pelaba. Engka “agensi-agensi ti dikemendarka” nya bisi ngeluarka bantu ngagai raban orang ti seranta di Sarawak, ti suah meratika kampung sida dikeruga, batang sungai sida nyadi kamah lalu tanah sida dirampas dikena orang muka kebun dandang besai? Tang nadai penerang ti nyengala pasal semua utai tu, nyengkaum jalai, sekula enggau klinik pengerai.
Engka, kelimpah ari nya, “agensi-agensi ti dikemendarka” tu bisi ngisi belanja ke dalam projek-projek ti dipejalaika kompeni-kompeni enggi Taib Mahmud sebilik?
Engka nya reti ti bendar “politik pemansang” ti dipejalaika di menua Sarawak?
Belalauka isu-isu nya, nama kebuah agi mayuh kompeni-kompeni entarabansa ti tebilang besetuju deka bedagang enggau Taib, taja pan Bajet Menua Sarawak udah terang bendar bisi penimpang? Pekara tu udah narit perening raban ari entarabansa lalu nyadika isu ti tau ngirauka ati.
Kroni dagang Taib ba ikas entarabansa
Kompeni pengelebur alumimnum Rio Tinto Alcan matak diri ari SALCO, kompeni RM2 enggi Taib ti nyadang diri deka ngulihka puku dagang RM2 billion.
Bisi rintai nama kompeni entarabansa ti panjai besedia deka bedagang enggau menua Sarawak lalu mega enggau kompeni enggi sida Taib Mahmud sebilik, tang penaluk sida semakin kurang udah bekau but penyalah sida dibantaika. Lalu mega diatu undang-undang dikena ngelaban sebarang penyalah ngulihka untung enggau chara ti salah semakin terit.
Beberapa buah kompeni udah dikangauka ngambi bagi bedagang dalam SCORE lalu mega ngulihka kontrak ngaga tekat-tekat hidro ke Taib, tang mayuh agi kompeni nya diatu berunding dua kali. Ba bulan Tiga nyin kemari kompeni Rio Tinto Alcan udah narit diri, sepengudah kami ti ngayanka sida merambu deka beranakka puku RM2 billion dalam kompeni SALCO enggi sida Taib sebilik.
Lalu dalam bulan Dua-belas tu tadi kompeni Hydro Tasmania ari Australia mega udah mutuska runding sida badu ngaga kaul dagang di Sarawak udah sida napi bantah raban bansa asal ti ngenggaika projek tekat hidro ti enda nengkeman nya. Perati mensia mayuh ba ikas entarabansa diatu ditujuka ngagai bala orang ti bedagang ti deka beranakka puku dalam SCORE.
Pia mega raban institusi duit jali. Bank HSBC ari menua UK udah dikusaika raban NGO Global Witness, laban nyali duit ngagai pengawa ngulihka kayu batang di Sarawak, taja pan mensia mayuh nemu lisin ngulihka kayu batang nya salah lalu dikaitka enggau Taib Mahmud lalu pengawa ngulihka kayu ngerusak rampa menua lalu ukai sebengkah pengawa ti meruan.
Deutsche Bank mega, ukai semina nyadika endur nyimpan duit enggau reta pengeraja ke sida Taib sebilik tang bank nya nyadi pangan dagang kunsi ke Kenang Holdings Sdn Bhd.
Deutsche Bank – atur pengawa dagang iya enggau Taib sekali ke dagang nengali tauka dagang sama.
Kenanga Holdings nya sebengkah dagang ti enggi sida Taib sebilik nengah kompeni sida sebilik, CMSB begulai enggau Deutsche Bank empu. Diatu pejalai bank nya benung dipansik opis-opis ti bekuasa di menua Jerman.
Lalu baka ni kompeni Ernst and Young, ti nyadi kompeni ngemataka kira-kita CMSB ti dipeda baka ke menuku ninting taun, taja pan CMSB bejalaika pengawa dagang nengali atas semua pengawa dagang enggau gudang di menua Sarawak?
Kami udah bekirumka mayuh emel ngagai Ernst and Young betanyaka baka ni Atur Pengelurus Pengawa sida nya dipejalaika, tang semua emel kami nya nadai udah dibalas sida.
Udah nya kita meratika bank UBS ari menua Switzerland ti bisi bekaul, sekali agi, enggau Deutsche Bank, dalam pengawa sida nambahka beratus juta dollar ngagai menua Sarawak nengah sebengkah kompeni di Labuan, ukai enggau chara ti biasa. Diatu mega bank UBS benung dipansik di menua Switzerland ketegal penyalah ngemataka akaun beratus juta dollar duit ti dikaitka enggau Kepala Menteri Sabah, Musa Aman.
Nyerumba nya, kompeni Goldman Sachs ari menua US diati bisi kaul nyadika juru wang dikena nambahka duit ngagai rejim perintah Taib, sekali agi nengah kompeni di Labuan ngena atur pengawa ti sebaka.
Lalu kami mega kala nerangkaka enggau silik baka ni sebuah agi bank besai ari menua US, Merril Lynch (diatu udah nyadi sebagi ari Bank of America), udah mantu mindahka duit ti mayuh bendar ke menyadi Taib, Onn Mahmud, siku orang ti bulih dagang nengali ngangkut kayu ari Hong Kong ke Sydney.
Onn Mahmud ti menyadi Taib Mahmud, tang Merril Lynch mantu iya ngelalaika penerang pasal duit beratus juta dollar disimpan iya di menua Isle of Man enggau di Cayman Islands.
Onn Mahmud udah mujur meli reta tengkira ti manggai £50 juta di nengeri Sydney lalu udah nya nyual baru reta nya ari bantu Merril Lynch ti mantu iya nganjung duit nya ngagai sebuah bank ti Isle of Man nengah mayuh bengkah kompeni ti dikorpratka Merril Lynch ngarika Onn Mahmud di Cayman Islands.
Baka tu atur pengawa bank ti lurus sereta manah?
Perening dunya diatu betumpu ngagai kompeni-kompeni ti seruran madahka beratus juta dollar ti ulih sida nya ulih dikena nyuap orang baka ti suah dikereja Taib Mahmud.
Agi mega, enti bala orang Taib enda agi bechaya ke iya bejalaika pekara belanja menua, nama kebuah orang ti deka beranakka puku tauka bedagang enggau bank-bank agi deka arapka iya?
Raban orang ti ngaga pemutus runding sida nya diatu benung diasuh bebasaka pengelurus.
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.