Baka Ni Mayau Gemu Kepala Raban ‘Nembiak’ BN Nyadi Kaya Raya Ari Lisin-Lisin Berikan

Radin Kadri Radin Budiman – Kepala Raban Nembiak BN ti semakin berubah tuai umur!

Radin Kadri Bin Radin Budiman udah kelalu taluk ngagai BN ari ti mangku pengawa nyadi tuai ‘raban nembiak’ taja pan diatu umur iya udah manggai 47 taun.

Iya udah nyadi tebilang nyadika pengari ti panchar bendar bejaku, lalu seruran ngumbai diri bejaku ngarika raban nembiak Sarawak, tang iya berupai agi bejaku baka orang perintah.

Nyerumba nya, taja pan iya nyadi siku kaban PBB ti sumbung lalu chakah bendar ngutuk bala “penyual” parti, tang Radin Kadri diatu nyadika orang ti kena tuduh ba tengah-tengah pekat ikas tinggi ti deka numbangka Presiden PBB, Taib Mahmud, niktihka penerang dalam surat dossier ti dikirumka beberapa iku sida Taib Mahmud sebilik.

Batang pengawa Radin Kadri nya dipejalaika nengah penumbuh raban “Gelumbang Biru” ari raban penyukung PBB empu, ti dipelabaka bisi dibayar pampas ngambika sida nya bebaris di belakang pampang Pemuda ti deka ngayanka diri lebuh maya rampas kuasa dikereja Menteri Pengeraja Asal enggau Rampa Menua kedua, Awang Tengah ila.

Nitihka pun penatai berita ti tau dikarapka, Radin Kadri disebut kala nerima agih belanja bejuta-juta ringgit dikena iya ngelatih bala nembiak ngambika ngayanka sukung sida ngagai bala orang ti bepekat datai ba maya nya ila. Penatai sida ti sebaka enggau gaya soldadu nya udah mai pengirau ati ba raban pemesai dalam perintah.

Ngayanka pengering sida? – Radin Kadri nyadi tuai raban Bebaju Biru bebaris di sebelah nengeri Sibu dalam taun 2011 suba.

Nyerumba nya kami ulih ngayanka baka ni mayau gemu BN tu udah mujur nugungka pengeraja ke iya empu dalam beberapa taun tu aja, ngena sebengkah chara ti sebaka dikereja raban kunchu Taib nguna asil menua tu enggau rakyat sida.

Radin Kadri bebini jadi enggau raban kaban politik BN ti mega nyadika kroni ke Taib Mahmud, Effendi Norwawi, ti kala nyadi Menteri Betanam-betupi dalam taun 1999 suba.

Ba taun nya mega kompeni Noble Mermaid Sdn Bhd enggi bini Radin Kadri ti benama Raden Siti Noralem Binti Radin Ibrahim udah mujur bulih enda kurang ari 40 iti lisin bejalaika kapal berikan tasik dalam ari opis Menteri Betanam-betupi nya.

Endu Raden Siti Noralem enggau laki iya Radin Kadri udah nyadi orang ti bempu dagang ti mujur bendar – laban kompeni sida nya, Noble Mermaid udah bulih enda kurang ari 40 iti lisin bejalaika kapal berikan tasik dalam enggau pechuma ari nengeri Sarawak!

Rega semua lisin nya, nitihka penerang kami nya diberi enggau pechuma ari perintah BN, tinggi bendar. Radin Kadri enggau bini iya udah minta bayar ti tinggi ari sebarang sapa ti begunaka lisin nya.

Enggau nya ngaku bendar tukuh tubuh Radin Kadri ti segala sereta buntu nya sebaka enggau pemayuh penguntung ari ti bedajaka lisin berikan nya. Dua juta setengah ringgit udah mujur diulihka siku orang ti bulih lisin ari perintah BN.

Radin Kadri atas penyangkai kapal begulai enggau bala orang berikan.

Taja pan baka nya, nadai mayuh orang Sarawak bepeluang bekereja dia.

Dikaitka enggau Radin Kadri lalu nyadika Sekretari dalam kompeni Noble Mermaid Sdn Bhd nya siku agi orang besai PBB, ti kala nyadi Chairman dalam Sarawak Tribune, iya nya Awang Bemee Bin Ali Basah, siku pengari rakyat ke kerusi Nangka dulu suba.

Kedua-dua iku orang tu bisi kaul enggau Awang Tengah, ti seruran ngumbai bala pemetenah enggau Radin Kadri ditemu bisi ngemansangka juluk ati politik enggau pekat dikena ngulihka kerusi sitak Nangka enti pekat ngerampas kuasa ari Taib dikereja Awang Tengah nya mujur ila.

Awang Bemee benung mangku pengawa nyadi Sekretari dalam kompeni Noble Mermaid Sdn Bhd.

Ngayanka penaluk ngagai semua orang – bala kaki sagu dalam BN.

 

 

Sari tu Awang Tengah enggau raban penyukung iya udah didinga nengah pengerembai berita ti ngumbai repot pasal konspirasi nya enda betul. Dikena iya nyukung bantah iya, iya mega didinga nyagu-nyaguka kepala iya, Taib Mahmud lalu ngumbai diri empu nya siku orang ti nadai juluk ati. Enti semua sentimen iya nya amat sereta bendar, iya patut nerima pemendar ti ngumbai orang dalam parti iya enda pechaya ke iya lalu mega ngumbai Awang Tengah nya udah nganti 20 taun gintir diri nyadi tuai parti lalu nemu Taib nya enda ulih meruan nyadi tuai belama-lama.

Awang Tengah enggau bala penyukung iya udah saru penemu lebuh sida ngumbai BN nya mengkang beserakup.

Laban semua orang di serata dunya tu udah nemu BN bisi penanggul lalu enda agi ulih beserakup tauka besepenemu enggau diri sama diri.

Ke bendar iya, bala orang besai-besaidalam BN udah betelisih penemu enggau pangan diri, lalu gerempung parti-parti dalam BN diatu udah mupuk-mupuk bepechah. Kepala Menteri udah puntan dalam pengawa iya berakupka semua parti ti charut nya.

Enggau nya, enti Awang Tengah enggau raban penyukung iya dekaka kitai tu arapka sida nadai ngembuan pekat dikena ngerampas kuasa ari Taib, enda ibuh meh sida ngumbai BN nya mengkang tegap sereta beserakup!

Diatu BN enggau Awang Tengah engka patut ngambi kira sekali ke sida ukai nurun ngagai perang ti salah. Sekumbang bala pemesai dalam BN besengki penemu dikena sida ngulihka penuduk dalam PBB, bala orang Sarawak mega benung ngiga runding dikena ngiga ubah sereta ngiga set-set perintah ti bukai dikena merintah menua sida!

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments