28 Jan 2013

Baka Ni Petunggal Taib Hamed Sepawi Ti Antu Buyu Nya Ditemu Ngelanggar Undang-undang Liberia!

This post is also available in: English, Malay

Antu buyu – Hamed Sepawi nadai guna-guna bekerugaka kampung di Liberia.

Petunggal Kepala Menteri Sarawak Taib Mahmud, iya nya Abdul Hamed Sepawi nya siku ari orang ti pemadu kaya di menua Malaysia.

Iya udah mujur bulih gela nya ketegal bulih mayuh lisin enggau konsesyen ngarika kompeni-kompeni iya empu ari perintah menua Sarawak, terima kasih ke pemutus runding ti manah Abdul Taib Bin Mahmud empu.

Hamed Sepawi udah mujur bulih lisin enggau konsesyen ngulihka kayu batang ti besai bendar lalu mega kontrak-kontrak ti mayuh nengah kompeni-kompeni iya baka Ta Ann, Sarawak Plantation, Naim Candera enggau Grand Perfect lalu mega enggau 84 iti agi kompeni iya ti bukai.

Semua pemeri ari perintah menua nya dikereja enggau chara ti ngasuh kitai alit ati, iya nya nadai berebut enggau sapa-sapa lalu mega nadai ditemu penerang sereta enda tampak ba orang mayuh baka ni penyampau bayar ti bisi dipulaika ngagai perintah menua.

Nya alai, kitai tentu enda tekenyit ati enti kitai meda Hamed Sepawi nya tau nyadi kaya raja lalu iya mega nyadika siku ari orang ti pemadu beguna dalam dagang petunggal iya empu, Abdul Taib Mahmud.

Agi mayuh, lalu ari ni penatai semua tu!

Tang pengeraja Hamed Sepawi ti ulih iya ari menua Sarawak nya enda chukup ba ati iya.
Iya udah ngerembaika genggam dagang iya ngagai menua bukai ti agi bisi laluh kayu kampung di serata dunya tu enggau chara nyuap perintah enggau raban orang ti rinduka rampa menua ti udah putus pengarap nyaga kampung enggau rampa menua sida empu.

Menua-menua nya nyengkaum menua Tasmania, ti endur kompeni iya (i.e. Ta Ann Tasmania) udah ngeruga pemutus Sempekat Kampung Australia, enggau mega di menua Liberia.

Ba bulan tu kompeni iya, Atlantic Resources Limited was diasuh Presiden menua Liberia badu agi ngulihka kayu ba konsesyen ti udah diulihka iya enggau chara nyuap tauka belalai di menua Liberia ngena Private Use Permits (PUP), iya nya sebengkah pemendar nebang kayu batang ke guna diri empu aja ti semina diberika ngagai bala orang bansa asal di menua nya.

Hamed Sepawi endang rindu bendar ke pun kayu – tang semina ke pun kayu ti udah ditebang lalu digaga nyadika papan lapis lalu udah nya ditukar nyadi mata duit.

Tagang ari perintah Liberia nya dikeluarka Presiden menua nya ba bulan Lapan taun nyin kemari ti udah nagang pengawa nyual keluar semua kayu ti udah ditebang Hamed ari semua konsesyen nya.

Tang taja baka nya, Hamed ti antu buyu nya udah ngelanggar undang-undang ti dipansutka Presiden menua Liberia nya.

Kejang deka datai ba musim Krismas taun nyin kemari gerempung NGO rampa menua entarabansa, Global Witness, udah nuliska repot pasal Hamed Sepawi udah mai pansut asil kayu batang enggau rega ti manggai bejuta-juta dollar ngena dua buah kapal, ti ditemu sangkai di menua India ba tengan bulan Duabelas nyin kemari.

Ari ulah iya nya, Hamed Sepawi udah mai penyaru penemu ba bala orang penerit undang-undang di menua Liberia ti endur sida sekali ke neritka undang-undang nagang pengawa nyual ke luar kayu batang sebedau Presiden sida mansutka jaku tagang iya dalam bulan Lapan nya.

Enggau chara nya iya udah mujur ngulihka penguntung ari nyual pansut kayu batang ti tinggi rega nya sebedau pengawa mansik dipejalaika atas baka ni iya ngulihka asil ngena atur PUP ti pelesu sereta kamah nya.

Sebaka enggau di Sarawak, Global Witness udah mujur nunjukka baka ni raban orang ti kena keruga sida Taib sebilik ti udu rangka nya endang orang bansa asal ti bempu rampa menua lalu mega rampa menua di serata dunya tu.

Nasit ti enda manah nuntung bala orang di Liberia nya sebaka enggau ti nuntung orang di Sarawak ketegal pengerangka Taib Mahmud. Hamed Sepawi udah merambu deka muka kandang menua ti udah ditebang nya nyadika kebun sawit bedandang besai.

Pugu proksi – Hamed Sepawi (kanan) udah dipaduka nyadi Chairman dalam kompeni Sarawak Energy Bhd dikena nentuka Taib bisi kuasa penuh atas perambu SCORE iya – lalu mega dikena nentuka semua kontrak ti besai-besai nya diambi kompeni-kompeni sida Taib sebilik.

Berita-berita ari menua Liberia nya udah ngangkatka jaku tanya pasal kaul Taib enggau gerasi kayu batang ari menua Sarawak empu, Samling, ti ngelama tu suah bendar udah mujur bulih konsesyen ti besai-besai di Sarawak.

Pansik-pansik rasmi bisi nunjukka baka ni kompeni Atlantic Resources Ltd enggi Abdul Hamed Sepawi nya udah mujur bendar nerima bantu belanja $60 juta ari Samling dikena ngulihka konsesyen-konsesyen ti besai bendar (disemaka enggau sebuah kandang menua mesai satu-perempat ari selampur menua Afrika nya).

Tang, penyelai iya, kompeni Samling nadai megai sebarang share dalam kompeni nya!

Bala orang ti bempu Atlantic Resources Ltd nya dua iku pemegai share dalam kompeni Perkapalan Damai Timur (PDT). Sida nya Hamed Sepawi empu enggau Wan Morshidi bin Tunku Abdul Rahman, siku nomini ke aya Taib ti mega kala udah nyadi Kepala Menteri Sarawak dulu suba, Tunku Abdul Rahman Ya’kub.

 

Asil duit suap? – nama kebuah bala nomini ari raban sida Mahmud sebilik nya, iya nya Kepala Menteri Taib enggau Tunku Abdul Rahman nya dipelanja kompeni Samling bejalaika pengawa dagang di menua Liberia

 

 

 

 

Jaku tanya nya patut dipansutka, nama kebuah Samling melanja Atlantic Resources Ltd ngena belanja $60 juta enggau enda begunaka bayar pulai tauka ngulihka untung ari share dalam kompeni nya? Sekali ke bantu belanja nya sebaka enggau duit suap dikena malas semua lisin tauka konsesyen ti diberi Taib ngagai Samling di Sarawak, sebaka reti enggau baka ni Samling udah meri dua buah rumah berega mar di menua Seatle USA, ngagai sida Taib sebilik? Buyu bendar ulah enggau pengawa ti baka tu.

Sign up to receive regular updates from Sarawak Report

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments