Latest Stories
Sections
“Sebaka enggau sida Abacha sebilik” – Bala MP menua Switzerland minta semua reta Taib di menua nya dibekuka ngena undang-undang.
Bala Kaban Parlimen (MP) ari Perintah Besai Switzerland udah saum penemu minta opis-opis ti bekuasa di menua nya mekuka semua reta simpan sida Taib Mahmud sebilik di menua nya, ngambika semua reta simpan nya tau diberi pulai ngagai peranak menua Sarawak.
Buah penemu nya ti digaga nyadika sempekat ti disain 22 iku kaban MP, nyemakaka Taib Mahmud enggau Presiden Sani Abacha ari Afrika ti udah ditemu nerumpak $5 billion ari menua Nigeria sebedau iya parai ketegal makai kelalu mayuh ubat peransang pengingin Viagra dalam taun 2011 suba.
Penerang pasal Taib ti dituliska bala MP Switzerland nya udah ngaga simpul penemu pemedis ati sida ke salah-guna kuasa ti dikena Taib nerumpak menua iya empu di Sarawak.
“Taib udah salah guna kuasa menteri iya nugungka pengeraja ke iya empu enggau ke sida sebilik enggau bala kroni politik iya nengah penyalah makai suap lalu netapka dagang nengali (monopoli) ti dikemataka bala sida sebilik enggau raban kroni iya. Pansik raban NGO nunjukka sida Taib sebilik bisi megai lebih ari 400 buah kompeni ba 25 buah menua enggau bank di menua tasik. Reta tengkira sida Taib sebilik dipelabaka lebih ari 20 billion Swiss Francs.
Tebal agi reta sida Taib sebilik nya datai ari pengawa salah ngulihka kayu batang enggau pengawa nyual kayu batang ke menua tasik” [Buah Penemu 12.4251 Dikena Mekuka Reta Taib di Switzerland – 14/Jan/2013]
Diatu bala tuai-tuai perintah iya ti udah diserang enggau jaku bantah ari pemesai-pemesai perintah menua luar enggau surat-surat penerang tau bendar meri malu ke menua Malaysia.
Carlo Sommaruga – Kaban Parlimen Switzerland.
Komplen jenayah
Buah penemu nya ti difailka sehari tu (Hari Sati 14hb Januari) udah diseretaka enggau sebengkah komplen jenayah ngagai Opis Lawyer Bansa menua Switzerland ti dianjung MP Carlo Sommaruga, ti ngelama tu seruran mantah pemayuh reta Taib ti nyelai di menua Switzerland.
Dalam komplen jenayah nya iya madahka sida Taib sebilik nya “sebaka enggau raban orang ti benama ti jai” lalu penerang nya begunaka pemendar perintah dikena ngamatka komplen nya.
Carlo minta ngambika semua reta sida nya dirampas perintah Switzerland nengah Artikel 72 undang-undang menua nya ti sama dikena sida ngemekuka reta Presiden Abacha suba.
Komplen jenayah dikena ngelaban Taib dikirumkia MP Carlo Sommaruga ngagai Lawyer Bansa menua Switzerland.
Penerang
Nyadika sebengkah penerang ti baru pasal reta Taib sebilik di Switzerland nya, MP Carlo Sommaruga bisi numpuka perati iya ngagai kes becharaka sarak di Kuala Lumpur entara anak lelaki Taib nya enggau bini dulu iya, Shahnaz Abdul Majid.
Ba batang penemu sida nya, bala MP nya madahka enggau nyemetak nya “siku ari sida Taib sebilik udah besumpah ba mua court di Malaysia dalam bulan Sepuluh 2012, madahka sida Taib sebilik ngembuan reta 100 juta dollar mata duit US ti benung ditanka di Switzerland tauka dalam bup akaun sida ba menua tasik ti dikemataka menua Switzerland”.
Penerang ari Shahnaz nya disukung bala orang ti mansik ti mega lalu diberi ngagai Sarawak Report, ti madahka:
“Iya bisi akaun duit simpan di Kanada, US, Caribbean, Peranchis, Monaco, Switzerland, Luxembourg, Malaysia enggau di Hong Kong.
“Pinta RM100 juta aku tu nya mimit bendar ba iya ti berega RM1 billion. RM100 juta tu sebaka enggau 10 sen ba iya.
“Ambi ke banding, Mahmud (Abu Bekir) bisi dua iti bup akaun bank ba Edmond de Rothschild di menua Luxembourgh enggau penyampau duit simpan US$25 juta. Iya mega bisi dua iti akaun ba bank ti sama di menua Switzerland enggau pemayuh duit simpan ti manggai US$31 juta.
“Dua iti akaun HSBC iya di menua Jersey bisi duit simpan US$34 juta, lalu ba bank HSBC di Honk Kong iya bisi akaun US$9.6 juta. Semua akaun nya bisi duit simpan dalam pemayuh US$100 juta.
Shahnaz madahka laki iya Mahmud nya bisi lima iti akaun ba bank Pictet and Cie di Bahama, the Caribbean enggau penyampau US$18 juta, enggau sebuah agi akaun ba Bank Safra di Bahama enggau penyampau US$2 juta.
“Lapan iti akaun enggi iya empu ba Bank Safra di Monaco bisi duit simpan manggai US$38.3 juta.
“Kelimpah ari nya, iya mega bisi tujuh iti akaun ba nama Union Bank Switzerland enggau duit simpan US$27 juta lalu siti agi akaun dalam HSBC Bank di Jersey ti nyangka udah dikeluarka iya,” ku Shahnaz
“Semua duit simpan nya manggai US$159 juta ti nyau deka sebaka enggau RM588.67 juta”. [Shahnaz Abdul Majid]
Mentua lelaki pemadu kaya di Asia Tenggara – Shahnaz mega minta RM121 juta ke sukung iya dalam pengelama 2 taun ke anak lelaki iya. Nya nyengkaum belanja ke dua buah kerita Aston Martin enggau RM72,000 duit belanja anak iya nya ti benung besekula di UK.
Lebuh iya ti meri penerang nya menantu Kepala Menteri nya mega ngamatka semua penerang ti dipadahka ba orang mayuh, nyengkaum pekara ti ditusui Sarawak Report. Iya madahka Taib nya siku orang ti pemadu kaya di menua Malaysia, enti enda pan, orang ti pemadu kaya di Asia Tenggara, beduduk ari pengerangka iya nguasa semua pengeraja asil tanah menua Sarawak.
Jaku tuduh nya enda lepas ari perati mensia mayuh di Switzerland, ti benung irauka asil penguntung reta kamah ari pengawa ngeruga sereta ngerusak kampung di Borneo ti benung disimpan dalam sistem bank ba menua sida.
Bala kaban MP Switzerland nya arapka enti sida enda mujur ngemanahka rampa menua Borneo ti udah rusak nya, abis nadai pan reta kamah nya diberi pulai ngagai peranak Sarawak dikena ngangkatka pemanah pendiau sida ti udah tanggul laban pengerangka tuai sida dalam pengelama 30 taun tu udah.
Laban ti udah nabanka duit kamah ngemayuh nya, ukai bereti Taib tau mujur nabanka duit nya belama-lama.
Isu tu udah direpotka dalam suratberita Sonntagszeitung di menua Switzerland.
Cherita nya udah ayan dalam Sonntagszeitung kemari.
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.