Kompeni Kayu Batang Enggi Sida Taib Sebilik Diburu Ari Menua Liberia!

• 21 Jan 2013
• BM 翻译

Petunggal Taib, siku tuake kayu batang ti mega nyadika kroni politik iya, Abdul Hamed Sepawi, udah diburu pansut ari menua Liberia di Afrika, ba sebengkah chara Presiden menua nya ngemunaskan penyalah makai suap enggau ngulihka kayu batang chara salah di menua nya.

Tindak menua Liberia nya udah nyadika empas ti udu ngagai siku orang ti tebilang di menua Sarawak ba mata komuniti entarabansa, udah bekau jaku kutuk mensia dipansutka dalam rumah Parlimen Switzerland ba minggu tu tadi.

Kompeni enggi Hamed Sepawi, Perkapalan Damai Timur (PDT) nya megai 60% share dalam kompeni Atlantic Resources Limited, ti kala disebut ngereja penyalah makai suap enggau ngulihka kayu batang chara salah ti diperambu dikena ngerusak sebagi ari empat bagi kampung di menua Liberia di Afrika nya.

Sebengkah agi kompeni kayu batang ti tebilang nama di menua Sarawak ti udah ditemu bekaul enggau skandal ngerusak rampa menua Borneo, Samling, ti kala udah disebut nyadika kompeni melanja dagang kunsi nya, ti besangkut-paut enggau Abdul Hamed Sepawi lalu mega enggau kompeni PDT iya.

Skandal Afrika nya udah muka mata komuniti entarabansa ti endur kompeni-kompeni kroni ke Taib Mahmud, ti udah suah bendar bulih sukung belanja ti mayuh nengah pengawa ngeruga rampa menua Sarawak, diatu ditemu udah ngenataika penanggul ba ikas entarabansa. Kompeni-kompeni baka Samling, Ta Ann, Rimbunan Hijau enggau WTK udah dikumbai raban NGO rampa menua nyadi kompeni apek bayat entarabansa ketegal pengawa jai sida ti bekerugaka rampa menua lalu melakangkan pengelantang mensia.

Kompeni PDT enggi Hamed Sepawi enggau Samling napi jaku kutuk ti udu di Liberia

Arah beeksekutif nya, baka ti dipansutka Presiden Liberia, Ellen Johnson Sirleaf kena 4hb Januari tu tadi, udah nyadika pangka ti udu ngagai ulah jai orang ti ngembuan PUP, lebih agi ba kompeni Atlantic Resources Ltd enggi Hamed Sepawi. Presiden Liberia nya mega mansutka jaku ti ngantung enggau tekala nya semua pengawa kompeni-kompeni nya.

Pemendar-pemendar PUP nya ti patut dikena ba lisin ti mungkur rampa menua kurang ari 1,000 hektar semina dikena ngemendarka raban orang bansa asal menua nya empu aja ngulihka kayu ke guna sida empu aja.

Udah bekau repot ti dikeluarka siku penyepu wisel taun siti nyin kemari, perintah menua Liberia lalu bejalaika pansik ti ngujungka sida tetemuka permit-permit PUP nya udah salahguna orang, lebih agi kompeni-kompeni ari menua Sarawak ti bisi kaul enggau Abdul Hamed Sepawi enggau mega kompeni Samling ti enggi raban sida Yaw sebilik.

Repot nya bisi nyebut orang ti pugu ngelanggar atur PUP nya kompeni Atlantic Resources Ltd enggi Abdul Hamed Sepawi.

Beserimbai enggau nya, pansik nya nemu kompeni Atlantic Resources Ltd megai 130,000 hektar tanah kampung di menua Liberia ngena kontrak pengawa ngemataka kampung. Surat penerang nya nunjukka kompeni ti datai ari menua Sarawak nya udah betemu enggau bala orang bansa asal menua Liberia nya lalu minta sida nyain kontrak enggau chara belalai ngambika nyerahka kuasa sida atas PUP sida nya, suah agi dipampas enggau mata duit ti mimit.

Kontrak nya meri kuasa ngagai kompeni nya nebang semak sejuta hektar tanah kampung lalu nukar iya nyadi kebun sawit bedandang besai enggau utai tanam ti bukai. Pengawa tu udah ngujungka Presiden Ellen Johnson ari menua Liberia madahka pengawa nya ngelanggar undang-undang menua nya lalu mega bisi tetemuka sekeda pemesai perintah menua nya empu bisi buya nerima duit suap ngambika ngemendarka tanah kampung sida ditebang sepeneka ati, udah bekau pansik ti besai-besai dipejalaika.

Beserimbai enggau nya mega, perintah menua Liberia bisi tetemuka kompeni enggi Hamed Sepawi udah nyual keluar 16,764,381 tan metric kayu batang nengah penyangkai kapal Greenville lalu bala mensia mayuh di Liberia diatu udah enda lantang ati laban kompeni-kompeni ari menua Malaysia enda mayar chukai sebedau sida bejalaika PUP ngena atur ti patut. Udah bekau nya menua Liberia merinsa nanggung utang ti manggai bejuta-juta dollar ketegal penanggul ti dibai kompeni-kompeni kayu batang Malaysia nya.

Atur ti ngantung PUP ari ngereja kayu kampung enggau chara ti salah nya dipansutka Presiden menua Liberia nya udah disambut seraban NGO rampa menua Global Witness enggau ati gaga, laban sida udah bebendar amat mantaika isu nya.

Bala pemerati di menua Sarawak engka ngarapka tindak ti terit deka dipejalaika perintah Sarawak ba sebarang orang ti ngelanggar atur baka ti dikereja kompeni Ta Ann, Sarawak Plantation, Grand Perfect enggau Samling, ti diempu sida Yaw sebilik enggau Hamed Sepawi. Tang Kepala Menteri Sarawak empu, Abdul Taib Mahmud udah mampul mata enggau pending iya ngagai pengawa ngulihka kayu batang enggau chara ti salah, ngena raban apek bayat ngemba orang asal ngena lisin ti dikeluarka iya nya.

Berita pasal penyalah ngerampas tanah kampung di Liberia ti dikereja sida Hamed Sepawi nya nunjukka pengawa nya lama udah dikereja di menua nya lalu bisi bekaul enggau kroni Kepala Menteri Sarawak enggau kompeni-kompeni sida Yaw sebilik, Samling.

Kompeni PDT ukai semina pemegai share pemadu mayuh dalam kompeni Atlantic Resources Ltd, tang sida mega bisi share USD$100 juta dalam kompeni Samling Global nya empu.

Pansik ti dipejalaika perintah menua Liberia atas kompeni Atlantic Resources nya bisi tetemuka selampur pejalai pengawa sida nya dipelanja ngena duit puku USD$60 juta ari kompeni Samling.

Yaw Chee Ming ari raban sida Yaw sebilik ditemu nyadika pengarah dalam kompeni kompeni PDT nya.

Yaw Chee Ming mega nyadika pengarah dalam dua buah agi kompeni ti sama berebutka lisin ngulihka kayu batang di Liberia, iya nya kompeni Southeast Resources enggau Alpha Logging. Dua buah kompeni nya dipelanja ngena puku dagang USD$60 juta ari Samling (ti baru udah nyadi kuasa pengempu ngati Kediri sida Yaw sebilik udah bekau sida napi pengerugi ba share ti dipegai awam).

Tu mai reti Hamed Sepawi nyadika pemegai share pemadu mayuh dalam Samling nengah kompeni PDT lalu Samling mega nyadi pugu kompeni ti beranakka puku dalam dagang kunsi enggau kompeni PDT. Raban pemansik nemu kompeni PDT enggau Samling Strategic Corporation nya bekunsika alamat ti sebaka di Malaysia.

Pekara nya udah nyungkit mayuh agi jaku tanya bekaul enggau pemayuh lisin ngulihka kayu batang ti dikeluarka Taib ngagai sida Yaw sebilik ti enda ditemu mensia mayuh dalam pengelama 30 taun tu. Dagang kunsi ti dipejalaika di Afrika nya nunjukka sida Yaw sebilik enggau sida Abdul Taib Mahmud sebilik endang chakah bendar sebedau pengawa sida ditemu orang mayuh.

Ke bendar iya, kaul Taib Mahmud enggau bala tauke kayu batang nya nunjukka iya mega bisi bebalut enggau pengawa ngerusak rampa menua ti besai bendar, ukai semina ba Borneo, tang ngelekai di serata dunya tu, baka ti dikamatka NGO rampa menua, Global Witness.

Penerang ti baru bendar tu pasal pengawa salah sida Taib sebilik di Afrika nya dipelabaka udah ngeringka semengat bala orang ti ngelaban pengawa salah ngulihka kayu batang di Tasmania, ti deka ngenataika bantah sida dalam court ngelaban kompeni kayu Ta Ann Tasmania.

Kompeni Ta Ann Tasmania ti mega diempu Abdul Hamed Sepawi udah ditemu balat ngulihka kayu ti napi bantah bala orang di menua nya, ari kampung Tasmania ti udah ditetapka perintah Tasmania nyadika kampung galau. Penyarut nya udah ngujungka perintah ngantung Sempekat Kampung entara perintah Tasmania enggau Perintah Besai, ti dipelabaka udah bulih beratus juta dollar ba pampas pengerugi di menua nya.

Pengirau raban orang ba penyalah makai suap ti suah dikereja kompeni Hamed Sepawi, ukai semina di menua Sarawak, tang mega di Afrika, deka nambahka jaku Tanya ngagai Parti Green pasal pemutus runding sida ti udah mai kompeni ari Malaysia nya ngereja kampung di Tasmania lalu nyukung pengawa dagang kunsi ari ti ngayahka duit sabsidi bejuta-juta dollar ari bala pemayar chukai menua nya.