Latest Stories
Sections
Udah chukup tau ngasuh iya kena serang penyakit strok?
Bisi didinga disebut-sebut orang dalam parti Menteri Besai menua Malaysia udah diserang penyakit strok ti enda balat ba ujung minggu tu tadi.
Enggau pemayuh bengkah skandal ti ngelingi iya, engka amat tekan ba pendiau iya udah betambah lalu diasaika iya?
Datai ke sehari tu Najib Razak lalu bedau didinga nimbal sekeda jaku tuduh orang ngagai iya dalam kandang beberapa minggu tu, nyengkaum jaku ti nuduh iya bekaul enggau munuh model ari Mongolia, Altantuya Shaariibuu enggau ngambi duit suap ba pengawa meli kapal selam Scorpene ari menua Peranchis.
Enggau atur ti nyelai Najib udah meri arah ngagai Opis Menteri Penyaga Menua meli sebuah kompeni ti enggi siku bakih iya ti udah nya nyadika orang ti nuduh iya, Deepak Jaikishan.
Rakyat menua Malaysia udah ditejuka betanya-tanya nama kebuah Menteri Besai nya enggau enda mukai-mukai ngemasukka duit bejuta-juta ringgit ngagai sebuah kompeni ti nadai ditemu ulih bekereja, ti seninjik bendar diempu siku lelaki ti udah nuduh iya enda badu-badu?
Pengerindu ‘Indu Lumur Satu’ ngagai intan-belian udah mayuh bendar dikamatka nengah surat-surat penerang.
Tang peyual tikai pedani nya, Deepak, mengkang ngumbai penyampau duit nya enda chukup dikena iya nembuka penanggul belanja iya, ti endur Menteri Besai nya udah bejalaika pengawa bedagang enggau iya lalu udah nya ngujungka iya berengkah bejaku.
Jaku-jaku tuduh enggau penerang-penerang ti dipansutka nya 3 hari ti udah, nyengkaum niat orang ti deka nuliska lalu ngeluarka bup ti dikena bebasaka Deepak, iya nya The Black Rose.
Bisi mega penerang ti baru dipansutka pasal Deepak ti diasuh meli barang berega ti manggai bejuta-juta ringgit ke indu lumur satu Malaysia nya ngambika dikena ngemujurka agi pejalai dagang iya enggau sida Najib sebilik, nyengkaum pengawa ti meli tanah-tanah menua.
Diatu penemu Deepak nyau majak kusut lalu suah agi belaban enggau penemu-penemu iya ti dulu agi, lalu iya mega ngutuk raban bala parti penyakal ti enggai bekereja sama engau iya lalu iya bebula kala meri penerang ngagai bala pengarang berita, tang semua pengawa iya nya enda manah ke Menteri Besai.
Sekali ke kitai tu meratika siku tuai ti patut badu ari pengawa iya lalu nyurutka diri enggau jampat?
Pekara ti nyengala nya serang “penyakit strok ti enda balat” nya nyangka ulih ditapi iya ba segi pengerai iya, tang ba segi politik penanggul nya dipeda nyadika penanggul ti tau bendar ngemedis siku tuai perintah ba maya kejang deka bepilihbesai ti besai bendar reti nya.
Enti sema Najib ngaku diri udah diserang penyakit strok tu, iya enda tau enda nyurutka diri sebedau bepilihbesai tu. Chara nya deka ngemendarka sapit iya Muhyiddin Yassin nganti iya, ti nyadika chara dikena sida nyelamatka UMNO-BN ari terus anyut.
Datai deka nyelamatka – sekali ke sapit iya Muhyiddin Yassin arap bendar ke diri empu ulih ngerampas kuasa ari Najib sebedau bepilihbesai tu lalu udah nya besalah semua pengawa salah ti udah dikereja Najib ti ‘sakit’ nya?
Pia mega, enti Najib enggai ngaku diri kena serang strok, BN endang tetap lemi selemi dalam kandang orang ti nganti maya bepilihbesai tu.
Ukai semina parti ti betuaika orang ti enda landik bekereja, tang bala orang ti ngelingi iya deka nambahka tekan ba iya lalu mega deka nambahka parti nya majak bepechah lalu sida nadai hari berundingka chara dikena napi raban parti penyakal.
Penyarut dalam parti baka tu meh ti tau meri penerang ti enda betul pasal gaya pengerai Najib.
Bala orang ti deka meda Najib ditulak ari penuduk iya nya endang bala bakih iya empu dalam parti. Sida nya orang ti rangka, tang sida nemu Najib nya tampak agi ari parti iya sekumbang iya di nyadi tuai sida, lalu enggau nya sida enda tau enda ngatur singkang enggau manah.
Pekara ti benung nyadi tu, ti endur Menteri Besai tusah bendar deka nyeraraka diri ari tuduh skandal beleman enggau munuh nya datai ari pengerangka iya, penyalah makai suap, ti udah meri sida peluang deka nulak iya lalu ngulihka utai ti jauh manah agi ke sida empu.
Tang enti Najib amat nyurutka diri tumu ari ti patut endur iya ngetu, pengawa nya pulai ke pemanah bala orang ti deka nganti iya enti sida ngasaika sida ulih nyeliahka diri ari penyalah makai suap enggau enda landik mangku pengawa baka ti dikereja iya.
Agi mega bala orang nya endang seruran nyempulang Menteri Besai ba semua pejalai iya lalu sida mega orang ti sama dibalut penyalah makai suap baka iya empu. Rakyat mega nemu sereta ngelala gerak enggau singkang sida nya.
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.