Pekat Dikena Numbangka Taib! BERITA EKSKLUSIF

• 22 Jan 2013
• BM 翻译

Sarawak Report bisi nerima penerang ari beberapa iku bala orang ti bekaul semak enggau Taib Mahmud, nusui enggau silik pasal sebengkah pekat ti kering bendar dikena numbangka Kepala Menteri Sarawak ba maya aum besai PBB ti deka diatur, abis laun dalam bulan Lima tu ila.

Bala orang ti bepekat ari ikas penuduk sida ti tinggi-tinggi nya benung ngeluluka diri meruan beserakup enggau pangan diri ba pengawa bepilihbesai tu ila, ti disadang deka diatur dalam bulan Tiga tu ila. Tang bala sida nya ditemu udah mujur ngelumuka raban penyukung ti chukup kering sereta betubuh mayuh dikena sida nukar Taib enggau tuai sida, iya nya Sapit Menteri Perambu Pengawa, Awang Tengah Ali Hassan, munyi ti disebut orang ti taluk ke iya, nyengkaum sida Taib sebilik empu.

Sida nya udah meri penerang ti munyi nya ngagai Sarawak Report baka orang ti udah putus pengarap, baka ti dipadahka, dikena nyelak utai ti dikumbai sida pekat tumu, ti patut diperatika Kepala Menteri Sarawak ti majak tuai nya enggau naka penalam:

“Diatu Awang Tengah udah ulih nguasa lebih ari 14 iku ADUN ari parti PBB (nyengkaum kerusi iya empu), 6 iku ADUN ari PRS, 5 iku ADUN SPDP ti udah dipecat suba (lalu diatu numbuhka Kelas BN 5); lalu datai ke diatu Awang Tengah majak ngangauka bala ADUN ti bukai ti agi taluk ngagai Taib enggau Abang Johari Tun Openg, ngambika masuk ngagai kem iya. Iya nguasa bala ADUN ti digelumuka iya enggau chara meri sida tanah, lisin, kontrak enggau mata duit lalu mega besemaya deka meri sida penuduk ti beguna dalam perintah Awang Tengah ti baru nya ila.” [pemeri penerang ari dalam PBB empu]

Pemudi ti dikereja orang kanan iya deka ngeruga penuduk Taib ari dalam

Tuai pekat nya ukai orang bukai tang orang kanan Taib empu iya nya Awang Tengah Ali Hassan, munyi ti disebut siku penyepu wisel ti meri penerang ngagai kami, madahka Awang Tengah mujur ngena peluang iya ti nyadi Sapit Menteri Perambu Pengawa (nangkan Taib) numbuhka duit turu perang enggau pengkalan kuasa ti besai sereta tegap.

Awang Tengah udah mangku pengawa ti dikena iya ngulihka penguntung ke iya empu dalam pengelama 20 taun tu udah udah dipeda mujur bendar ngujungka ke iya empu nyadi kelalu kaya lalu iya mega udah ngena penuduk iya nya ngulihka lisin enggau duit suap lalu mega ngagihka kontrak enggau lisin ngagai bala penyukung iya.

 

 

Ngena chara tu iya mujur ngulihka sukung raban ti taluk ngagai Taib, nyengkaum Speaker DUN Sarawak, Mohd Asfia Awang Nassar ti disemayaka iya penuduk Gabenor Sarawak, lalu Sekretari menua Sarawak, Mohd Morshidi Abdul Ghani, ti nyadi siku pengereja pengawa bepangkat pemadu tinggi di menua Sarawak.

Utai ti balat ngasuh ati irau iya nya penerang ti madahka Awang Tengah udah meri sepenyampau duit ti mayuh bendar dikena numbuh raban ‘Soldadu Biru’ dalam pampang Pemuda PBB, ti dipekat iya dikena nunjukka sukung ngagai iya maya pengawa ngerampas kuasa dalam parti nya ila.

Kepala ke raban penyukung ari raban orang lelaki ti dibayar upah nya siku orang ti kasar pendiau, Radin Kadri Radin Budiman, ari pampang Pemuda Eksekutif PBB, ti dipeda udah kala nerima belanja RM10 juta ari Awang Tengah dikena iya ngelatih bala tua-tuai Pemuda PBB ba semua ikas di serata menua Sarawak.

“Mayuh orang udah nengkilunka Radin Kadri nya seruran tama tauka ninggalka opis Awang Tengah ba Wisma Sumber Alam. Ke penudi tu tadi, Awang Tengah ditemu udah meri RM10 juta ngagai Radin Kadri dikena iya ngelatih bala Pemuda PBB ba semua ikas di serata menua Sarawak. Radin Kadri ti ditemu nyadika siku mata-mata dalam raban Taib suah bependiau sumbung, laban iya ngasaika diri bisi sukung ti tegap di belakang iya di serata Sarawak. Iya mega ngasaika diri kering dalam pejalai bala nembiak PBB laban iya nemu Awang Tengah bisi di belakang iya sekali ke ba politik tauka ari segi duit bantu” [penerang ari orang dalam]

Bala penulis surat penerang nya nunjukka pengirau ati sida ke kaul ti tegap ti benung mansang entara ‘soldadu biru’ enggau raban apek bayat di Sibu, ti endang ditemu seruran ngena pengasar lalu ngemba mensia mayuh di Sarawak.

Rintai nama bala penyual Taib
Surat-surat penerang ti udah dikirumka ngagai Sarawak Report bisi ngundan rintai ti silik nama 30 iku orang ti nyual Taib dalam BN, ti ditemu udah masuk kem Awang Tengah dikena iya mechat Taib ngena undi maya aum besai parti PBB nya ila.

Mayuh agi ari bala sida nya ti dulu suba endang penyukung ti taluk bendar ngagai Taib, nyengkaum Awang Tengah empu, diatu udah bejalaika pengawa diperansang ati enggau runding ti amu. Rintai nama nya nyengkaum tuai PRS James Masing, ti ditemu udah disemayaka penuduk Sapit Kepala Menteri 1 ke pemujur iya ngelumuka 6 iku ADUN ari PRS masuk kem Awang Tengah; Kelab BN 5 enggau YB ari SUPP Senadin Lee Kim Shin ti disemayaka Awang Tengah penuduk Sapit Kepala Menteri 2 laban udah ulih ngelumuka sekeda ari kaban SUPP ti udah tendu sukung sida ngagai SUPP empu.

Mayuh bala orang dalam PBB ngasaika Kepala Menteri ti udah tuai bendar nya udah datai ba maya iya patut nyurutka diri. Rintai nama bala orang ti di baruh tu nya nunjukka bala orang ti udah digelumuka dalam kem Awang Tengah ti besedia deka numbangka Taib:

• PBB
• 1. Awang Tengah – Bukit Sari (kerusi iya empu)
• 2. Aidel Lariwoo – Sadong Jaya
• 3. Naroden Majais – Simunjan
• 4. Julaihi Narawi – Sebuyau
• 5. Razaili Gapor – Beting Maro
• 6. Abdullah Saidol – Semop (Kepala Sekretari Politik ke Taib Mahmud)
• 7. Ripin Lamat – Lambir
• 8. Dr. Abdul Rahman Ismail – Bukit Kota
• 9. Martin Ben – Kedup
• 10. Roland Sagah – Tarat
• 11. Simoi Peri – Lingga
• 12. Mohamad Razi Sitam – Saribas
• 13. Dennis Ngau – Telang Usan
• 14. Ambrose Blikau Enturan – Katibas
•
• PRS
• 1. James Masing – Baleh
• 2. Snowdan Lawan – Balai Ringin
• 3. Mong Dagang – Bukit Begunan
• 4. Alexander Vincent – Ngemah
• 5. Joseph Mauh Ikeh – Tamin
• 6. John Sikie Tayai – Kakus

• Former SPDP (Kelab BN 5)
• 1. Sylvester Entrie Muran – Marudi
• 2. Peter Nansian – Tasik Biru
• 3. Wong Judat – Meluan
• 4. Rosey Yunus – Bekenu
• 5. Paulus Gumbang – Batu Danau

• SUPP
• 1. Ranum Mina – Opar
• 2. Dr. Jerip Susil – Bengoh
• 3. Francis Harden – Simanggang
• 4. Dr. Johnichal Rayong Ngipa – Engkilili
• 5. Lee Kim Shin – Senadin

Surat-surat penerang nya mega bisi ngundang nama orang ti mengkang taluk ke Taib, tang penyampau tubuh bala sida nya mimit bendar.

“Malcom Mussen Lamoh (Batang Ai) enggau Liwan Lagang (Belaga) ari PRS, William Mawan Ikom (Pakan) ari SPDP, Wong Soon Koh (Bawang Assan) ari SUPP, George Lagong (Pelagus) chalun ngatika ke diri enggau semua ADUN PBB ti enda dirintaika di atas nya tadi mengkang taluk ngagai Taib. Enggau nya Taib semina bisi 26 iku ADUN ti mengkang taluk ngagai iya” [penerang ari orang dalam PBB empu]

Repot nya bisi betalatka ngumbai Awang Tengah kala nguji ngerebut penuduk ti tinggi nya laban belalauka pelaba ti ngumbai iya nya lebih agi “orang asal” dikena nukar Taib, enti bebanding enggau Menteri Pengawa Berumah, Abang Johari Tun Openg.

Abang Johari bulih agi pengarap ari KL lalu iya mega dikumbai jauh likun ba mata bala orang BN, ti endur iya mega disadang beresi ari penyalah makai suap enti dibandingka enggau Awang Tengah.
Tang ba pun pekat nya, penyalah makai suap endang mengkang disadang.

Pemeri belanja dalam pekat nya ti mega dikumbai “bakih dagang” ke Awang Tengah, iya nya siku orang dagang benama Lau Boon Soon. Lau dikumbai nyadika broker ngarika Awang Tengah dalam pengawa bejual-beli tanah-tanah ti diulihka ngena opis menteri iya ari menua Sarawak lalu Awang Tengah ditemu mayar RM5 juta ngagai tiap iku pengari rakyat ti kempang ati ninggalka Taib!

Bala penulis surat penerang nya ngamatka penerang ti madahka munsuh besai ti bukai ke Awang Tengah, iya nya Adenan Satem ti udu sakit diatu enggau mayuh agi penyukung Adenan udah belabuh tama ngagai kem Awang Tengah nya.

Peti ti digaga dikena ngapuska Taib

Pekat dikena ngelaban Taib ti tau bendar nganu nya ditusui bala orang ti agi mengkang bekaul enggau Taib ti mupuk-mupuk ngelekaka iya.

Diatu Awang tengah ukai semina nyadika pugu munsuh politik iya sama enggau Speaker ADUN Mohd Asfia, tang mega nyengkaum Kepala Sekretari Politik ke Taib iya nya Abdullah Saidol mega sama dirintaika nyadika siku ari pugu orang ti ngatur pekat nya.

Abdullah Saidol nukar Mohd Asfia ba kerusi ke sitak Semop sepengudah Taib ningkilka nyadi YB ba bepilihbesai ti penudi tu tadi, tang iya dipeda ngenyemakka diri ngagai Mohd Asfia enggau Awang Tengah, lalu kedua-dua iku orang nya udah meri iya penuduk nya.

Awang Tengah ditemu bisi melanja Abdullah Saidol ba kimpin iya enggau pengawa iya ti ngemansangka unit senyata internet dikena sida ngelaban serang bala pengkritik iya dalam dunya internet!

Siku agi orang ti bepenuduk tinggi dalam PBB ti udah ninggalka Taib lalu tama ngagai kem Awang Tengah iya Sekretari mendam iya empu, Mustapha Han, ti mangku pengawa ‘nyaga pintu penama’ opis Taib enggau ngemataka bup diari iya.

Penerang ari dalam PBB nya mega madahka Mustapha Han udah mujur ngena penduduk iya nagang tauka nyekat sebarang orang ti deka betemu enggau Taib, nyengkaum bala orang ari BN Perintah Besai ari KL.

“Datu Mustapha Han dikelala semak enggau Awang Tengah enggau Raziah Mahmud. Ngena penuduk iya nya, iya suah ditemu nagang sebarang orang ti deka betemu enggau Taib, bala penyukung iya tauka bala sida sebilik empu. Semina bala orang ti besai guna ba Taib aja dikemendarka betemu enggau Taib dalam opis iya, iya nya Awang Tengah enggau Raziah aja. Kebuah pia laban Datu Mustapha Han mangku tanggungpengawa ngatur Taib ti betemu enggau sapa-sapa lalu ngemataka bup diari Taib” [diambi ari penerang ari dalam]

Nembiak asal tauka jelu jagu?

Bala penyukung Taib diatu udah nemu pekat ti betuaika Awang Tengah nya jai agi, laban ba sida, pekat nya dikereja enggau ati sereta runding ari orang ti amu ti balat agi ari pengamu Taib. Awang Tengah udah belajar ba Taib chara-chara bejalaika pengawa dikena nugungka pengeraja ke iya empu. Iya tentu mega deka ngerusak menua Sarawak sebaka enggau pengawa ti dikereja Taib atas menua nya.

“Enti Taib sayauka menua Sarawak, sinu ke bala rakyat Sarawak, tentu iya patut dani ari mimpi iya diatu lalu mechat semua lintah ari perintah iya. Ke pengelantang menua Sarawak, kami minta iya mechat orang baka Awang Tengah, Abdullah Saidol, Mustapha Han, Morshidi Abdul Ghani, Radin Kadri enggau sida ti bukai. Kami diatu ngaku udah balat ngereja penyalah lalu kelanjur pengawa lalu diatu kami tusah bendar ati ke penyalah kami nya. Tang kami agi sayauka Sarawak enggau rakyat iya, kami enda kempang meda Sarawak deka disemaka baka ti pansut ari nyawa jelu rimau lalu tama ke dalam nyawa jelu jagu.” (Pun berita: Sida Taib sebilik)” [penerang ari dalam PBB empu]
Bala penyukung Taib ngumbai diri manah agi beteduh ba orang tuai nya ti disemaka “antu sitan ti dikelala” enti dibandingka kuasa dirampas siku apek bayat ti udah mechat iya.

Taja pan baka nya, bala orang bukai di menua Sarawak bisi didinga besaraka penemu sekumbang ti nganti pengawa bepilihbesai diatur nya ari ti muka singkang diri lalu ninggalka BN, lebih agi laban Taib enda tau enda nyurutka diri ari pengawa Kepala Menteri ti dipangku iya nya. Sekali ke, tu maya ti betul bendar endur kitai ngundi serakup penyakal ti udah besemaya deka numbuhka perintah ti tebuka sereta terang; mulaika tanah ngagai orang bansa asal lalu ngemunaska penyalah makai suap, kronism enggau salahguna kuasa enggau penuduk?