Latest Stories
Sections
Baka ti dikerembaika dalam Borneo Post (ti dikematakabala kroni penebang kayu batang ke Taib Mahmud, kompeni KTS)
Kepala Menteri Sarawak, Abdul Taib Mahmud udah lenyau pengeliat ati iya lalu minta perintah besai ngena sebarang chara nyekat penabur berita nengah stesyen radio ti ngatika diri, Radio Free Sarawak.
Beserimbai enggau nya, bakih politik iya, Kepala PRS, James Masing, mega bisi didinga mantaika jaku sebana lebuh iya minta kuasa soldadu dikena nyekat program radio nya, laban stesyen radio nya dikumbai iya “ngerachun runding” bala pengundi iya!
Enggau ngambi kira kuasa ti sebaka atas pengerembai berita di Sarawak, kedua-dua iku pemesai perintah nya dipeda nyima bendar ati ketegal penanggul ti mit nya.
Atur pengerembai berita ti nengali dipejalaika BN
Kepala Pengarang Berita? – Hanifah Taib dipeda regap-regap dalam Sarawak Tribune ngambi semua berita ti dichelak enda ngenyimaka ati apai iya
Agi mega udah 40 taun bekuasa Taib enggau sida sebilik udah bekuasa penuh atas semua pengerembai berita di menua Sarawak, sekali ke nengah sida sebilik tauka nengah bala kroni penebang kayu batang iya. Beserimbai enggau nya mega pengerembai berita menua ba ikas perintah besai endang dikemataka enggau terit bala bakih iya dalam UMNO enggau bala kroni dagang sida.
Chara nya muntang bendar. BN deka nagang sebarang orang ti deka ngeluarka sebarang berita ti nadai belisin lalu sida BN semina deka ngeluarka lisin ngagai sapa-sapa ti ulih dikarapka lalu ulih dikemataka sida.
Tu meri reti, perintah BN di menua Sarawak endang udah teleba enggau berita ti dikerembaika baka ti dikedekaka sida (lalu nagang pengerembai berita nitihka peneka sida mega) lalu orang mayuh enda tau ninga sebarang jaku bantah tauka penerang ti enda manah pasal perintah dalam pengelama berapa puluh tu udah.
Anak indu Taib Mahmud, iya nya Hanifah Taib, suah dipeda ngasurka diri nyadi pengarang berita ti tebilang, maduka diri mangku pengawa nyadi bos dalam gerempung suratberita lumur dua tebilang di menua Sarawak, Sarawak Tribune. Ba Hanifah, bulih pengawa nyadi kepala pengarang berita nya ukai pekara ti mar, laban iya nadai ditemu kala ngambi latih tauka ditikika pangkat ari ikas ti baruh. Kebuah pia laban orang ti bempu kompeni Tribune Press Sdn Bhd nya endang petunggal apai iya empu, Abdul Hamed Sepawi, ti mega nyadika proksi dagang apai iya. Abdul Hamed Sepawi enggau bakih iya, Hasmi Bin Hasnan (ti udah nyadi kaya raja enggau ngenyit udah iya badu gawa ba Opis Tanah & Survey ti dikuasa Taib Mahmud).
Kepala Pengarang, Hanifah Taib deka rauh-rauh enti bisi berita ti enda dikerinduka apai iya dichelak dalam Sarawak Tribune
Beserimbai enggau nya Borneo Post enggau Utusan Borneo nya dikemataka sereta dikuasa kroni penebang kayu batang Taib, iya nya kompeni KTS.
Jaku bula dikena ngangkatka diri empu dichelak besai-besai ba limpir ke terubah Borneo Post enggi KTS
Lebuh bala pengarang berita ari menua tasik, nyengkaum bala sida ari Agence France Press (AFP) datai ke menua Sarawak laban ti deka ngulihka berita pasal orang bansa asal ti mantah enggau nirika empang jalai ngelaban kompeni kayu batang Pustaka KTS, dia suratberita Borneo Post jampat-jampat nuliska repot sida pasal pengawa nya ba limpir ke terubah madahka bantah bala orang bansa asal nya dipunka “orang ari menua tasik”!
Tau kini repot ti baka nya disebakaka kitai enggau chara ngiga pemanah kediri empu? Siku agi pemegai share dalam Borneo Post nya menyadi Taib empu, iya nya Mohd. Ali Bin Mahmud.
Kelimpah ari nya, suratberita The Star, suratberita lumur dua besai ti suah ngemesaika BN enggau News Straits Times, ti sama baka jarin suratberita ti bukai nyengkaum arus berita TV ukai-perintah diempu gerasi berita UMNO, Media Prima.
RTM nya sebengkah stesyen pengerembai berita ti dikemataka perintah lalu stesyen TV ti ngatika diri, Astro nya enggi siku orang dagang, Ananda Krishnan, orang lumur dua pemadu kaya di Malaysia puas ke ngulihka penguntung ari BN. (Perintah BN bisi didinga nyadung perengka penerima program Astro ngagai rumah panjai di Sarawak ti nyadika atur pengawa sida ngubah perening mensia mayuh ngambika enda mendingka Radio Free Sarawak).
Lalu baka ni ku stesyen radio ti ngumbai diri “ngatika diri” ti tunggal di Sarawak, Cats Radio?
“Ngatika diri sereta nadai bekaul enggau sapa-sapa”? – Cats Radio nya enggi Kristal Harta Sdn Bhd
Lalu baka ni chara stesyen Cats Radio nya mudah bulih lisin pengerembai berita iya, kita tentu deka betanya? Ke bendar iya Kristal Harta nya enggi Hanib Corporation, lalu Hanib Corporation nya kompeni dagang kunsi entara Hanifah Taib, ipar iya Anisa (bini Sulaiman Taib) enggau siku agi menyadi Taib (diatu udah parai), niang Ibrahim Mahmud!
Hanifah Taib, nya siku Rupert Murdoch ari menua Sarawak?
Enggau nya, lebuh kitai berandauka pasal gerempung pengerembai berita di menua Sarawak, iya sebaka enggau utai bukai ti dikemataka sereta dikuasa sida Abdul Taib Mahmud sebilik!
Jelu gajah takutka anak tikus?
Benung nyinuk mendingka radio di rumah panjai
Enggau nya nama kebuah Kepala Menteri enggau bala menteri iya udu takut sereta remban ke nyawa radio ti ditaburka semina dua jam dalam sehari, ngena gelumbang angin pandak SW15420kHz (enggau mega nengah arus internet)?
Baka ni Radio Free Sarawak dipeda ulih ngeruga pengawa nengali ti dikereja gerempung pengerembai berita ti dikuasa perintah di menua Sarawak enggau nama kebuah runding bala orang menua pesisir ulih “kena rachun” program ti mimit taja pan sida nya udah betaun-taun “diajar sereta dipadahka” ngena proganda perintah BN ba dini-dini endur sida diau?
Baka ni program dua jam nengah Radio Free Sarawak nya ulih ngemuntanka semua pengawa BN ke udah dipeda mujur ngelama tu?
Engka laban Radio Free Sarawak ulih meri pengarap ti baru lalu mega engka laban Radio Free Sarawak nya ke terubah iya mansut ke utai ti bendar sereta nyengala lalu ditemu semua orang pasal nama utai ti benung enggau udah nyadi di menua Sarawak?
Ari ti ningaka jaku ti pansut ari “dilah bejanga” bala orang politik BN ti ngumbai chura chelum nya burak, lalu mega ngeluaka uras di serata menua, laban nadai siku orang berani mantah sida, tang nengah Radio Free Sarawak kitai deka ninga jaku penerang bala orang ti bendar nya bejaku bendar pasal utai ti diasaika sida dalam pengidup sida besari-sari.
Program radio ti mit nya udah meri pilih ke bala orang di Sarawak ti udah dikeduan, ti udah lenyau semua pemisi dalam pengidup sida ketegal dirampas bala apek bayat ti rangka ti bepayungka perintah sida empu.
Betaun-taun perintah BN udah ngiri penemu sida lalu madahka sida nya nadai pilih bukai lalu udah nya sida ditagang mantah perintah, laban enti sida mantah, sida deka diukum enggau berat. Diatu Radio Free Sarawak udah nyadika pilih kedua sida lalu perintah BN mar bendar deka bediri lalu nyaut tauka nimbal jaku penerang ti dipansutka nya.
Perintah BN nya ngasuh engkual
Amat bendar utai ti disebut sida ba radio tu!
Utai ti dipeda tau nganu perintah BN nya Radio Free Sarawak ukai ngerachun runding bala peninga, tang ngelepaska runding sida ti lama dikurung ngelama tu. Sebuah pengerembai berita ti ngati kediri nya nyadika tiang pemun demokrasi lalu enggau chara ngeruntuhka tiang nya Taib deka dikumbai munuh demokrasi di menua Sarawak.
Enggau chara melakangka jaku bantah, nagang rakyat ningaka penemu ti bukai, nagang pemasuk penerang ti enda ngelantangka ati Taib dipeda bejalaika perintah chara totalitarian (semina enggi iya aja ti patut dititihka), lalu ukai siku ‘tuai ti tulin-tulin dipilih ngena chara demokrasi’ baka ti suah dipegendangka iya ngelama tu.
Tang Taib mega udah nanam putus pengarap ti udu ba bala orang Sarawak, nyentuk ke datai ba maya iya sida mendingka penemu ti baru, lalu sida deka majak bulih pengarap sereta belabuh lantang ati.
Enti nadai pengerembai berita ti ngati kediri, pengarap orang mayuh ba perintah Taib tentu majak tendu. Sida Taib sebilik udah ngulihka sebarang utai ti dikinginka sida lalu enda tau dibantah tauka disakal sapa-sapa. Nyentuk ngagai maya sada nyawa ti mit belabuh didinga nengah Radio Free Sarawak.
Enggau nya, Taib patut berasai takut sereta nangi. Sada nyawa ti mit nya ulih nyebut utai ti besai-besai, sada nyawa ti mit nya ulih ngayanka penyalah makai suap ti balat dikereja, sada nyawa ti mit nya ulih mantaika utai ti dilalaika, sada nyawa ti mit nya ulih nyakal penemu orang politik ti ngerunding diri empu, sada nyawa ti mit nya ulih nyadung berita lalu sada nyawa ti mit nya ulih nyediaka pilih ti enda dikereja BN ngambika orang mayuh tau nemu sereta berundingka iya.
Ba laya ti enda sebaka pengering entara pengerembai berita ti dikuasa Taib enggau Radio Free Sarawak ti mit nya, utai ti belabuh didingaka orang mayuh diatu, ulih tauka enda iya menang?
“ngemendarka pengerembai berita udah nyadika siti pengawa ti mar bendar dipejalaika lebuh ti deka ngulihka pengarap ti besai di menua (Indonesi) nya” [Tim Lankester, siku Pemesai ti udah badu bekereja ke opis menteri menua Luar ti mega Presiden Corpus Christi Oxford, bejaku ba minggu nyin kemari pasal nama kebuah Indonesia lebih demokratik sereta tau dikarapka bebanding enggau menua Malaysia]
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.