Selamatka Minyak Galau Menua Sarawak - ANANG ENDA BEJAGA-JAGA

• 21 Jan 2013
• BM 翻译

Rakyat menua Sarawak napi pengawa orang ti ngenchuri pemadu balat lalu kami ngansak sida ngena jari sida ngambi pulai masa depan sida, ngambika bekal minyak enggau gas galau ari bumi sida ulih diselamatka.

Palan pengerembai berita di menua Sarawak jarang bendar didinga betusuika pengawa ti nemu telaga minyak ti baru nya, sekali ke ba darat tauka di tasik Sarawak, ti disadang ulih ngeluarka beribu-juta ringgit dalam beberapa taun ti deka datai tu.

Nama kebuah berita pasal telaga minyak ti baru ditemu nya enda regas dikemesaika lalu dichelak besai-besai ba limpir mua semua suratberita di menua Sarawak ngambika bala rakyat ti bisi kuasa atas pengeraja asal sida empu nya nemu enggau silik?

Pengawa ti nemu telaga minyak baru nya ulih meri pengarap ti baru ke semua rakyat menua Sarawak.

Enti penguntung ari minyak nya dikena enggau bejimat, penguntung nya ulih dikena nampung pengawa ngemanahka semua rumah sekula, sepital, jalai alun, sekim genturung rumah enggau mega dikena ngemanahka agi rampa menua enggau kandang nengeri di serata menua Sarawak nya.

Nama kebuah berita pengawa nemu telaga minyak ti baru nya enda ditusui dalam suratberita, radio enggau TV ti dikuasa perintah BN, jauh agi berita nya deka dikerandauka ngambika ulih ngeregaska agi pengawa pemansang di sebelah nengeri? Nama kebuah bala orang politik BN enda engkeretik pasal pekara tu?

Saut ke pengawa belalai tu iya nya, iya dikereja dikena bebagi pengawa ngulihka asil ari tanah menua Sarawak entara Taib enggau bala kroni dagang iya di Sarawak enggau kompeni Petronas enggi BN di Malaysia.

Taib enggau Petronas nyimpan akaun sida enggau chara ti belalai. Nya alai, enti sapa-sapa bakih politik BN nya dikemendarka nguasa rizab minyak ti besai bendar nya, nadai sapa deka nemu berapa pemayuh duit ulih ari rizab nya tauka baka ni duit nya deka dipelanja.

Enggau tu kami ngansak rakyat menua Sarawak angkat lalu nagang pengawa tu ari majak dikereja.

Taib udah nugungka pengeraja ke iya empu lalu nyadika orang ti pemadu kaya di pelilih menua Asia Tenggara enggau chara ngeruga asil kampung menua Sarawak. Nyau semak bepilihbesai tu Taib udu ngeruga teda kampung di menua nya.

Kelimpah ari nya iya udah magi sereta nyirap tanah menua enggau tanah NCR lalu dibuka nyadi kebun dandang besai sawit lalu udah nya nyerahka pengawa nya ngagai bala sida sebilik, bala proksi dagang iya enggau bala kroni politik dikena sida ngulihka penguntung beribu-juta ringgit ke iya empu.

Lalu bedau puas ati ba pengawa ngeruga pengeraja asal menua Sarawak, iya majak ngisi kuchik iya enggau chara ngubah kontrak ti manah-manah sereta mega dagang nengali-nengali ngagai bala sida sebilik tauka bakih politik iya.

Pengawa ti nemu telaga minyak baru nya nyadika peluang ti penudi ke menua Sarawak dikena ngulihka pengeraja ke menua ti ulih dikena ngangkat sereta ngemanahka agi pengidup bala rakyat di menua Sarawak lalu ukai nejuka orang politik BN aja ti nyadi kaya raja.

Enti Taib tauka sebarang orang ti numbangka iya lalu nganti penuduk iya bepeluang bekuasa atas pengeraja asal menua Sarawak nya, penanggul nya tau ngujungka menua Sarawak enggau raban ti rebak dudi deka lenyau penguntung pia aja.

Bala pemesai BN ti ngembuan ulah baka apek bayat nya deka ngena pengeraja nya terus michit menua Sarawak lalu ngulihka semua minyak, kayu batang, tanah enggau utai idup dalam ai lalu udah nya ninggalka menua nyadi kusi.

Rekod Taib dalam pengelama 30 taun bekuasa ulih nyeritaka diri empu. Nadai siku orang di menua Sarawak deka sanggu runding ke gambar ti deka dilukis kitai enti Taib enggau bala bakih iya ditejuka megai perintah belama-lama.

Rekod lama Taib ti mutarka pengawa enggau Perintah Besai BN/UMNO terang bendar ngambarka perambu pengawa ti benung digaga sida. Nengah surat-suratberita sida nadai didinga berandauka tauka nerangka perambu nya, tang kitai enda tau enda ingat, runding enggau perening bala orang dalam BN nya endang ditumpuka ngagai semua peluang enggau pengaya ti diarika sida.

Taib udah mujur bulih sukung Perintah Besai kenyau ari taun 1974 suba, lebuh iya benung nyadi Menteri Pengawa Gudang, iya udah berunding enggau aya iya empu, ti maya nya nyadi Kepala Menteri Sarawak ngambika nyerahka semua minyak galau ti diulihka ari Sarawak ngena adat menua ti dikumbai Akta Petroleum.

Lebuh nya, rizab minyak enggau gas dalam darat menua Sarawak dipadahka udah abis diulihka.

Aya iya empu, Abdul Rahman Ya’kub tekenyit bendar lebuh Taib besetuju nyerahka 100% asil minyak menua Sarawak ngagai Kuala Lumpur, laban sida nejuka Perintah Sarawak (iya raban anak Mahmud sebilik) bekuasa penuh atas kayu batang enggau tanah perintah di Sarawak.

Enggau chara nya Taib ngeluarka lisin ari ti besetujuka Sarawak enggau Sabah semina ditinggalka 5% aja ari asil minyak sida empu, tang laluh ke mayuh agi nya (95%) ke guna Petronas magang.

Pengeraja asal ari perut bumi Sarawak udah ngujungka Tanah Semenanjung nyadi kelalu kaya ba taun-taun udah nya.

Pengawa nya mega udah ngujungka Taib bulih sukung ti tegap ari UMNO, ke udah nya nentuka iya enda tau enda nyadi Kepala Menteri Sarawak lebuh iya badu nyadi menteri ba ikas Perintah Besai lalu pulai ke Sarawak, lalu UMNO udah nejuka Taib nguasa sebarang utai nitihka peneka iya ba menua iya empu.

Lalu sama enggau Taib, pemayuh pengeraja UMNO ari pengawa ngulihka minyak ngena Petronas lalu enda ditemu penyampau.

Pekara ti ngasuh alit ati nya menua Malaysia bejalaika atur pengawa ti endur orang ti dikemendarka meresa akaun-akaun Petronas nya semina Menteri Besai/Menteri Pekara Belanja aja. Semua akaun Petronas nya enda ditemu orang bukai.

Nadai siku pan orang nemu berapa ribu juta tong minyak enggau gas udah diulihka ari telaga-telaga minyak ari Sarawak enggau Sabah, tauka berapa ribu juta dollar udah nyadika untung ari dagang minyak kompeni Petronas nya.

Ari atur pengawa ti udu beresia nya bala orang dalam UMNO ngereja utai ngena duit untung nya sepeneka ati sida, sekali ke dikena sida nambahka pengaya duit parti, nambahka pengaya ke sida empu lalu mega nganjung duit nya enggau chara ti salah ke menua tasik, ti ngujungka diatu nama kebuah Malaysia udah ba penuduk Lumur 3 dalam liga entarabansa bekaul enggau pengelenyau duit menua ti enda temu penunga.

Penerang ti tau ngasuh irau ati nya, semina mimit aja duit nya dipulaika ngagai menua Sarawak dikena ngangkatka pengidup raban orang ti beguna bendar ke belanja ti udah ditipu Kepala Menteri sida empu.

Anggar belanja ke taun tu Perintah Besai udah ngurangka bajet dikena melanja pengawa pelajar ngagai 85% ti nyadika ketegal laban “pemujur” ba pengawa pelajar ba menua nya. Bala orang Sarawak ngelala agi pasal pekara tu.

Agih belanja ti dikurangka nya udu bendar dipeda nyiping menua Sarawak enggau Sabah, lalu dipeda nyata bendar UMNO benung napi penanggul ekonomi ti udu laban telaga minyak enggau gas dalam tasik udah majak kurang-sekurang ti dibai ari pengawa rangka enggau ngerua BN sekumbang sida megai perintah.

Taja pan udah beribu juta dollar ari asil minyak dipam pansut ari perut bumi Sarawak enggau Sabah, menua Malaysia diatu udu dibelit utang lalu duit dalam tabung UMNO diatu disadang udah pungkang!

Taib enggau Najib engka berasai lantang bendar ati ari pengawa nemu telaga minyak ti baru nya ngambika dikena bejalaika parti seduai iya lalu mega dikena nambahka pengaya ke seduai empu ngena asil menua ti nyau majak kurang nya.

Pengawa ti nemu telaga minyak ti baru nya dipeda bala orang dalam UMNO enggau Taib nyadika pemeri ari Tuhan. Bala pakar ti landik ba pengawa ngulihka minyak nya madahka kandang tasik menua Miri enggau Bintulu bisi bekal minyak ti mayuh agi, lalu nitihka repot sida pakar nya, pengaya ari minyak nya besai agi.

Tang sida sama nadai didinga engkeretik lebuh datai ba tanggungpengawa sida patut madahka rakyat sida empu, laban bala rakyat nya meh orang ti bekuasa ba pengeraja asal tanah menua sida empu.

Nyentuk ke diatu, nama pengawa ti udah dikereja sida nya ba telaga minyak ti baru ditemu nya? Baka ti kala ditusui kami, bisi mimit bendar penerang bekaul enggau selampur pengawa dagang kunsi ti ditanggam Taib enggau Petronas nya.

Dalam Akta Petroleum, kompeni Petronas nadai kuasa bekaul ba pengawa nemu telaga minyak ti baru nya. Kuasa nya semina dikena Perintah Sarawak ngeluarka lisin ngulihka minyak enggau gas ba kandang menua enggau tasik ti diperintah iya.

Tang laban udah riri ngulihka minyak ba luar tasik Sarawak, dia Petronas ngumbai diri mudah nanggam sempekat enggau Taib laban ke ngelama tu sida nya udah kelalu teleba enggau pangan diri.

Ari dalam telaga minyak ti baru ditemu nya di Bintulu, baka ti kala udah ditusui kami, udah diberi ngagai proksi dagang iya, Rimbunan Hijau (80%) lalu mega ngagai Petronas (20%) ba sebengkah sempekat belalai ari rakyat Sarawak.

Rimbunan Hijau udah balat bendar ngeruga kampung di menua Sarawak lalu mega bulih lisin muka kebun dandang besai sawit, tang nama penguntung pulai ngagai orang Sarawak empu?

Lalu diatu, bakih dagang kunsi Taib nya nyau bulih mega bagi ba telaga minyak ti baru ditemu nya, nama agi utai dikarapka bala orang Sarawak ari pengawa nya?

Diatu, pengawa ti ngiga telaga minyak baru atas darat di Miri benung chakah dikereja, ti diuluka Petronas. Kini ke penunga penguntung ari pengawa nya ila?

Ba adat menua Sarawak, semua reta dalam menua Sarawak patut dikuasa menua nya empu, diperundingka dalam menua nya empu. Tang ni maya pekara nya dipejuraika dalam rumah Dewan Undangan Negeri Sarawak? Nama pemutus jurai, lalu bepelasarka nama bansa tender? Nama kebuah enda tau enda Petronas sekali agi diberi bagi dalam pengawa ngulihka minyak enggau gas nya?

Nama kebuah ke semua duit untung nya dipasukka ngagai kuchik bala sultan BN di Kuala Lumpur enggau di Kuching aja?

Laban Taib enggau bala bakih iya dalam BN diatu udah ditemu berumpakka pengeraja asal menua Sarawak enggau nyata ba mua mata, kami ngansak rakyat Sarawak nagang pengawa ti kali ketiga tu ari terus dikereja sida.

Maya bepilihbesai tu ila, kami minta bala pengundi enda tau enda meri sukung ngagai sapa-sapa pengari ti besemaya deka ngengkahka penguntung ari minyak enggau gas menua tu ke dalam tabung mensia mayuh di menua tu empu, sebengkah tabung ti tampak lalu dipejalaika enggau chara ti terang sereta lurus ngarika rakyat Sarawak empu.

Numbas mih rakyat ngarapka diri ulih meda akaun resia, numbas mih meri pengarap ba Petronas lalu numbas mega mih meda BN ngerumpak pengeraja asal menua!