Dikutuk Taib! - Aku Ukai Beniat Baka Nya, Ku Serebana Masing

Dianu Taib? James Masing ngutuk penarang berita!

Baka ti disadang Sarawak Report, James Masing udah dikutuk bos BN iya laban didinga ngemeranika diri madahka 12 iti tekat ti diperambu dalam projek SCORE nya enda beguna.

Dalam timpuh beberapa jam sepengudah iya ti ditanya siku pengarang berita ari agensi berita entarabansa AFP, Menteri Pemansang Tanah nya lalu diasuh ngatur aum media laban udah kelanjur mansutka “penerang”.
Iya ngutuk pengarang berita AFP laban penyaru pengarang berita nya ti udah ngerekod jaku penerang iya lebuh ti ditanya nya.

Baka ni James Masing nerangka reti jaku iya empu dalam jaku English ti direkod pengarang berita bejaku English nya?

James Masing diatu belabuh berasai takut sereta nangi laban parti iya udah majak lenyau pengarap enggau sukung ari bala pengundi ketegal dikeruga projek tekat ai.

Iya udah nerangka penemu enggau jaku bantah bala orang mayuh ti nyakal projek-projek tekat ai di menua Sarawak.
Lalu James Masing mega ukai semina mansutka jaku iya nya ngagai pengarang berita AFP. Ba sehari nya mega iya bisi nyebut jaku ti sama ngagai pengarang berita Star, enggau besakalka sara penemu Taib Mahmud ti madahka SCORE enda tau enda dipajakka laban dikena ngulihka kuasa elektrik ti murah.

Kenu ku iya, dalam jaku saut iya nya iya nadai nyebut leka jaku ‘nentuka’ tauka ‘bejalaika’. Lalu ari nya, James Masing deka ngalahka diri enggau chara nyebut reti jaku iya nya udah ‘salah tusui’ pengarang berita AFP nya, taja pan iya udah mansutka saut ti sama ngagai dua iku pengarang berita ba endur ti enda sebaka? Terang bendar nama kebuah James Masing beserebanaka jaku diri udah saru tusui lebuh ti ditanya pengarang berita. Taib Mahmud udah ringat lalu ngasuh iya matak pulai jaku penerang iya nya.

Penerang James Masing nya udah nyadika batang berita ti ngaku utai ti ditemu semua orang, ti endur menua Sarawak enda begunaka tekat ai atas semua sungai dikena nyukung pemansang ekonomi enggau sosial laban penyampau tubuh rakyat nguan menua Sarawak enda mayuh.

Baka nya mega pengawa ngaga tekat ai nya nadai ditemu udah digagaka pansik pasal empas ngagai rampa menua tauka sosial (EIA) ari sebarang gerempung.
Tang, perintah Taib Mahmud udah enda besabi penemu, ti endur 12 iti tekat ENDANG tetap deka digaga lalu 50 iti da agi benung diperambuka.

James Masing udah diasuh matak pulai semua jaku penerang iya enggau penyaru penemu iya ba projek SCORE ti benung dipejalaika nya.

Idris Buang – “utai ti diguna deka digaga dulu lalu melakangka utai bukai”

Taib Mahmud endang enda beniat deka ngubah perambu iya. Aram kitai sama-sama ngambi kira jaku penerang ti udah kala dipansutka pengari Sarawak Energy Berhad, Idris Buang dalam program Dateline ari menua Australia bekaul enggau SCORE bedau lama tu udah.

Idris Buang udah madahka Tekat Baram DEKA belabuh digaga dalam taun 2014, taja pan pansik EIA bedau dipejalaika.
Lalu beserimbai enggau nya Kepala Eksekutif dalam SEB ke Taib Mahmud, Sjotveit, siku orang bebansa Norway, endang seruran madahka pengawa ti ngaga semua tekat ai di Sarawak nya beguna bendar dikena nyukung pengawa ‘pemansang’.

Nengah beberapa iti email iya, Sjotveit udah bebendar madahka ngagai orang di Sarawak nya iya nemu utai ti manah ke guna sida lalu sida patut neladan ‘chunto Norway’ lalu ukai mantah sebarang utai ngena penemu lama sereta mar diperetika.

Arapka aku, aku tu bebansa Norway – Sjotveit nerangka iya nya siku orang ti udah ‘chukup umur’ ukai baka sekeda bala orang ti semina nyakal projek tekat nya.

Jaku penerang ari bala orang Taib Mahmud kemari bebida bendar enggau penerang enggi James Masing. James Masing tau dikumbai betul laban tekat ai nya patut digaga enti bisi peminta ke guna iya. Iya mega tau dikumbai betul laban iya ulih nerima penemu enggau jaku bantah tauka jaku sakal ari bala orang ti ngenggaika projek nya. Lalu iya mega dikumbai betul laban iya takut lenyau sukung enggau undi laban dikeruga projek ti nadai guna nya.

Tang, perintah menua ti betuaika Taib Mahmud enggau mega petunggal iya, Abdul Hamed Sepawi, ti ngemataka kompeni SEB, udah mutus penemu nya SEMUA tekat ai dipeguna bendar lalu patut nyeliahka utai ti bukai.

Agi mega kompeni-kompeni baka CMSB (enggi sida Taib Mahmud sebilik), Naim Candera (enggi Hamed Sepawi) enggau Sarawak Cable (enggi anak Taib Mahmud, iya nya Abu Bekir), semua nya bepanggai bendar ba projek-projek tekat ai enggau sebarang pengawa gudang ti begunaka kuasa elektrik hidro ti murah.

Tang, lebuh iya matak pulai semua jaku penerang iya nya, James Masing mengkang nandu semua sara penemu iya.

Jaku penerang ti ngenyarutka runding – sekali James Masing madahka jaku diri udah salah tusui orang, lalu ba maya bukai iya nandu jaku iya madahka “tekat ai semina deka digaga enti bisi peminta”

Ba siti maya iya nuduh pengarang berita udah saru tusui penerang iya lebuh ti ditanya pasal SCORE, lalu ba maya bukai iya ngenanka sara penemu iya madahka semua 12 iti tekat ai nya enda diguna tauka enda majak digaga.

Ke bendar iya, lebuh iya matak pulai penerang iya nya, James Masing udah meri reti ti ngumbai Tekat Baram ti ngeruga nya, baka ti disebut iya ngagai pengarang berita AFP, deka majak digaga, engka enda digaga sekali!
Lebuh ti bejaku ngagai Borneo Post, James Masing bisi didinga nyebut “enti bisi peminta, kami nyangka deka ngaga dua itu agi [tekat ai] – di Baleh enggau di Baram”.

Nama penyadi ngagai penerang kompeni SEB ti madahka pengawa ngaga tekat Baram deka belabuh digaga dalam taun 2014 lalu peminta ke tekat nya enggau tekat ti bukai nya “deka dikenuluka ari pekara ti bukai”?

Ke bendar iya, udah iya dipejal Taib Mahmud bebulaka jaku penerang ti endur iya betanyaka pasal pemanah SCORE, James Masing udah tepekul lalu ngamatka batang berita, lalu mega nandu semua jaku penerang iya ti dulu ari nya, ti endur iya ngumbai semua perambu projek tekat ai di Sarawak nya nadai udah dituliska atas batu.

Pengerusak ti udu dikutuk – Baram deka napi nasit ti sebaka enggau Bakun.

Iya udah madahka pekara ti benung angat dikerandauka orang diatu, iya nya Tekat Baram, nyengka deka diketuka terus!
Nama pengamat ti manah agi dikena BN ti benung bebelah bagi diatu lalu charut entara diri sama diri pasal SCORE nya?

James Masing udah udu dikutuk tuai iya, tang iya mengkang nguji ngenyauhka parti PRS iya ari projek mapap Taib Mahmud ti terang bendar enda popular ba bala pengundi sida, ti tau ngeruga semua enam iti kerusi ba sitak Dayak di Sarawak.

Bala pengundi sida deka nyeliahka jaku penerang James Masing ti nyarutka runding nya. Iya udah putus pengarap ngasuh bala pengundi iya pechayaka BN nyangka deka badu agi bejalaika SCORE, lalu enti projek nya diketuka sekali, maya iya bedau temu.

Tang enti PRS enggau BN diberi peluang megai perintah baru, Taib Mahmud nya meh orang ti deka mutuska semua penemu, ukai James Masing – laban iya semina ngereja pengawa nitihka asuh.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments