11 Feb 2013

Penanggul Tekat BN Di Menua baram!

This post is also available in: English, Malay

Ba bepilihbesai ikas perintah besai nyin kemari Taib udah enda ibuhka tanggungpengawa iya nemuai ngabas bala pengundi di pelilih menua Baram.

Ba taib, Baram nya nyadika pun penatai kayu batang ti ulih dikeruga iya, enggau chara meri lisin nebang kayu ti besai bendar rampa ngagai bala kroni iya baka kompeni Samling enggau bala kaban politik iya ti ulih dipichit iya sepeneka ati, seraya ke sida nejuka bala orang bansa asal idup merinsa.

Siku ari bala orang politik iya nya Jacob Dunggau Sagan, kaban parlimen (MP) ari sitak Baram ti mega nyadi Sapit Menteri Pengawa Dagang enggau Industri ba ikas Perintah Besai.

Jacob Sagan udah taluk bendar ngagai Taib enggau chara ngarika sitak Baram dalam pengelama beberapa penggal tu udah bepayungka parti SPDP iya, lalu iya udah ngayanka penaluk diri enggau chara nyual bansa asal diri empu ti diarika iya dikena iya nyembah tuan iya semanjai maya.

Jacob Sagan seruran ngayanka sukung iya ngagai Taib dikena ngemelika bala orang bansa asal di Baram, enggau chara mansutka jaku pasal penumbuh projek Tekat Baram!

Orang diri melaki-bini ti rangka – dikena Taib malas sukung seduai ti udah nyual rega bansa asal seduai empu di Baram, seduai tu diberi lisin ngulihka kayu belian dikena ngulihka untung ti manggai bejuta-juta ringgit.

Tang lebuh Jacob Sagan chakah bendar muji-muji semua perambu Taib tu, ti deka ngerusak semua rumah enggau genturung pendiau raban bansa asal, nyengkaum genturung pendiau penatai iya empu, Sarawak Report udah kala mantaikan upah ti diterima iya ari Taib Mahmud.

Ba taun nyin kemari kami udah mujur mantaika bakani MP ti rangka nya udah enggau chara belalai nerima mayuh bendar lisin nebang kayu belian ari kampung ba pelilih menua iya empu.
Tambah mega, kompeni Dema Tega, ti enggi sedua melaki bini begulai enggau ipar iya, bisi nerima mayuh kontrak ari perintah menua Sarawak ti manggai RM60 juta!

Tang sekumbang Jacob Sagan enggau sida sebilik nyadi betambah kaya, iya udah enda ibuhka bala pengundi iya empu dikena sida ngelindung sida empu ari projek tekat Baram ti disadang deka ngampuhka menua sida.

Bala pengundi di Baram udah mutuska runding sida ngiga bantu ari raban ti kempen ari PKR, Roland Engan, ti seruran besemaya deka mantu sida nagang pemansang projek tekat Baram nya.

Kompeni Winjac Sdn Bhd enggau Milisha Sdn Bhd – enggi Jacob Dunggau Sagan seduai bini iya, Winnie Jolly, enggau anak indu seduai.

Jacob Sagan udah nguji bebulaka jaku tuduh penyalah makai suap di belakang pemuntan pengawa iya nyaga pengelikun orang bansa asal menua iya ari keruga projek SCORE, tang ngena air ari sungai Baram pan enda meh ulih dikena iya masu penyalah nya.

Kompeni Winjac enggau Milisha enggi dua iku orang melaki bini tu udah direkodka nyadika penerima mayuh lisin nebang kayu belian baka ti udah ditiriska nengah kar kampung ari Opis Kampung (ti endang patut ditemu mensia mayuh). Beratus-ratus hektar pemesai rampa kampung kayu belian udah ditebang sida MP tu sebilik.

Ba luar rumah dunju enggi orang diri sebilik ti merinsa ti diau semak tekat Bakun – taja pan tekat hidro elektrik didirika semak endur sida tu diau, anang ngarapka diri bulih kuasa elektrik, taja pan pechuma.

Empas ari jaku bantah bala orang di pelilih menua nya, lebuh sida udah enda liat agi ati ngemataka kampung enggau rampa menua sida dirusak pia aja.

Bantah ari raban bansa asal udah semakin majak di semanjai sungai Baram. Ngelama tu Kepala Menteri udah mujur bendar nguasa lalu mechahka sida, tang projek tekat ai Baram nya udah ngempung sida angkat ngelaban BN.
Raban-raban NGO rampa menua baka sida Save Rivers udah mujur bendar ngumpul mayuh petisyen tauka jaku bantah lalu ngelumuka orang bansa asal lalu gelumbang ubah ba sukung politik sida udah betukar nyadi ‘Gelumbang Baram’.

Ba pun pengawa nya, Jacob Sagan, Tuai SPDP William Mawan enggau Kepala Menteri Taib Mahmud udah belabaka sida ulih mampul pending diri ngambika enda ninga orang ti ringat ngagai sida, lebih agi maya sida mutuska runding sida nangguhka projek tekat Baram nya nyentukka udah tembu bepilihbesai tu ila. Tang bantah ari orang bansa asal menua nya endang majak diteruska sida, lalu diatu Jacob Sagan enggau Taib Mahmud nyau belabuh mereti ke diri udah napi pemuntan.

Petisyen – keterubah kali bala orang di Sarawak berani angkat ngelaban penemu BN lalu bejaku nyukung perintah ti baru – sida mansutka penemu diri nengah Radio Free Sarawak!

PKR, Roland Engan enggau raban-raban NGO rampa menua baka Save Rivers udah chakah bendar kempen enda ngira diri lelak lalu terang bendar bala orang di Baram udah enda arapka semaya projek SCORE ari BN, tang sida manggaika pengarap sida ba raban parti penyakal dikena sida ngetuka semua projek nya!

Penerang nya, enti diguna, tau didingaka ninting hari nengah Radio Free Sarawak (RFS nengah gelumbang angin pandak) ti endur orang biasa, tuai-tuai raban bansa enggau sekeda orang ti tebilang nyau belabuh berani ngutuk Taib Mahmud enggau Jacob Sagan enggau pekat seduai ti deka ngampuhka rampa menua Baram.

Ngulihka sukung – PR ngelaban sebarang pengawa ngaga mayuh agi tekat hidro elektrik di menua Sarawak.

Nya alai diatu kami nemu Taib Mahmud udah belabuh ngaga pemutus runding ti ngenyit. Iya udah nemu kira-kira iya udah salah ti udah ngujungka penanggul tu udah nyadi. Nya kebuah iya mansar diri nepan bilun engkabang ti disewa ngena duit tabung mensia mayuh enggau pemayar chukai laban deka nemuai ngabas bala pengundi ti benung ringat lalu mutarka penanggul ti endang udah balat nyadi di menua Baram nya.

Bilun engkabang bebansa Seafarer nya disadang sangkai di menua nya kena 23hb Februari tu ila. Enggau nya kami meri penemu ngambika Taib nemu penemuai iya nya udah kelalu laun endur ngemanahka sukung mensia mayuh di Baram, lalu sekali ke diktator tuai ti kelalu sumbung nya deka ngetuka semua projek gerasi iya?

Lutak ti bebau but ti benung betakat ba sungai Balui ketegal tekat Bakun, udah mejal bala pengereja pengawa pindah ninggalka menua nya.

Tang, terang bendar Taib seruran ngumbai diri ti nemuai ngabas bala orang ti udah lama bendar ringat ngagai iya nya tau ngemanahka kaul iya enggau sida nya. Iya udah nguji enggau naka ulih ngulihka pechaya bala orang dikena iya ngemanahka diri nyadi tuai ti nelap. Tang orang udah nemu iya siku tuai ti majak enda ulih dikarapka agi lalu iya empu udah putus asa. Penanggul ti pemadu besai nuntung Taib nya bala orang Baram diatu nyau beratika sekeda chunto penanggul ti nuntung raban bansa asal di menua bukai ti digagaka tekat ai di Sarawak
Bala orang di Batang Ai Lubok Antu nyentuk ke sehari tu udah 30 taun dikeruga tekat ai lalu bedau nerima pampas ti chukup, lalu pia mega orang di Bakun di menua Belaga, diatu benung tepekul di Sungai Asap udah 10 taun datai di menua nya.
Diatu raban bansa asal ti diatu nguan sepemanjai sungai Balui napi penusah rampa menua ti baru.
Ba minggu nyin kemari ai ti belutak ari Bakun balat bendar bebau but udah anyut tama ngagai batang sugai sida, lalu bau but ari sungai nya udah ngujungka bala orang di menua nya pindah.

Meri penerang ngagai orang bansa asal – gerempung NGO rampa menua udah betindak dalam pengelama bebulan-bulan, tang baru diatu Taib deka ibuh.

Bala saintis udah madahka bau but sungai ari Bakun nya deka terus baka nya (reti nya seagi-agi tekat Bakun nya dikena). Sungai ti udah kamah nya lama udah munuh semua jelu dalam ai enggau jelu darat ti bepanggai ba ai sungai nya.

Taib seruran ngumbai diri ulih nugungka pengeraja iya enggau chara nekat ai sungai di menua Sarawak lalu nirika gudang ke bala sida sebilik.

Pengawa nya ukai semina ngujungka penanggul ke rampa menua di dunya tu, tang mega pengidup orang bansa asal di Baram ti ngenggaika penanggul nya betandu di menua sida.

Enggau nya, baka ni meh gaya sambut ti disadang Taib lebuh iya nemuai ke Baram kena 23hb Februari tu ila, enti iya berani nemuai kia, lalu ni pemayuh raban polis deka diasuh iya bejaga di menua nya?

Taib udah tentu deka napi penanggul ti datai ari iya empu di menua Baram, tang iya tetap enggai meretika, taja pan sebagi ti mimit ari penanggul nya.

[Tuai penyakal Malaysia PKR, Anwar Ibrahim deka nemuai baru ke Baram kena 11hb Februari tu ti disempulang Tuai PKR Sarawak, Baru Bian]

Sign up to receive regular updates from Sarawak Report

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments