‘Politik Duit’ - Bakani Riman Makai Raban bansa Dari Atas Nyentuk Ke Baruh

• 25 Feb 2013
• BM 翻译

Skandal ‘Politik Duit’ di menua Sarawak udah mujur ngusaika sebengkah berita ba minggu tu tadi ti endur baka ni siku sekretari ke Menteri SUPP, Francis Hardin Hollis, udah mujur enchuri elaun bantu pemeri ari perintah Sarawak ngagai siku orang ti timpang pendiau (OKU) ba sitak bepilihbesai iya.

Indu ti jai ati sereta rangka nya udah madah ngagai Ho Tiong Hwa ari Sri Aman nya, duit bantu iya udah diketuka perintah beberapa minggu bantu nya dikeluarka.

Tang udah nya penerang bisi nunjukka Puan Ling, ti bekereja ke Francis Hardin dalam beberapa taun ti mega nyadi siku kaban Sayap Wanita SUPP, udah belalai muka akaun bank resia ke Ho awakka bisi dikena iya ngeluraka duit bantu OKU ke guna iya empu.

Elaun bantu OKU nya semina RM250 sebulan, tang semua penyampau ti udah dipasukka ngagai akaun iya nya RM26,000 dalam pengelama beberapa taun, ti udah dicuri kerani ari OKU ti enda bidik nya.

Nitihka penerang ti direkod nengah kamera litar (CCTV), sida bank nya udah tetemuka Puan Ling suah udah ngeluarka duit bantu Ho nya enggau mudah.

Tang, raban polis ti udah dipadahka pengari DAP, Leon Donald nya, lalu bedau muka kes penyalah Puan Ling nya. Sekali ke kita diatu benung meratika penyalah nabanka duit nya patut ditagang raban polis ti neritka undang-undang udah ditangguh-tangguhka ketegal empas politik duit ti dikereja bala orang BN nya?

Tindak SUPP sepengudah berita nya ayan ba suratberita ninjukka pasal utai ti patut ditemu kitai pasal BN ti rangka nya.

Ari ti ngeripotka kes nya ngagai polis, YB Francis Hardin udah enggau chara belalai nemuai ngagai rumah Encik Ho berandauka pekara nya enggau tuju deka nutup skandal nya ari ti ditemu orang mayuh.
Ari nya, udah sida tembu berandau, nama atur YB nya enggau orang ti timpang pendiau nya? YB nya udah besetuju mayar ganti rugi SETENGAH ari penyampau ti udah dichuri sekretari iya nya!

Tu nyadika buah runding iya dikena iya nguji ngelamun skandal sekretari iya nya.

Pengari DAP, Leon Donald, udah madah ngagai Radio Free Sarawak, penyampau ti dibayar ke ganti rugi nya udu ngasuh tekenyit ati sereta mega ngasuh ati nyima.

Tu ukai ke terubah iya orang ti timpang pendiau dikeduan bala kaban politik BN. Bala YB tu udah enda ingat ke tiap iku orang bisi kuasa nerima sebarang bantu ari perintah lalu tanggungpengawa ngatur bantu nya endang dikereja bala pengari politik sida.

Mong Dagang mega siku YB ari Sri Aman, bedau lama ti udah, bisi ditemu ngetuka bantu elaun ngidupka diri Frusis Lebi ti timpang pendiau, semina ketegal Frusis bisi ditemu iya ngamalka kuasa demokrasi iya nyukung parti penyakal!

Enti orang baka Mong Dagang enggau Francis Hardin nya udah beduan raban OKU baka nya, nama utai dikarapka kitai ari bala pengereja pengawa di baruh sida?

Ke bendar iya, sekretari ke Francis Hardin nya udah nunda pendiau enggau ulah bala tuai dalam parti iya. Laban Sarawak Report udah nusui baka ni YB Mong Dagang udah ditemu beduan bala pengundi iya di Sri Aman bekaul enggau penyalah ngerampas tanah NCR sida.
Kami udah nusui baka ni Mong Dagang belabuh enggau mejal bala pengundi iya masuk sekim dagang kunsi, ngambi tanah adat sida lalu besemaya sida deka bulih bagi ti lurus ari pengawa nya.

Udah nya Mong Dagang ngena penuduk politik iya minta duit suap ari ‘dagang kunsi’ nya, lalu meri arah ngagai sapa-sapa ti begunaka tanah nya enda tau enda mayar lebih ari RM1,000 seekar ngagai kompeni enggi bini iya empu ti bekunsi enggau menyadi bos politik iya, James Masing lalu mega enggau bini calon PRS ke Ulu Rajang, Wilson Ugak Kumbong (iya nya sekretari ke James Masing dulu suba)!

Kompeni sida nya, Noble Rewards Sdn Bhd lalu kami udah nganggarka ke tiga-tiga iku kaban politik BN nya endang beniat deka ngulihka RM70 juta enggau chara nipu bala pengundi ba sitak bepilihbesai sida.
Nya alai lebuh bala bos BN nya udah besedia ngereja pengawa ti jai nya lalu ngayanka penyumbung sida ngagai OKU, kitai enda alit ati enti sekretari tauka kerani sida mega beniat deka beduan OKU ti patut dikemataka sida nya.

Agi mega, taja pan enggau semua penerang ti udah diayanka kami ditu dulu ari tu, nadai siku ari tiga iku kaban politik PRS/BN nya ditangkap polis bekaul enggau skandal Noble Rewards, tauka kena pansik parti sida empu tauka BN.

Enggau nya mega, kitai enda alit ati enti Puan Ling udah nipu sereta beduan Encik Ho Tiong Hwa, ti udah datai ngagai opis YB nya laban deka betanya sereta minta bantu pengelantang, enda salah-salah pengawa nya udah suah dikereja iya lalu iya seruran ngumbai diri ulih nabanka semua bantu nya.

Jaku sempama lama ti madahka baka siku bangkai ikan, iya deka muruk dalam raban bansa ari atas nyentuk ke baruh.

Enggau nya, manah agi kitai meratika bos ke Mong Dagang, iya nya presiden PRS, James Masing, ti dibelit penyalah makai suap dalam kompeni iya, Noble Rewards.

Enti James Masing nya siku tuai ti endang amat lurus ati iya tentu enda salah guna kuasa iya ti nyadi Menteri Pemansang Tanah dikena berampaska tanah pesaka orang, lalu iya enggau bala bakih politik iya ulih minta duit suap ari bala kaban dagang kunsi iya.

Pia mega, bos Francis Hardin ke dulu suba, George Chan udah ngereja penyalah makai suap sereta ngadai nasib rakyat iya empu. Lebuh iya agi nyadi Sapit Kepala Menteri enggau mega Menteri Pengerai Mensia Mayuh iya udah meri kontrak dikena meli perengka perubat enggau pengerai ke Hospital Jantung Sarawak ti baru ngagai kompeni enggi bini simpan iya ti agi biak sereta nadai penau tauka pengelandik ba pengawa perubat enggau pengerai.

Iya udah balat bendar dikutuk lalu diukum bala pengundi iya ti mechat iya ngena kuasa undi ba bepilihbesai taun 2011 suba.
Tang kitai patut merening selangkah ke mua. Tuai BN Sarawak iya nya Kepala Menteri Sarawak empu, Abdul Taib Mahmud. Iya nguasa semua penyukung politik iya enggau chara ngaul sida dalam pengawa makai suap.

Dalam raban sida nya, Taib Mahmud enggau bala kroni iya udah nebang mayuh rampa kampung di Sarawak lalu ngerebut semua pugu share ngena amal kamah sida.

Udah iya ngeruga kampung enggi rakyat iya, Taib Mahmud mega ngampas tanah enggi sida ti udah nya lalu dibuka ke kebun sawit bedandang besai. Berebak enggau nya, rakyat menua Sarawak mengkang idup seranta lalu semua duit menua lenyau pia aja.
Kitai tentu enda alit ati enti James Masing mega bisi niat nipu bala pengundi iya, nya alai penyalah makai suap lalu ngerampit bala orang ti di baruh sida, nengah bala YB enggau tuai-tuai raban bansa nyentuk ke ngagai sekretari sida, baka Puan Ling, ti udah ngiga chara beduan sereta menyati OKU ti seranta.

Siku komentator politik ari menua Britain, Mathew Paris, bedai lama ti udah kala ditanya ba radio BBC ti endur iya nerangka nama kebuah orang di menua UK deka masuk pengawa politik. Lalu laban iya ti endang orang politik, Paris enda mansutka penemu ti kelalu lunggar. Iya udah bejaku pasal sekeda personaliti ti minta perati orang bukai lalu mega sida ti besedia nanggung risiko, tang mega sida ti dikangauka mangku tanggungpengawa ti mulia nya.

Taja pan munyi nya, enggau chara nyengala iya nyebut “Nadai siku orang masuk dunya politik ketegal deka ngulihka duit, laban dalam dunya politik nya endang nadai duit”.

Sebarang sapa ti ditemu ngempuruka pengeraja bejuta-juta ringgit, baka Taib Mahmud enggau bala kaban politik iya ke bukai, patut didawa dalam court lalu diukum jil ba timpuh ti lama.

Tang di menua Sarawak dalam perintah Taib Mahmud, tuju KE BENDAR sida masuk dunya politik nya ketegal deka ngempuruka pengeraja enggau chara beduan sereta menyati rakyat sida empu.

Personaliti-personaliti ti rangka ti tetarit ati ngagai politik nya semina ketegal deka ngempuruka bejuta-juta ringgit enggau chara ngerampas duit agih ti patut dikena ngaga jalai alun ti manah, bekal elektrik, ai beresi, mantu nembiak besekula, ngintu pengerai mensia mayuh lalu ngulihka pemisi ke sida empu.
Uji kitai meratika skandal ngaga sistem pemuai utai kamah ti lama bendar udah dipejalaika di Kuching. Siku lelaki udah mati laban kerita ti dipejalaika iya udah labuh ke dalam lubang ti enda betutup enggau diraga enggau manah – kes bebadi ti ketiga ba projek ke sama.

Atur pengelikun ti enda manah ukai ngasuh kitai tekenyit lebuh kitai ngambi kira Kepala Menteri ti udah meri kontrak nya ngagai menyadi indu iya, Raziah Mahmud, ti udah nya ngambi RM78 juta ari kesemua ungkus projek nya ke iya empu sebedau iya nyerahka projek nya ngagai bala sub-kontraktor iya.

Di menua Malaysia tu mih ti dikumbai orang “politik duit”. Mensia di serata dunya ngumbai penyalah tu makai suap lalu tiap iku orang udah kena tinggang penyalah tu, semina sida ti ngereja penyalah tu.

Raban parti penyakal udah netapka deka ngapuska penyalah ‘politik duit’ lalu bala pengundi dikangauka awakka ngukum BN ti udah teleba sereta tebalan ba pengawa nipu enggau chara milih ubah mechat bala YB ti madahka diri deka mayar ganti rugi setengah ari duit bantu OKU ti ditabanka sekretari iya nya.