Latest Stories
Sections
Ngerituk. Taib Mahmud mansang ngabang mai beg puang dikena mupu.
Enti nuan nya siku tauke kayu batang lalu nuan nyambut Taun Baru China, pengerami nuan deka rusak ketegal penatai Taib Mahmud sebilik ngabang ngusung rumah nuan, lalu bepintaka ‘Ang Pau’.
Ba taun tu, baka ti ngelama tu, Taib Mahmud udah ngabang sebelah menua Sibu, bepintaka duit pemeri dua kali lipat mayuh agi dikena iya napi pengawa bepilihbesai, lalu pemeri ari bala tuai bilik bansa China ti ditiki iya ngabang nya enda tau laun disuaka.
Lalu iya mega minta pengasih ti dalam mata duit ti mayuh bendar ke sida sebilik lalu mega ke bala penyukung iya.
Isi berita ti mayuh agi ditusui ba surat-suratberita nya baka ni Taib Mahmud mega bisi ngabang ngagai rumah ‘orang biasa’, ti dikarapka iya ngayanka mua ti gaga, taja pan sekeda bala orang nemu penanggul ti ditapi Raja Makai Suap Sarawak nya.
Tang, Kepala Menteri nya endang nuju rumah sekeda orang diri sebilik ti endang selalu digusung iya maya pengerami nya, sida ti seruran diberi iya lisin ngulihka kayu batang enggau pengawa muka kebun dandang besai sawit dikena sida ngulihka penguntung ti mayuh agi.
Iya suah udah merah kantung pemisi sida, lalu iya nemu, enti nadai sukung ari iya, ti nerima duit suap sida, bala taukey nya nadai endur bulih penatai pemisi ti mayuh, nya kebuah iya enda tau enda merah sida enggau naka ulih dikena melanja pejalai kimpin ba bepilihbesai iya.
Sida Tiong sebilik nyadika Taukey Kayu Batang Sarawak ti Klasik – siku ari seduai menyadi tu bejalaika pengawa dagang, lalu siku nyadi MP ti mega nyadi orang kanan ke Taib.
Atur penemuai Taib Mahmud dalam pengelama 3 hari di Sibu nya diisi enggau pengawa ngabang iya ngusung rumah bala taukey kayu batang baka ba taun-taun ke udah, ti nganti diri kena perah kantung pemisi sida, ngambika udah nya bala orang ti kimpin ke iya tau belabuh ngagihka duit nya dikena nyuap bala pengundi iya lalu ngelalau sida enda tau enda ngundi BN.
Nitih ke penerang dalam suratberita Borneo Post, penemuai Taib Mahmud ke terubah nya niki rumah orang kaya Lau, siku orang dagang ti bempu kompeni KTS.
Vincent Lau nya siku ari pengari SUPP/BN ke musim bepilihbesai ari Sibu, lalu sida sebilik ti bukai nya udah nyadi pengari di menua Sibu dalam pengelama beberapa taun tu udah, nyentukka ngagai maya Wong Ho Leng dari DAP mujur ngalahka sida ba bepilihbesai taun 2010 nyin kemari.
Wong Ho Leng diatu benung sakit balat, lalu penanggul nya udah nyungkak penyarut dalam parti DAP, lalu ari nya Taib Mahmud belabuh belabaka diri ulih ngena peluang nya ngambi pulai sistem lama iya, ti endur bala kroni kayu batang iya ulih nyukung pejalai pengawa politik iya.
Udah iya tembu ngabang ngagai sida Lau sebilik Taib Mahmud lalu diatur ngabang ngagai sebengkah agi raban orang diri sebilik ti besai bendar guna ba iya, Tiong Thai King ti bempu kompeni Rimbunan Hijau. Tiong Thai King nya siku kaban MP lalu menyadi iya nyadi bos dalam kompeni kayu batang ti pemadu besai di menua Sarawak, ti baru udah nerima konsesyen ngulihka minyak ba atas darat menua Sarawak ari Taib Mahmud.
Pemeri rambau pengerami nya ukai semina chukup ke guna BN – tang pemeri nya ulih dikena Taib Mahmud nyuap bala pengundi iya dua kali lipat mayuh agi ari ti ngelama tu.
Tiong Thai King bisi ditemu ngeruga tanah NCR bala orang bansa asal di sitak bepilihbesai iya empu. Lebuh bala orang di Sungai Pelugau betemu enggau iya ngambika nagang pengawa kompeni Rosebay Enterprise nebang kampung lalu muka kebun dandang besai sawit di menua sida dia, sida berasai asa laban pengari sida nya enda ningaka serebana sida.
Lalu lebuh kes penyarut nya dibai ngagai court, terima kasih ke bala lawyer ari parti penyakal, sida nemu Tiong Thai King nya siku ari orang ti megai share besai dalam kompeni Rosebay Enterprise nya! Engka iya ngumbai diri agi bulih sukung bala pengundi iya ngena duit suap ngambika iya ulih majak bejalaika pengawa nebang kayu batang ba kampung sida.
Bakih politik – pemeri ti besai agi ngagai Taib Mahmud ari sida Hii sebilik.
Tang bala pengundi di menua Sarawak diatu udah menchelak sereta meretika chara sida Tiong sebilik ngulihka pengeraja ari ti nyuap Kepala Menteri nya enda salah-salah baka pengawa bala apek bayat ti berampaska tanah enggau kampung orang bansa asal menua nya. Lalu udah iya tembu ngabang ngusung rumah sida Tiong sebilik, iya lalu ngusung rumah sida Hii sebilik ti mega nyadika siku bakih di manah bendar kaul enggau menyadi indu iya, Raziah Mahmud.
Taib Mahmud diatur berami makai malam ba Hotel Kingwood enggi sida Hii sebilik. Kami bisi mayuh bendar penerang ke kaul entara kompeni sida Hii sebilik enggau kompeni enggi sida Taib Mahmud sebilik.
Kompeni Mesti Bersatu, ti endur Taib Mahmud empu nyadi Pengarah lalu mega pemegai share pemadu mayuh, nyadika orang ti sama bempu kompeni Delta Padi begulai enggau kompeni enggi sida Hii sebilik, Fonsen Holdings. Delta Padi udah mujur bulih siti kandang kampung paya bakau ti besai bendar rampa ari perintah Sarawak dikena ngemansangka projek nanam padi. Tang udah kampung dia abis ditebang, rampa menua ti tawas nya lalu dibali nyadi kebun dandang besai sawit!
Peratika kitai raban bansa Melanau ti nguan kandang menua nya, ti sama raban bansa enggau Taib Mahmud. Bala orang Melanau ti berikan ti merinsa nya udah puas beserebanaka pun penatai ai beresi sida nyau kamah sereta berachun lalu nadai agi endur sida nangkap ikan tauka dikena sida mandi. Kampung sida mega udah lengis ditebang.
Begambar sama-sama enggau orang ti enda belampung ati melanja pengerami Mandangka Fesyen Islamik Taib Mahmud di Monaco.
Sida Hii sebilik diatu benung kiruhka projek pemansang sida di menua Miri begulai enggau menyadi Taib Mahmud ti benama Raziah Mahmud nya. Kompeni sida, Rich Venture udah mujur bulih kontrak ti mayuh bendar ari perintah Menua Sarawak. Dikena iya minta balas budi, sida Hii sebilik udah diperah iya ngambika melanja pengerami ngayanka Fesyen Islamik di menua Monaco, baka ti dipelakuka Raziah Mahmud dalam taun 2010 suba.
Nyerumba pengerami nya sida Hii sebilik bisi meri bantu ngena sekeping chek $100,000 ti endur bini Menteri Besai, Rosmah Mansor diasuh nyuaka chek nya ngagai Putera Albert ari Monaco dikena nulung putera nya ngisi Tabung Rampa Menua di Monaco nya.
Raban sida Hii sebilik udah diperah iya dua kali lipat taun tu. Tang sida nemu pemeri sida nya endang senutuk enggau peneka sida begunaka lisin enggau kontrak ari Taib Mahmud.
Kitai ngarapka sida ti ngabang nya enda pengkelan makai utai.
Pengerami ti dipelanja sida Hii sebilik – tang semina siku aja diasuh tampak nyuaka chek atas panggau ngagai Putera Albert (dikena ngisi Tabung Rampa Menua)
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.