WEK! - Pengawa Bepilihbesai Ti Kamah Masing Ngeleseka Bala Orang Ti Bempu Tanah

Terima kasi ngagai James Masing ke duit bayar iya nya? Tu endang duit suap bepilihbesai BN ti datai ari tabung bala pemayar chukai.

Gamal bala orang ti bempu tanah ti merinsa ari pelilih menua Beluru tu terang bendar ngayanka bejuta reti.

Suratberita Borneo Post udah madahka orang Beluru nya “seraban orang ti andal sereta gaga ati” lebuh sida dipejal bediri bebala mayuh begambar seraya megai chek besai-besai ke bayar ‘dividen-dividen’ ba pengawa ‘dagang kunsi’ sida dalam sekim sawit di menua sida.

Ke bendar sida tu patut berasai malu laban dikemelika lalu ari gamal sida nya terang bendar mai reti penanggul ti benung nuntung sida.

Orang ti pengambis “gaga ati sereta andal” maya nya, iya nya Menteri Pengerampas Tanah, James Masing, ti nyadika tulang belakang pengawa nya.
Ba Masing enggau bala bakih iya dalam BN, dalam jeman ni sida nya idup ti endur sida ngumbai diri tau sepeneka ati nyuap mensia mayuh rambau bepilihbesai baka nya?

Betul tauka enda, enggau chara ngelumuka orang mayuh lalu mejal sida nyebut terima kasih bebala mayuh atas panggau ti besai ke pemeri duit ti endang enggi bala orang nya? Duit nya ukai ari kuchik James Masing lalu iya nadai kuasa magi-magi duit nya ngagai orang mayuh, lalu nadai siku mega orang dia tau dipejal meri terima kasih, tauka diambi gambar begulai enggau iya, enda salah-salah baka raban peminta sedekah ti nganti bantu ari BN.

Baka ni James Masing tau enda nemu tiap iku orang ti meda pengerami nya ti nyadika sebengkah pengawa ti ngemelika mensia mayuh lalu nyadika iya empu siku orang ti udu sumbung sereta tampak agi enggau chara begadaika rega diri bala orang di Beluru nya?

Enti iya agi sanggu tauka kakang ati iya patut meratika gamal bala pengundi iya ti udah dipejal iya ngeluluka diri, ngambika sida ulih nerima bantu ngena sebarang utai ti endang enggi sida empu.

Pengawa dagang kunsi? Bala orang ti empu tanah bulih dua-tiga ribu ringgit aja, tang James Masing bulih bejuta ringgit!

James Masing nya ke bendar iya siku penipu enggau pengerampas tanah, ti kala direpotka kami laban ngulihka duit suap enggau chara belalai ke tanah ti dirampas iya ari bala pengundi iya ti kenu ko iya, ‘sekim dagang kunsi’.

Kami kala udah mansutka but iya baka ni iya udah mujur bulih RM70 juta sama enggau bakih politik iya, Mong Dagang enggau Wilson Ugat ari sebengkah sekim di menua Sri Aman, ti kenu ko sida sekim dagang kunsi kebun dandang besai sawit, tang ke bendar iya, nya sebengkah tipu dikena sida ngerampas tanah ari bala orang di menua nya.

Gambar semak tu ngayanka sepuchuk surat resia ari Mong Dagang ti minta bayar ke tanah NCR dalam sekim ‘dagang kunsi’ nya. Mong Dagang empu udah nyemetak nentuka semua duit suap nya dipasukka ngagai kompeni-kompeni Noble Reserves, Noble Resources tauka Noble Rewards, ti enggi menyadi Masing, bini Wilson Ugat enggau bini Mong Dagang empu!

Tu surat ti disain Mong Dagang ti bisi ngaitka James Masing enggau Wilson Ugat ti orang politik sama-sama ngerampas tanah ti udah besalahka reti ‘dagang kunsi’ ukai dikena mantu ngemanahka pengidup bala orang di menua nya, tang dikena ngulihkan duit suap bejuta-juta ringgit ke sida empu!

Taja pan kala udah direpotka ketegal ngereja penyalah nerumpak orang raban bansa diri empu, kemari James Masing enda malu nemuai ke Beluru laban mai orang di menua nya berundingka pengawa ‘dagang kunsi’ lalu mega nyuaka cek-cek berega RM360,000 ti kenu ko iya nyadika dividen ‘dagang kunsi’ ngagai 72 iku orang ti bempu tanah di menua nya!

 

 

 

 

 

 

 

 

 

Bakih iya dalam pengawa ngerampas tanah orang, Mong Dagang – enggau Wilson Ugat, siku pengari ti deka didirika ngarika BN ba sitak parlimen Ulu Rajang ti mujur bulih duit suap bejuta ringgit.

Aram kitai sama-sama ngaga kira-kira – saut ke 360,00 dibagi enggau 72 nya RM5,000 ke siku-siku orang ti bempu tanah ti udah dipejal nyerahka tanah lalu masuk sekim ‘dagang kunsi’ nya. Projek nya endang datai ari penemu Menteri Pemansang Tanah empu, iya nya James Jemut Masing.

Uji bandingka penyampau RM5,000 enggau RM20 juta ke siku-siku ari sida nya – James Masing, Mong Dagang enggau Wilson Ugat dalam ‘pengawa dagang kunsi’ nya, sida ti endang nadai kuasa atas semua tanah orang nya!
James Masing nyadika kuasa pengerak di belakang dagang kunsi nya, enggau chara nyukung semua perambu Taib ngambi tanah-tanah NCR orang ngena chara pejal lalu mega mejal sida ngambi bagi dalam pengawa pemansang, tang, baka ti udah-udah, pengawa numbuhka kebun dandang besai sawit di menua Sarawak.

Ngerampas tanah tu udah dipecharaka lalu ditetapka nyadi sebengkah penyalah ba mua court pemadu tinggi di menua Malaysia. Tang Kepala Menteri Sarawak, Taib Mahmud enggau bakih iya, Menteri Pemansang Tanah, James Jemut Masing, udah enda ibuhka semua pemutus court nya. Seduai iya udah besemaya ngagai orang bansa asal madahka sektor pengawa bekebun dandang besai nya ulih ngasuh semua orang bansa asal nyadi kaya-raja ari ti nerima duit dividen ti deka suah dibayar ngagai sida lalu neruska semua polisi sida.

Tang semua orang di Sarawak diatu majak nemu sereta mereti ke bala orang bansa asal ti udah lenyau tanah umai tauka tanah kampung sida suah agi ditejuka enda dibayar sebarang pampas betaun-taun. Enti bisi dibayar pan, bayar nya pansut enggau enda disadang lalu penyampau iya mimit, tang suah agi disuaka bala orang politik ba maya bepilihbesai, baka ti dikereja James Masing di Beluru ba minggu nyin kemari. Duit nya enda salah-salah baka sebengkah pemeri ari BN!

Upah ti mulia? Bala orang bulih pengeraja ari dagang kunsi nya – bini Mong Dagang (Bawang anak Der), menyadi James Masing empu enggau bini Wilson Ugat (Leyta Kupa)!

Nitihka jaku ari James Masing, pekara pasal tanah NCR nya “pekara ti lama sereta udah bari”!

Baka nya munyi jaku iya ti didinga bala orang di Beluru ba sebengkah pengerami dikena iya ngenampakka nama diri taja pan tau ngasuh peninga iya engkual deka mutah nya.

Nitihka penemu iya nya, kuasa orang atas tanah nya ukai pekara ti besai tauka “batang kenang ti angat” ba maya bepilihbesai, laban udah mayuh bendar tanah NCR diambi nengah atur polisi BN.

Duit ‘dividen’ RM5,000 nya nyadika pampas ti lebih ari numbas ke bala orang di Beluru baka ti diputuska iya lalu semaya bala raban penyakal ti deka mulaika tanah ti kena rampas nyau enda dikarapka bala pengundi agi!

Ba minggu-minggu ti deka datai tu James Masing enggau Taib Mahmud tentu deka majak mansutka sara penemu ti sebaka enggau ti dipansutka di Beluru lalu seduai mega deka nyerahka chek, enda salah-salah baka ti meri buah jari ari BN ti endang datai ari pemisi orang bansa asal nya empu.

Bala pengundi tentu enda mudah dikeduan ngena chara ti dikereja bala pengerampas tanah enggau penipu ba pengawa bepilihbesai nya.

Nyuaka chek-chek di sebarang endur enggau di sebarang maya? Ingat, anang enda ngenduk, Taib diatu udah ngadang datai ba maya semak bepilihbesai tu!

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments