Raban ‘Soldadu Cyber’ BN Dibantaika!

• 3 Mar 2013
• BM 翻译

Bala sida nya enda salah-salah baka orang mayuh ti bukai, ti ngumbai diri “raban blogger ari menua tu empu ti ngembuan penatai asal sida empu ti nyelai”.

Tang kami ulih mantaika baka ni kaul semua laman web pro-BN nya enggau pangan diri ti dikemataka beberapa iku blogger ti nerima upah enggau chara belalai ari Awang Tengah lalu betuaika Kepala Sekretari Politik ke Taib Mahmud iya nya Abdullah Saidol.

Laman web ‘Bloggers Anak Sarawak’ bisi dipasuk kaban ari beberapa buah laman blog ti sebaka, semua nya nangkin tanda lalu asil tulis sida endang ditujuka ngagai sebarang laman web ti mantah BN, ke lebih agi baka laman Sarawak Report.

Dilancharka ba taun nyin kemari, semua laman web nya bisi raban penulis komen ti enda mayuh baka ti bisi ayan ba blog ke bukai.

Baka nya mega, mayuh agi artikel ti ditulis sida nya nadai ditimbal orang ngena sebarang komen.

Nyadika kebuah sida nadai nerima sebarang komen ba blog sida nya laban kenu ku sida, sida “enda ngemesaika sebarang pekara dikena narit ati bala pemacha ti mayuh”.

Tang jaku talat sida nya senutuk bendar enggau penerang ti diterima kami, ti madahka raban blogger nya diupah nitihka pemayuh artikel, lalu ukai artikel ti tau meri sebarang empas ngagai runding bala pemacha tauka temuai blog sida.

Semua laman blog nya berupai bendar meri sukung sida ke Awang Tengah, berat agi ari ti taluk ke PBB tauka BN, nyentuk ke bisi sekeda ari sida didinga udu mantah sebarang berita ti bisi ayan ba suratberita pro-BN.

Raban soldadu cyber ti diupah Awang Tengah

 

 

 

 

 

 

 

 

 

Penerang ari orang dalam bisi madahka ngagai Sarawak Report nya bala kaban dalam ‘Bloggers Anak Sarawak’ dibayar upah RM3,000 siku ke sebulan bejalaika pengawa sida, lalu kepala sida nya, Salfian Nawawi, siku ari pengarang berita dalam Sarawak Tribune enggi sida Taib Mahmud sebilik.

Kami bisi dipadahka pasal Awang Tengah melanja projek sida nya, tang iya ngelempaika tanggungpengawa nya ngagai bau ‘Ketua Pemuda’ PBB, Radin Kadri, enggau Kepala Sekretari Politik ke Taib Mahmud, Abdullah Saidol.
Kami mega dipadahka pasal kebuah Awang Tengah ti nyukung projek nya ukai ketegal deka ngangkatka nama BN. Tuju iya ke bendar nya dikena iya ngangkatka nama diri empu deka nganti Taib Mahmud lalu ngulihka sukung ari orang mayuh ba renggat pelasar parti nya.

Sepengudah kami mansutka penerang pasal pekat Awang Tengah ngelaban Taib ba taun nyin kemari, iya udah berupai enda datai enggau baum merambu pengawa bepilihbesai PBB, baka ti ditusui suratberita Borneo Post.

Penerang ari kami nya udah ngasuh bala raban ‘Bloggers Anak Sarawak’ udu ringat, ti udah ngutuk bala penyakal ti ngumbai Awang Tengah kena pulau ari aum PBB ketegal pekat iya nya.
Tang penerang ti bendar ti enda ditusui sida dalam blog sida nya, penerang asal nya datai ari suratberita BN empu, Borneo Post, ti nusui pasal Awang Tengah ti enda datai ngagai aum nya, lalu ukai ditempa laman-laman blog raban penyakal.

Penerang ari dalam mega madah nya nyadika chunto baka ni raban blogger ‘Anak Sarawak’ bebendar amat ngangkatka nama Awang Tengah lebih ari nama BN, ti lalu diumbaka penyarut dalam BN empu.

Nama Awang Tengah udah nyadika buah kenang lalu diangkatka nengah laman-laman web ti bisi bekaul enggau sida nya, ti endang nyadika siti ari chara sida nuliska karang dalam blog sida nya. Laman-laman web ti bisi bekaul enggau sida nya: Wira kenyalang; Keadilan X Sarawak; Asap Koyan; UnReported News; Sarawak Kolok Mee; Kuchingitam; Melanau Blogger, ti sekeda ari blog raban sida nya.

Raban blogger ti diupah BN nya nyengkaum bala orang ti kereja perintah

Sebengkah penerang ti ngalitka ati bekaul enggau pengawa raban ‘Blogger Anak Sarawak’ nya bisi ngaul orang ti kereja perintah, ti patut ngereja pengawa iya ti nerima gaji bulan iya ari perintah, lalu ukai ngena blog iya ngangkatka pemanah nama sebarang orang politik baka Awang Tengah.

Siku ari sida ti udah ditemu nya, Awang Mohd Razif Awang Yusof, ti nyadi pengarang dalam laman blog Keadilan X Sarawak, ti udu nuliska jaku bantah ngelaban Sarawak Report enggau Radio Free Sarawak ngena gambar sepuchuk pistol ti bemunchung nuju penimbak empu enggau sebuah gambar kamah.

Razif ti bekereja nyadi Pegawai Informasyen dalam Opis Hal Ehwal Khas (JASA) dikuasa Kementerian Penerang, Telekomunikasi dan Kebudayaan Malaysia nerima gaji bulan ari perintah RM6,122.73 ari Perintah Besai.

Nitih ke penerang ari dalam, Razif mega nerima upah RM3,000 sebulan laban diasuh ngangkatka nama Awang Tengah nengah blog lalu pengawa nya dipeda melakangka batang pengawa iya empu ba opis JASA, lalu pengawa sangking nya udah ngenataika jaku tanya.

Taja pan bisi penerang ti silik ti diberi ngagai Sarawak Report lalu penerang-penerang nya bisi dalam mayuh bengkah laman blog nya, ti madahka bisi sekeda orang ti ditusui bekaul enggau pekat Awang Tengah udah bebendar amat bebula ke penerang nya. Bala sida nya nyengkaum Kepala Sekretari Politik ke Taib Mahmud, Abdullah Saidol, ti diatu ditemu ngeringka raban ‘Bloggers Anak Sarawak’.

Ke bendar, ‘Perang Cyber’ ti diatur BN ukai utai ti baru. Perang nya sebengkah ari chara BN nguasa sebengkah medium ti enda kala dikereja sida enggau mujur sereta nengkeman.

Ngeluarka belanja ti mayuh dikena ngupah raban ‘Soldadu Cyber’ nya udah nyadika chara mutarka penanggul enggau chara sida ngenataika penerang ti mar, nyaut tanya ti mar enggau bantah politik ti mar nengah arus internet.
Lalu ke bendar iya mega ‘Perang Cyber’ ti kamah nya dikaitka enggau peneleba sida ba pengawa nipu enggau kereja kamah ti nagang BN ngena iya enggau nengkeman ba mensia mayuh lalu tipu nya udah dibantaika kami ba kompeni FBC Media taun nyin kemari.

Penerang ti baru madahka unit ‘Bloggers Anak Sarawak’ nya sebengkah ari pekat Awang Tengah sepengudah ‘Unit Media Baru’ BN Sarawak ti dipejalaika anak ipar Taib, iya nya Abdul Aziz Adenan udah bekau bepilihbesai DUN suba.

Ari nya Awang Tengah lalu ngulihka servis bala bloggers PBB baka Zaini Busrah (bujangsenang.org enggau meradongtoday.blogspot.com, melanaublogger.com enggau kuchingitam.blogspot.com), ti diatu benung begigaka pengawa lalu nyadi kaban dalam ‘Bloggers Anak Sarawak’.

Tu dikereja sepengudah Awang Tengah enda mujur mujuk Taib ngengkahka ipar iya nyadi Sapit ke Abdul Aziz Adenan ngemataka Unit Media Baru PBB sechara ofisyel.

‘Bloggers Anak Sarawak’ diatu numbuhka sebengkah raban dalam raban ‘Soldadu Cyber’ BN ti nyadika kelai ti tau mai pengerusak dalam penyarut enggau bebelah bagi dalam BN kejang bepilihbesai tu. Bala pemacha kami (enti bisi ati) deka ngarapka mayuh agi artikel ditulis raban ‘Bloggers Anak Sarawak’, ti ditagaka nyerak laman kami Sarawak Report enggau laman ti bukai, ti udah mantaika but BN, seraya ngangkatka nama Awang Tengah.

Nyerumba nya, ba endur ti bukai, Sarawak Report bisi tetemuka sebengkah nama domain digaga nyau deka sebaka munyi enggau enggi kami, iya nya sarawakreport.co.uk, udah dibeli sebengkah penyedia arus internet ari Kanada ke menantu Taib Mahmud.

Lebuh musim Bepilihbesai DUN taun 2011, Taib udah ngatur ‘serang cyber’ enggau naka pemalat atas Sarawak Report nengah laman web ti benama nyau deka sebaka enggau enggi kami, iya nya sarawakreports.org.

Chara serang ti baka nya dikumbai ‘piggybacking’ dalam leka jaku dunya cyber, ngena nama ti nyau deka sebaka enggau laman ti asal, ti udah nya mansutka jaku bantah pasal laman asal.

Taib Mahmud udah mayar FBC Media enggau ungkus USD$5 juta dikena nipu enggau bejalaika mayuh bengkah atur, nyengkaum ti ngatur serang ‘distribution denial-attacks’ ti udah ngelumpuhka laman kami enda lama.

Lalu Sean Murray mega ditemu ngupah pengawa nipu dalam dunya cyber. Dalam suratberita UK, Murray ditusui ngupah sebengkah kompeni, Bell Pottinger, dikena iya ngubah penerang dalam laman web Wikipedia nyengkaum penerang pasal Sarawak Report enggau Radio Free Sarawak.

Nya alai, enggau musim bepilihbesai ti semakin semak diatu, sekali ke kitai sekali agi deka meda beberapa siri serang ti beduduk ari sarawakreports.co.uk? Tauka, bala soldadu cyber BN diatu benung diupah lalu benung ngatur serang sida?