Datuk Ti Kamah Ari Raban Bansa Dayak – Pengari-Pengari Kroni BN

• 3 May 2013
• BM 翻译

Enti nuan nya siku tuai raban bansa Dayak ti dipebasaka raban nuan lalu bisi penemu orang ari luar ti ngasuh nuan nipu sereta mechat raban bansa nuan empu awakka nuan ulih nyadi kaya belipat kali ari orang bukai, deka tauka enggai nuan ngereja nya?

Uji perundingka nya.

Engka nuan enggai besalahka sida Linggi sebilik tauka sida Jabu sebilik, laban nuan engka kala udah nyual bansa Dayak ti sebansa enggau nuan ngagai bala tukang tumbang ti diupah Taib enggau mega bala tauke kebun dandang besai.

Raban orang diri sebilik tu ngereja utai nya ngagai kita lalu sida diatu udah kaya bendar lalu mayuh bendar rakyat di Sarawak mengkang idup suntuk, terumpang sereta dirusak.

Maya musim bepilihbesai tu raban sida tu bediri minta pilih baru nyadi MP, awakka sida ulih terus ngerampas sebarang utai kita ti agi tinggal ba kita enggau raban bansa kita, nyengkaum minyak menua Sarawak, arang batu, kuasa elektrik hidro, tanah-tanah enggi raban bansa asal ti agi tinggal enggau sebarang kayu ti agi tinggal.

Engka kita pan ulih mega ngereja pengawa baka ti udah dikereja sida, tang deka kita nyadi orang ti dikeduan sida?
Sanggup kita meri pechaya kita ngagai Alexander Nanta Linggi, Douglas Uggah Embas enggau bala sida ti bukai terus bejalaika pengawa sida seraya ti ngasuh Taib bekerugaka laluh kampong enggau temuda rimba kita?

Nama tanggungpengawa kita ngagai rambau dudi bala anak enggau uchu kita, tauka RM1,000 duit suap ti disemayaka dikena meli siti undi nya lebih ari chukup dikena sida neruska pengidup sida nyentuk ke jemah ila?

Ngena RM1,000 nya udah kita besedia nyual pengidup bala anak uchu kita “awakka nyadi kuli ba atas tanah sida empu jemah ila” baka ti dibantaika dalam repot komisyen Suhakam bekaul enggau polisi Taib ngerampas tanah-tanah enggi orang raban bansa asal di Sarawak?

Enti kita ulih tepantup ati sereta gaga ati dibeli nyadika ulun enggau rega semina RM1,000, pajakka lalu undi mih sida Alexander Nanta Linggi enggau sida Jabu tauka Uggah sebilik.

Tang enti kita enda tepantup ati tauka bisi ngembuan ati ti udah nyima engka ngasaika diri udah kena keduan, ambi aja duit sida nya (tambah mega sida nya berutang bejuta-juta kali lipat ba kita ti udah kena kelakar) lalu undi mih REFORMASI!

Baka ni sida Leonard Linggi Jugah ulih nyadi kaya?

Leonard Linggi Jugah belabuh nyadi siku tuai ke raban bansa Dayak ti nadai mayuh duit, ngagai siku orang ti mayuh duit enggau reta,, mangku pengawa nyadi Chairman dalam kompeni iya, Asian Plantations.
Kompeni Asian Plantations ti dipejalaika menantu Linggi bebansa British, Graeme Brown, udah mujur bulih 51,000 ekar tanah kebun dandang besai ari perintah Menua Sarawak.

Enti nitihka rega RM4,000 seekar munyi ti dikangauka bala petunggal Taib Mahmud dalam video Global Witness bedau lama tu udah, tanah enggi Linggi nya manggai ba rega lebih RM200 juta. Manah bendar nya.

Pengeraja sida Linggi nya datai ari tanah-tanah ti berega murah, ti udah diberi Taib ngagai sida enggau enda ibuh nengah sebarang proses tender.

Enggau chara nya, Taib arapka sida Linggi taluk sereta angkun ngagai iya. Iya ngarapka bala sida ulih meri iya mandat ti baru belama-lama.

Anak ambu Linggi, Alexander Nanta, nya siku ari orang BN ti nyadi pengari ke sitak Kapit, sebengkah pelilih menua ti udah balat dikeruga sida Linggi sebilik.

Semua tanah kebun dandang besai ti deka dibuka nya endang dijual enggau rega ti mit, lalu ke bendar iya endang tanah kampong tauka temuda rimba enggi orang bansa asal ti agi mayuh kayu ti bebesai, ti endur menua nya deka ditebang dulu dikena ngulihka untung ti mayuh.

Taib ti seruran ngumbai diri manager besai menua Sarawak udah ngaku diri udah kelalu balat bejualka tanah di menua Bintulu, laban iya patut udah dulu agi ngulihka pengaya dia ari iya ti meri peluang ngagai sida Linggi. Bala sida Linggi udah balat ngerusak rampa menua di Bintulu ti ngujungka iya balat mutap pasal pengawa sida Linggi lalu ngumbai sida Linggi nya “seruran minta utai enda badu-badu”!

Projek ti meruan?

Kompeni Asia Plantations enggi Linggi nya ngumbai diri empu ‘meruan’.
Ke bendar iya bala sida Linggi tu meh seraban ari bala orang ti udah balat bendar berusakka rampa menua, ukai semina nengah projek betanamka sawit tang nengah proses numbangka rampa kampong bungas ngena permit ti diberi Taib ngagai sapa-sapa kroni bansa Dayak baka sida dikena ngulihka sukung politik.
Linggi udah diberi Taib rampa menua ti besai bendar nengah lisin sida ngena Keresa Timber enggau Rajang Wood.
Dalam sebengkah pansik bepelajar pasal pemeri lisin kayu batang Taib ti ditulis Dr David Brown [Why Governments Fail to Capture Economic Rent – The Unofficial Appropriation Of Rain Forest By Rulers In Insular South East Asia 1970-1999] nerangka enggau silik pemayuh konsesyen ti diterima raban sida Linggi sebilik.

Penerang ti nangkanka tu nunjukka nama kebuah Taib mutuska runding meli penaluk Leonard Linggi Jugah:

“Linggi nadai ditentuka sebarang penuduk ti dipilih, tang iya ditagaka penuduk lumur dua ti ngemataka “Sayap Kristian” dalam parti PBB. Penuduk Linggi besai bendar guna ngagai raban Iban, Bidayuh, Orang Ulu tauka Kristian ti deka bediri nyadi pengari lebuh ngarika PBB … Linggi mega Sekretari Besai dalam PBB … PBB datai ngagai iya betanyaka belanja maya bepilih” [David Brown]
Nya alai, laban Linggi ti anak siku tuai Dayak ti dipebasa lalu ulih mai pengundi Dayak Kristian ngagai PBB enggi Abdul Taib Mahmud.
Surat-surat penerang kompeni nunjukka baka ni Linggi mengkang nyadi pugu pemegai share ke kompeni-kompeni lalu nya mega kebuah anak iya empu Alexander Nanta Linggi benung chakah besadungka duit ngagai bala pengundi iya nyadi MP sitak Kapit ba ujung minggu tu.

Enggau langgur Taib ti deka ngampuhka setengah ari bumi Sarawak, agi mega bansa Dayak nerima sedak duit pemeri enggau chara ngasuh Linggi nya kaya-sekaya?

Douglas Uggah Embas – siku agi “Kaban Ti Dipebasa”?

Sama sebaka enggau Linggi lebuh mechat bansa Dayak nya siku agi orang tuai ti nyadi pengari dalam BN ti bediri minta pilih ke sekali tu, Douglas Uggah Embas, ti berebutka kerusi Betong nyadika orang pemadu beguna ke Sapit Kepala Menteri Alfred Jabu Numpang. Uggah mangku pengawa menteri nyadi Menteri (Penuh) Pengeraja Asal ba Perintah Besai, taja pan menua iya empu (Sarawak) udah rangkai-retai nadai agi kayu kampong enggau minyak udah bekau ti dikeruga bala tuai BN.

Uggah udah ngenuluka BN dikena ngulihka penuduk, baka raban sida Jabu sebilik di Betong. Dua iti raban orang Betong diri sebilik tu endang chakah bendar ngulihka kuasa ari Taib atas bala Iban, ti endur penaluk enggau pengangkun bala Iban mengkang tegap.
Peratika sekeda ari konsesyen enggau lisin kampong enggau kontrak ti diberika ngagai raban Uggah enggau Jabu baka ti dirintaika David Brown dalam pansik iya ti tebilang di serata dunya nya:

Pansik kami ba bala orang ti bempu konsesyen Rajang Wood ti besai rampa nunjukka baka ni Linggi nguasa konsesyen-konsesyen nya.
Rajang Wood Sdn Bhd nya diempu dua buah kompeni, iya nya Rajang Resouces And Bdn enggau Limar Management Services Sdn Bhd:

Lalu sebagi ti besai bendar dalam kompeni Rajang Resources dipegai bala Linggi enggau Uggah – sebengkah penerang ti ngasuh tekenyit!

Lalu, Limar Manangement Services nya diempu bala sida Linggi sebilik …

Pengeraja sida Linggi sebilik terang bendar dituliska dalam Repot Taun 2012 sida ke Asian Plantations mega:

Nya alai, lebuh raban sida Linggi enggau Uggah udah mujur bendar bulih pengeraja ke diri empu, nama penyadi enggau raban bansa sida empu ti patut dikemataka seduai? Repot ti ditiriska ari komisyen kuasa mensia Suhakam terang bendar nyebut, raban orang bansa asal udah “dipejal nyadi anak kuli ba tanah diri empu”.

Anak Iban ti dua iku ti benama Linggi enggau Uggah nya arap bendar ke penyeranta bansa Dayak patut diasuh riri nyambut pemeri ti mimit-mimit awakka ulih ngundi seduai iya nyadi menteri ba penggal ti baru. Tu meh strategi seduai. Diatu, teserah meh ngagai rakyat milih lalu sida patut nentuka orang ti dipilih sida nya enda ngelakar ba maya bepilih.