Latest Stories
Sections
Mendengar!
Sehari tu beserimbai enggau Hari Bebas Media Sedunya kami enggau pengabis pengaga ati kami madahka bala bakih kami dalam Radio Free Sarawak udah mujur bulih perais media entarabansa ti pemadu berega!
Institut Media Entarabansa (IPI) nya, ti bisi kaban ari raban bala pengarang, editor enggau eksekutif berita ti pemadu tebilang di dunya, udah selubang penemu milih Radio Free Sarawak (RFS) nyadi penerima Perais Penengkebang Media Bebas ke taun 2013 tu.
Iya udah nyadika berita ti manah bendar ti patut dibai ngagai bala peninga ti taluk ngagai RFS di menua pesisir di Sarawak ti endur komuniti entarabansa di serata dunya diatu benung meratika pasal pendiau raban bansa di Sarawak ditaburka stesyen radio nya ti endang ditagaka nyukung sida lalu ngayanka semua penanggul ti nuntung pengidup sida!
Ngena peluang tu mega Sarawak Report ngenataika pengaga ati ngagai raban DJ di mimit tubuh dalam RFS, ti udah bekereja ninggalka ruang bilik diri empu dalam pengelama bejam-jam kenyau ari dua taun setengah endur naburka program dalam jaku Iban enggau Melayu tiap hari ngagai bala peninga ti makin betambah.
Radio semina sebuah aja tang bala peninga iya mayuh! Rumah panjai nyadika raban peninga ti pemadu manah.
Atur pejalai radio nya sebengkah gempung pengelandik enggau pemeri ti besemengat tinggi ari bala peninga ari Sarawak, tang ketegal pendiau sida ti jauh sereta meachir-achir, nya ti nyadika RFS besai bendar reti ba sida.
Taja pan program iya enda tentu terang ba keterubah iya ditumbuhka ketegal gaya atmosfera lalu diatu ketegal kena keruga raban penggodam ti nguji nyekat sada nyawa iya sekumbang musim bepilihbesai tu, bala peninga mengkang mendingka iya, lalu pemayuh tubuh bala peninga mega majak nambah ninting hari.
Ningaka radio nganti maya ti makai lemai!
Bedau lama ti udah RFS udah nusun baru program dua jam tiap lemai sida ari pukul 6 lemai ngagai 7 lemai atas peminta bala orang di menua pesisir ti madahka diri mar bendar deka pulai ari umai beguai-guai laban enggaika enda sempat mendingka RFS nengah radio.
Kami mega enda tau enda ngubah gelumbang angin kami dikena nyeliahka ari kena serang bala penggodam lalu bala peninga kami kami diatu udah ulih mendingka kami baru, awakka kami ulih naburka program sepemanjai pengawa bepilihbesai tu.
RFS berasai berutang-budi ke pengiruh bala staf ti udah liat ati ti mantu kami neresa penekul ba opis penabur WRN di menua UK.
Beberapa hari ti udah bala penggodam udah ngelancharka serang sida baka ti bisi ditemu WRN, nyengkaum ngena chara local enggau entarabansa, ngujungka penanggul kami naburka program ba maya ti enda lama. Tang raban kami ti betubuh enda mayuh udah mujur nyeliahka serang nya lalu diatu udah ulih bejalaika pengawa baru.
Serangan cyber
RFS udah meransang mensia mayuh mansutka pasal semua macham pekara ti nuntung tauka nekul-nanggul pengidup sida besehari-sehari.
RFS enggau stesyen gembar iya Radio Free Malaysia (ti dipejalaika maya bepilihbesai) dituntung serang cyber ba laman-laman web sida baka ti ditapi Sarawak Report beberapa minggu tu udah.
Siti chunto serang ‘DDoS’ ti ditapi nya penyampau 130 juta penemuai dalam 3 ½ jama, udah ngelumpuhka tiga iti laman dalam kandang tujuh hari.
Tang bala peninga RFS di menua pesisir mengkang enda nginsit ari penuduk sida ninggalka RFS. Sida bebekalka telefon binching mansar diri empu bejalai bejam-jam ngiga endur arus telefon ti manah endur sida betelefon ngagai RFS awakka bekunsika penanggul sida enggau kami.
Udah sida ulih ninga randau ti dipekunsikan sida enggau kami lalu mega ulih ningaka saut enggau timbal bala peninga bukai di rumah panjai nengah radio, suah agi nya di rumah-rumah panjai ti jauh di ulu sungai ti jarang endur orang datai nemuai.
Radio gelumbang pandak udah mayuh bendar dibeli mensia mayuh ari kedai lalu udah mega diagih-agihka bala orang ti bisi meri bantu enggau bala orang ti kimpin enggau mega raban NGO.
Komen-komen ari bala peninga kami bisi nyebut “RFS udah muka mata enggau runding kami”, “RFS udah meri kami pengarap ti baru”, “Kini penunga RFS malam tu?”
Bala staf ti ngelalaika identiti diri empu dikena nyeliahka diri ari kena emba, keruga, keduan tauka dituduh ‘ngasut’
Lalu ba kali ti keterubah bala orang ti udah enda bemunyi laban dikeduan enggau diemba raban apek bayat ti diupah kompeni kayu batang, diatu udah berasai berani bekunsika penanggul sida nengah RFS enggau orang mayuh.
Ngerachun runding mensia mayuh?
Tang diatu RFS nyau majak dikerinduka bala peninga, lalu ngujungka perintah BN Sarawak ti betuaika Taib Mahmud nyau majak enda dikerinduka orang, nyengkaum bala menteri ba perintah besai di Malaysia.
Sida udah enda ulih napi semua macham jaku bantah ti bekelingi ba empas ti datai ari pengawa ngulihka kayu batang enggau muka kebun dandang besai sawit lalu mega pengawa ngerampas tanah-tanah NCR enggi orang bansa asal.
Mayuh ari bala orang politik BN berasai nyima lebuh RFS mantaika pasal inisiatif ‘perimeter survey’ ti dipelandikka perintah BN Sarawak enggau chakah.
Inisiatif nya madahka perintah meri surat pala tanah ti lama bendar udah dianti-anti raban orang bansa asal ke tanah-tanah adat sida ti diturunka ari raban aki-ini sida, tang ke bendar iya inisiatif nya dikena perintah ngerampas semua kuasa semina ba endur ti mit ti udah dikelala dulu.
Diatu mayuh raban bansa udah ningaka ke jaku tangkan lalu enggai nerima inisiatif ‘perimeter survey’ nya!
Empas ari jaku gerah enggau jaku tangkan ari RFS dia emba enggau repot polis ti ngembuan tuju politik udah nyadi. Bala menteri, baka ‘Menteri Pemansang Tanah Sarawak’, James Jemut Masing udah ringat bendar.
Sebuah radio ti mai berita pasal pejalai kes ngempang jalai ti didirika raban bansa Penan ngetanka rampa kampung sida.
Radio Free Sarawak udah kala dikumbai “stesyen radio lanun” ti dipejalaika nadai ngena lisin ari perintah.
Tang kami deka nunjukka ngagai semua orang, RFS dipejalaika ngena lisin ti betul ba undang-undang di menua UK enggau mega dikelala ba ikas entarabansa, lalu bala penggodam nya meh ti ngelaban atur-atur entarabansa bekerugaka kereban ti patut dikena meri penerang ti betul.
RFS udah ngepunka sebuah sada nyawa bebas di menua Sarawak beserimbai enggau media ‘belisin’ ti dikuasa sida Taib sebilik enggau kroni penebang kayu batang iya.
RFS semina deka ngenataika tauka nerangka pasal kuasa mensia lalu sida mega rindu ninga kami!
Perati ari raban orang ba ikas entarabansa
Sukung ari siku orang ti rinduka RFS, Syed Ahmad
Enggau betambah pemayuh stesyen TV entarabansa, repot dalam suratberita enggau radio udah nunjukka peminta ba RFS, ke lebih agi bekaul enggau penanggul ti datai ari pengawa ngeruga kampung, muka kebun dandang besai sawit enggau penyalah makai suap ti ngeruga pendiau enggau pengidup bala peninga kami.
RFS udah dikelala lalu diayanka dalam Al Jazeera, BBC enggau Dateline Australia lalu mega sekeda artikel dalam laman-laman blog.
Kami arapka komuniti entarabansa ulih terus ningka kami lalu meri perati sida ngagai pendiau enggau pengidup bala orang asal di Sarawak ti dulu menya sebengkah raban bansa ti enda dikelala lalu ditejuka ngidupka diri.
RFS deka nerima perais nya ba ujung bulan tu di nengeri Aman di Jordan. IPI udah ditumbuhka di New York dalam taun 1950 menya lalu nyadika sebengkah gerempung ti pemadu tuai ti ngarika gerempung-gerempung media ti bukai, diatu bisi indu opis di Vienna.
Sekali agi, tabi pengaga ati ngagai raban ti bekereja dalam RFS enggau mega bala peninga kami di rumah-rumah panjai enggau di tumpuk-tumpuk pendiau raban bansa asal di menua Sarawak!
Penerang ti silik tau dibacha dalam laman IPI
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.