Baka Ni BN Ngelakar Maya Bepilihbesai Di Baram

Kuasa ngundi sida tu udah dikeenggaika. Raban orang bansa asal Baram udah nganjung bantah enggau serebana sida awakka dipeluruska.

Mayuh palan endur muai undi ti ditemu bisi dilawa pengundi penyakal udah ditutup tengan pagi di serata menua Baram maya bepilihbesai tu kemari, baka ti dibantaika, taja pan rintai orang ti nganti gintir diri deka muai undi nya agi panjai bendar lalu bala pengundi ti udah ringat nya lalu nadai peluang muai undi ke sehari nya.

Tu sebengkah ari chara bala pemesai bepilihbesai ngulihka majoriti ti mimit ke BN ba sitak nya ti udah diberi beribu iku pengundi ti udah ngasaika pemedis ketegal pengerusak rampa kampung enggau pendiau sida laban dikena ngawakka projek ngaga tekat Baram ti diperambuka Taib nya.

Palan endur ngundi ti ditutup tumu nya endang disengaja. Taib Mahmud ngasaika raban orang bansa asal ti bepengarap Kristian nya endang nurun ke gerija dulu lalu udah nya sida bejalai jauh nuju palan endur ngundi sehari nya.

Udah tembu besembiang, beribu-ribu iku orang bansa asal deka beguai-guai ngelawa palan endur ngundi taja pan sida enda tau enda bejalai jauh datai ke sejam dua laban deka nunaika tanggungpengawa sida ke menua diri.
Utai ti enda ditemu sida tauka pengari penyakal ti deka disukung sida nya jaku gerah perintah ti beresia udah dikeluarka ngambika palan endur muai undi nya ditutup tumu ba pukul 11 pagi. Penerang-penerang ti munyi nya semina dilekatka dalam palan muai undi ngambika bisi dibacha raban pengereja pengawa bepilihbesai aja!
Ba beberapa iti kes bala pengundi udah dipadahka bala pemesai SPR palan endur ngundi nya ditutup pukul 10.30 pagi lalu udah nya pengawa ngundi deka diketuka.

Bebida enggau palan di nengeri di serata Malaysia ba hari nya, palan ngundi ditutup pukul 5 lemai.

Petisyen bepilihbesai ti udah difailka pengari penyakal PR, Roland Engan, ti alah mimit 194 undi (sebengkah pengalah pemadu mit di serata Malaysia), madahka mayuh bendar pengundi ari raban bansa asal udah ditagang muai undi ketegal chara tu lalu sida nya tentu ngundi ngelaban perintah.

Penerang-penerang ti silik udah dimuatka dalam petisyen dikena ngelaban sereta madamka pemutus bepilihbesai Baram nya.

‘Mandat berdemokrasi’ Taib

Penerang-penerang dalam petisyen bepilihbesai Baram, ti deka dipendingka dalam kot kena 1hb Lapan tu ila, udah ngayanka pengawa nipu ti diatur Taib ngambika kenu ku iya ngetanka pengarap rakyat Baram enggau chara demokrasi.

Chara-chara nipu ti dikereja di Baram nya udah nyereminka baka ni pengawa nipu dikereja di serata menua Sarawak, ti endur raban penyakal enda ulih begumpulka penerang-penerang dikena ngelaban pemutus bepilihbesai bulan Lima nya kemari.

Chara-chara ti lama – pengawa meri duit suap BN ngagai bala pengundi sida di Kuala Besut. Ba sitak Baram siku pengundi dibayar RM100, nitihka petisyen nya.

Katalog chara-chara kamah

Petisyen bepilihbesai Baram enda tau enda nyadika kereban pansik ke sapa-sapa ti deka bedagang enggau menua Sarawak bepelasarka Taib ti ngarika sistem perintah demokrasi.

Sama enggau nya perintah BN Malaysia endang bepanggai bendar ba menua Sarawak ti nyadika ‘simpan tetap’ ti betuaika Taib, taja pan BN semina bulih persen pemenang ti mit agi ari ti diulih raban penyakal.

Petisyen nya udah ngerintaika chara-chara kamah ti udah tebalan ba sebarang sapa ti kala napi pemesai-pemesai bepilihbesai BN. Tu nyengkaum pengawa makai suap diberika ngagai orang menua pesisir ti seranta.

Taja pan mayuh agi sida nya orang ti seranta, mayuh bala sida nya besedia deka nulak duit suap BN, nitihka penerang dalam petisyen nya, laban sida endang udah besedia deka nulak perambu Taib ti deka ngaga tekat Baram di menua sida.

Ba sekeda endur bisi penanggul nyadi maya bepilihbesai baka ti bisi diasaika raban ari parti penyakal. Bala agen ari penyakal udah ditulak kuasa sida meresa lalu ngamatka semua Pom 14 sida, ti dikena sida ngerekod pemutus-pemutus ari stesyen muai undi sebedau dianjung ngagai palan endur ngira undi.

Pengari parti penyakal Roland Engan udah bebendar amat kimpin beduduk ba penemu anti-tekat Baram ti tebilang nya.

Reti nya ba sekeda endur penyampau undi engka bisi diubah dikena sida ngemuaska ati bala pemesai pengawa bepilihbesai, dikena sida nentuka bala ‘bos’ BN sida nya menang.

Bisi mega jaku serebana ti madahka pengawa nipu bisi dikereja ba undi pos enggau undi tumu. Sarang endur nyimpan keretas undi enda ditambit enggau likun tauka dijaga enggau manah sebedau hari muai undi, taja pan pengelikun nya endang dipinta raban penyakal.

Lalu ba hari ngitung undi, undi pos enggau undi tumu udah dikira pukul 2 ngalih hari nya enggau enda dikemataka bala agen bepilihbesai penyakal lalu ukai dikira ba pukul 5 lemai ba palan ngitung undi sehari nya!

Taja pan pengari penyakal Roland Engan udah balat dilaban ba pun pengawa ngitung undi lalu iya dipeda nyulut agi ari undi BN. Semina udah bekau ti balat betalatka jaku enggau itung ke dua kali nya baru BN dipadahka menang.
Mensia mayuh diatu nganti pemutus kot sekali ke kot deka dipeda bebas enggau nadai nanahka sepiak-sepiak dikena madamka pemutus bepilihbesai bulan Lima nya ti udu dibalut kamah pengawa nipu.

Bepilihmit di Kuala Besut, Terengganu ba minggu tu nyereminka baka ni BN disadang ngena chara ti sama ngulihka pemenang. Beratus-ratus juta ringgit ungkus projek deka dikeluarka ngagai bala pengundi di menua nya.

Ulih tauka enda bala orang di Baram ngelala ‘pengaya’ ti diberi maya ngundi nya enda ulih nyemekih pengeraja asil ari nebang kampung enggau ngerampas tanah kampung ti udah enggau ti benung dikereja Taib enggau bala kroni iya?

Ungkus rebak dudi sida nya RM100? Raban bansa asal Baram ti kena keruga nya udah mantaika bantah sida ba perambu pengawa BN.

Sign-up to receive regular updates from Sarawak Report

We send out the latest story at 7am Malaysia time

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments