Raban Bansa Penan Bisi Kuasa Angkat Ngelaban

Isi ruang bilik nguan dunju di luar – empang jalai ti Murum ba bulan Sepuluh nyin kemari mega bisi disempulang raban sida ti indu enggau nembiak mit dalam pengelama beberapa minggu.

Kompeni Sarawak Energy Berhad (SEB) diatu ngena chara ti kala dikena ngelama tu lebuh sida napi pengawa ngempang jalai di Murum ti didirika raban bansa Penan ba minggu nyin kemari.

SEB udah melanja sida, lalu serebana ke raban bansa asal nya udah “diasut” sekeda raban NGO ti enda disebut sida nama.

Dalam pengelama beberapa hari bisi repot madahka bansa asal nya udah ditemu sekali agi nagang penjalai atur pengawa projek ba tapak tekat ai Murum nya.

Pugu peminta raban bansa asal nya awakka sida dibayar pampas enggau chukup, ti mega enda tau enda diseretaka enggau surat jamin ari perintah, sebedau sida besedia diburu pansut ari menua asal sida ketegal meri awak ke projek tekat Murum ti nyau deka tembu gaga nya.

Tang ba runding sida SEB, raban bansa Penan nya sebengkah raban bansa ti rumpas lalu sida enda ulih ngaga pemutus dikena ngelaban. Tang bala pemesai dalam SEB madahka bisi beberapa bengkah raban NGO udah mujur ‘ngasut’ bansa Penan nya ngambika angkat ngelaban.

Lalu enggau nya, kuasa penuh perintah enggau SEB udah terang bendar enda ulih mujuk ‘raban bansa orang ti rumpas’ nya.

Nama kebuah Sarawak Energy ngarapka raban bansa asal deka arapka semaya-semaya Taib?

Ditinggalka ba tisi jalai – udah bekau tu nadai kelai pemansang ba ekonomi ti tau nguntungka orang bansa asal ti udah lenyau tanah ngagai pengawa ngulihka kayu batang, sawit enggau projek begagaka tekat ai dikena ngeluarka kuasa elektrik.

Ke bendar iya, raban bansa asal Penan enggau Kenyah tu ulih berunding ke diri empu lalu sida mega ngelala dini endur kuasa ti endang enggi sida.

SEB enggau perintah Taib Mahmud udah sekali agi ngelanggar undang-undang enggau kuasa pengelantang orang bansa asal ngena projek tekat ai di Murum ti dipejalaika enggau chara belalai dalam pengelama dua taun.

Diatu, taja pan CEO sida SEB nya, Torstein Sjotveit udah madahka sida ‘ngambi tindak ti patut sereta betul’ dudi hari ila, SEB udah nguji ngena kuasa sida mindahka orang bansa asal ngagai pengentap pendiau ti baru ti mayuh bendar pengurang lalu diberi semaya ti enda nyengala.

Nama utai ti udah diberi nya semina sebagi ti mit ari utai ti dipinta raban bansa Penan lalu enda diseretaka enggau jamin ba tisi undang-undang.

Nya alai, raban Penan bisi kuasa nyebut enggai.

Sida tau dikumbai enda meruan enti sida setuju dipindahka ngagai palan pengentap pendiau ti baru nitihka kondisyen SEB enggau perintah nya, laban sereta sida bepindah sida lalu lenyau kuasa dikena sida minta pampas ke dudi hari ila. Enggau nya sapa ti ngasut sapa, lalu nama kebuah SEB bebendar amat ngasuh sida pindah disempulangka enggau bayar pampas ti mimit bendar?

Raban bansa Penan enda ibuh diachuk tauka diasut, enti nitih ke gaya pengidup ti ditapi sida diatu.

Perintah menua benung chakah bendar deka muru sida ari menua asal sida, ti deka ampuh laban ai tekat, ngagai sebengkah palan pengentap pendiau ti jauh di ili tekat nya.

Dikena beterima kasih ke penyanggup sida perintah udah besemaya enggau enda terang deka mayar gaji bulan ke tiap ruang bilik setengah ari ikas gaji pemadu mit, ti deka diketuka 4 taun udah nya.

Endang enda chukup – lebih agi enti pengawa mindah nya enda dijamin. Di Bakun raban bansa asal dipinta mayar pulai rega rumah baru ti enda sida pindah.

Kelimpah ari nya mega jaku-jaku semaya ti kabur, baka nyediaka bekal pemakai laban enti raban bansa Penan nya enda ulih ngati ke diri idup di menua baru sida tentu deka mati keruran, ba palan pengentap pendiau ti baru ba temuda kebun sawit.

Raban bansa Penan nya endang bependiau nyadi pengasu enggau pengumpul asil kampung, lalu ukai bansa orang ti bumai betaun lalu sida enda mereti ke kebun sawit. Baka ni sida tau disadang ulih belajar idup ba endur ti baka nya dalam pengelama 4 taun lalu nama kebuah sida patut arapka semaya-semaya dib aka nya ti nadai meri jamin sechara undang-undang ti ditanggam entara sida enggau perintah tauka SEB?

Papan tanda ba palan pengentap pendiau ti baru ‘ti ditagaka’ ke ngagai raban bansa Penan

Sapa ti deka arapka Taib udah di macha Langgur Pengentap Pendiau ti digaga perintah tang dipelalaika dulu taja pan udah ditiriska, baka ti direpotka kami taun nyin kemari?

Langgur nya udah enggau naka penyai ditagaka ngagai raban bansa Penan kenyau ari Taib ngemendarka pengawa ngulihka kayu batang dikereja di menua nya lalu mantaika baka ni pengidup sida udah nyadi seranta agi ketegal ‘pemansang’ ba tanah pesaka sida, ti ngujungka sida nadai bulih sebarang penguntung.

Repot nya ngamatka pemayuh raban bansa Penan ti diau dalam langkau manuk ti enda dikena agi di Sungai Asap, ti udah nyadika laluh rumah ke bala orang diri sebilik ti deka diau besemak enggau sekula ba penyauh beberapa ratus meter ari tanah adat sida.

Raban bansa asal Penan nya enda ibuh diasut laban sida endang kala ngasaika pengidup baka nya.

Utai ti udah kala diasaika sida nya udah nangkan sida enda tau agi arapka jaku semaya Taib enggau bala agen iya ke lebih agi bekaul enggau mayar pampas ketegal kena keruga projek tekat ai.

Bakun

Tambah mega, pemerinsa bala orang ti udah arap sereta andal ke jaku-jaku semaya Perintah Sarawak enggau Taib Mahmud bekaul enggau pengentap pendiau Bakun ti nyadika tangkan ke sapa-sapa ti deka napi pengidup ti baka nya. Udah bekau lebih sepuluh taun Taib enggau perintah Sarawak mengkang puntan ngadaka kandang endur keg anti temuda ti udah diampuhka tekah enggau bayar pampas ti udah disemayaka suba.

Perintah Sarawak enggau SEB nadai ngayanka sebarang kelai ti madahka sida ngambi tindak enggau ati ti lurus. Jaku semaya suah diubah-ubah, bepanggai ba sapa ti ninga, ukai chara ti manah ke raban bansa asal nya.
Enti tau dikarapka perintah menua udah meri peluang ke raban bansa asal Murum ngulihka lalau undang-undang ti dipelanja penuh ulih perintah ari raban lawyer ti dipilih sida empu.
Tang, raban bansa asal nya udah ditejuka ngati ke diri lalu nadai disukung tauka diarika sapa-sapa, semina betunga mua enggau bala lawyer perintah enggau SEB ti ngelaban sida.

Pekara ti jai agi nya bekaul enggau bala pemesai-pemesai iya nyau majak berani bepintaka bayar rega rumah ti ditagaka enda ibuh dibayar ari bala orang bansa asal ti dientapka ba endur nya.

Lalu dalih enggau jaku bula ti sebaka udah kala dikena di menua Batang Ai, munyi ti diserebanaka bala orang ba menua nya. Lalu, nama kebuah orang di Murum patut besetuju tama peti’ enggau nadai disempulang surat-surat penerang undang-undang dikena nyaga pengelantang pengidup sida?

Nama kebuah nadai pengari undang-undang?

Sjotveit betemu enggau orang bansa asal – nadai pilih ti bukai ke undang-undang, jurai enggau jamin, baka ti endang ditemu orang bebansa Norway nya!

Perintah Sarawak enggau SEB nadai ngayanka sebarang kelai ti madahka sida ngambi tindak enggau ati ti lurus. Jaku semaya suah diubah-ubah, bepanggai ba sapa ti ninga, ukai chara ti manah ke raban bansa asal nya.
Enti tau dikarapka perintah menua udah meri peluang ke raban bansa asal Murum ngulihka lalau undang-undang ti dipelanja penuh ulih perintah ari raban lawyer ti dipilih sida empu.

Tang, raban bansa asal nya udah ditejuka ngati ke diri lalu nadai disukung tauka diarika sapa-sapa, semina betunga mua enggau bala lawyer perintah enggau SEB ti ngelaban sida.

Nadai sebarang bantu ke sida ti lemi sereta enda bedaya nyaga diri empu

Diatu SEB benung beratika bayar pampas enggau bala “tuai” ti dipilih sida.

Tang “bala tuai” ti kena pilih SEB nya ukai ngarika semua raban bansa nya.

Tambah mega, deka kita setuju ninggalka menua kita lalu dipindahka ngagai pengentap pendiau ti baru semina bepelasarka jaku semaya ari mulut aja, lalu enda disempulangka enggau surat penerang ti betul ba undang-undang?
Deka kita besetuju enggau atur perintah ti sanggup ngelanggar atur entarabansa bekaul enggau atur ngaga tekat ai, semina ketegal pengari Taib ti enda ngasuh kita enda irau?

Udah tentu kita enggai besetuju, baka nya mega raban bansa asal Penan enggau Kenyah di Murum.

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments