Latest Stories
Sections
Risalah-risalah diedar-edarkan di sekitar Baerum.
Lebuh iya enda ngeruga kayu kampung di Sarawak, Kepala SEB nya ngelantangka ati iya di rumah iya empu di Oslo di Norway, ba sebengkah pelilih menua dikumbai Baerum
Ba minggu nyin kemari udah bekau ti tekenyit ketegal projek besai-besai ti diberi Kepala SEB bebansa Norway ngagai kompeni-kompeni enggi tuan iya, raban NGO udah mutuska penemu enggau runding sida ti endur sida madahka bala orang mayuh di pelilih Baerum pasal ulah korup siku peranak menua sida empu, ti lama agi diau di Sarawak, Malaysia.
Beduduk ari pemutus runding nya sida lalu nemuai ke Baerum di Norway laban nyadung-nyadung surat penerang ti madahka pengawa ti dikereja bos Sarawak Energy Berhad (SEB) Torstein Dale Sjotveit di pelilih menua Baram di Sarawak, lalu baka ni projek nya bisi bekaul enggau siku tuai perintah ti rangka sereta ngembuan pendiau ti udu ngeruga menua diri empu di Sarawak, Taib Mahmud.
Raban NGO nya belabuh enggau nyadung-nyadung surat penerang sida ngagai bala penumpang ba stesyen keritapi di pelilih Bekkestua lalu udah nya sida tama ngagai pelilih menua Baerum laban deka ngenataika cherita Sjotveit nya ngagai rumah iya empu ti ba tuchung sebuah munggu.
Jaku talat ti inggar bendar
Udah bekau nya Datuk Sjotveit lalu nuliska beberapa iti email ari Kuching Sarawak nyadika sebengkah bantah iya ti madahka pengawa raban NGO ti bekesegau nyadung surat penerang pasal iya di Norway din nya sebengkah “pengawa ngayanka pengeringat diri ti kasar ba mua rumah aku”, ti dikumbai iya “ngeruga sereta beduan” sida sebilik.
Raban NGO nya lalu nimbal jaku bantah iya ti endur sida madahka CEO bebansa Norway nya patut dulu ngayanka pengirau ati diri ba raban bansa orang asal ti udah balat tanggul ketegal pengawa iya ti nyadi kepala dalam kompeni SEB di Sarawak nya.
Okokrim!
Bala pengari NGO nya mega datai ke Norway laban dikangauka opis Okokrim baum, iya nya sebengkah opis penagang penyalah makai suap, ti enggau sida baum ba opis sida di Oslo ti endur sida ngenataika sepuchuk surat penerang pasal pengawa enggau ulah Sjotveit di Sarawak.
Raban NGO ti betemu enggau Okokrim, sebengkah opis penagang penyalah makai suap di Norway
Arnt Angell, Kepala Lawyer enggau Kepala II ari Opis Okokrim, madahka undang-undang penagang penyalah makai suap Norway nya endang mungkur semua peranak menua sida ti ngereja penyalah makai suap sekali ke dalam menua sida empu tauka di menua bukai kelimpah ari Norway.
Udah tembu aum nya, Okokrim lalu ngamatka penerang sida bisi nerima surat penerang pasal Sjotveit nya ti udah dikarang raban Bruno Manser Fund, ti disukung bala bakih sida di Norway, iya nya raban NGO FIVAS, ti madahka pekara nya deka diambi tindak enggau patut sereta jampat.
Nambah ke nya, ba minggu nyin kemari Sjotveit bisi ditemu meri sebuah kontrak masang kabel bekuasa tinggi beungkus US$200 juta ngagai kompeni sida Taib Mahmud sebilik, nyengkaum ngagai kompeni Sarawak Cable Berhad, iya nya sebengkah kompeni ti ditumbuhka anak Taib Mahmud, Abu Bekir Taib, dikena ngulihka penguntung ari projek ti benama ‘Koridor Tenaga’ SCORE.
Kontrak berega US$400 juta dikena masang kabel bekuasa tinggi ti ke penudi tu tadi diberi baka nya aja ngagai sida Taib sebilik ti diatur sereta dikemataka Torstein.
Aku enggau tuan aku – ngatur pengawa ba SCORE ti udah ngenataika asil bejuta-juta ringgit ngagai kompeni-kompeni sida Taib sebilik
Beserimbai enggau nya, sida Taib sebilik terus bulih penguntung ari ti nerima kontrak ngaga jalai, dagang simen enggau nengali ti dikuasa sida sebilik aja ba pengawa ngaga semua tekat, ti nyau deka semua nya diberi ukai ngena atur tender tebuka ti dikemataka Sjotveit.
Laman blog tu kala udah nuliska berita ti madahka Sjotveit udah ngulihka duit-jali ba penyampau RM15 billion (tauka US$5 billion) ngarika kompeni SEB dikena nyukung projek-projek nya dalam taun 2011.
Tang, Torstein Dale Sjotveit, ti baru udah nerima pangkat Datuk ari perintah Sarawak, mengkang enda ngeluarka Repot Taun kompeni SEB nya kenyau ari taun 2010 suba, ti endur mensi mayuh di serata dunya enda nemu ulu-ili pasal pengawa ti dikereja iya enggau Taib di menua Sarawak.
Ukai semina ngemansangka SCORE tang mega ngulihka penguntung ke diri empu ari kontrak-kontrak bekaul enggau pengawa nyual kuasa elektrik ti murah
Okokrim mega diterangka raban NGO nya ti madahka semua kontrak murah-murah ari Bakun lalu diatu ari Murum, udah mai penguntung ngagai sida Taib Mahmud sebilik.
Ambi ke banding, OM Holdings, iya nya sebuah kompeni ari menua tasik ti bisi bekaul enggau menua China, ti bepalan di Bermuda, ti meranakka puku dagang sida ba pengawa ngelebur besi mangan, udah meri mayuh kontrak ngagai kompeni sida Taib sebilik, nyengkaum kontrak ngaga perengka ti diguna enggau syer 20% ba anak kompeni sida di menua Sarawak.
Aku enggau bos aku – nyain sempekat enggau OM Holdings
Baka nya mega, kompeni Rio Tinto Alcan ti udah matak diri ari projek ngelebur aluminum ti dilanggurka udah bekau Sarawak Report mantaika baka ni dagang nya bekaul enggau sida Taib sebilik.
Repot ari menua Sarawak ti dibantaika ba aum gerempung Bansa di Geneva bedau lama tu udah endang digerini gambar-gambar Torstein enggau Taib Mahmud lebuh ti nanggam sempekat bekaul enggau pengawa ngelebur aluminum ti balat begunaka kuasa elektrik, semua kontrak nya endang ditengali kompeni-kompeni enggi sida Taib Mahmud sebilik.
Tu nyengkaum perengka pengelebur aluminum Press Metal di pelilih menua Mukah.
Aku enggau bos aku – kontrak masang kabel bekuasa tinggi ke SEB ti beungkus RM8.2 juta ke perengka Press Metal ditangkup kompeni sida Taib sebilik, Sarawak Cable
Kaul dagang enggau perengka pengeluar silikon Tokuyama enggau perengka pengelebur besi mangan Asia Minerals mega bisi meri kontrak pengawa masang kabel bekuasa tinggi ngagai Sarawak Cable ari SEB.
Aku enggau bos aku – nadai kenaya Pengerusi Hamed Sepawi lebuh maya Kepala Menteri Taib nyadi pengerusi ngemataka pengawa nanggam sempekat ti nguntungka iya empu ti dikereja Torstein ngarika kompeni SEB
Raban NGO tu udah ngayanka pengirau ati sida laban nadai udah meda Repot Empas Porjek Ba Rampa Menua enggau Mensia ti dipejalaika ngatika diri ti tau dikena meri pengarap ke bala pemerati ti beobjektif ti endur orang mayuh enggau rampa menua ti sensitif tu patut dibasa enggau diintu.
Agi mega, orang ti nyadika kepala dalam Opis Rampa Menua enggau Pengeraja Asal Sarawak, nya Menteri Perambu enggau pengeraja Asal, endang ukai orang bukai, tang Abdul Taib Mahmud empu.
Enggau nya, terang bendar utai ti disebut enggau nama ‘penguntung ke mensia mayuh’ nya ke bendar iya dikena mai penguntung ke Taib Mahmud enggau sida sebilik aja, terima kasih ke penaluk ati kepala dalam SEB ti digaji US$1.2 juta setaun, Torstein Dale Sjotveit.
Gerempung Bansa
Ngembuan tuju ba pekara bekaul enggau SCORE tauka semina nyadika orang ti dikena ngulihka penguntung – J C Fong, siku lawyer menua ke dulu suba.
Nambah ke nya, Sjotveit udah ngereja pemanah ke Taib ari ti nganjung Sapit Presiden iya dalam SEB, Nick Wright ngagai aum di Geneva ba minggu nyin kemari ngambi ke bisi mantaika keretas kereja sida ti madahka Menua Sarawak enggau Sarawak Energy nya nadai sekali-kali ngelanggar sebarang atur pengelantang mensia tauka kuasa pengelantang orang bansa asal di menua Sarawak nya.
Berebak enggau aum di Geneva nya, bisi enda kurang ari enam iti empang jalai didirika bala orang bansa asal di menua nya dikena sida nagang pengawa ngaga Tekat Murum ti udah muru orang bansa asal pindah ngagai palan pengentap pendiau ti baru, lalu mega pemun pengawa ngaga Tekat Baram, ti disebut Sjotveit ngagai bala orang ti datai baum di Geneva, bedau diperundingka.
Siku orang ti diberi tanggungpengawa mantaika keretas kereja nya ngena chara bejaku bekaul enggau tekat-tekat ngagai Gerempung Bansa nya tukang gerah ti dikerinduka Taib, iya nya J C Fong, lawyer menua ti dulu suba.
Tang, nama pematut iya tukang Gerah tu, laban J C Fong mega nyadika siku ari raban bala pengarah dalam kompeni Sarawak Cable, iya nya kompeni ti nerima mayuh syer ari kontrak, ti bekereja begulai enggau anak Taib empu, Abu Bekir Taib?
Mansutka jaku ti nadai ngira bala orang di Sarawak, tauka semina nyadika siku orang dagang ti majak tampak nama.
Ke bendar iya, J C Fong mega benung ngulihka 1 juta syer dalam kompeni nya ti endur iya megai syer pemadu mayuh lalu nyadika projek SCORE endang meri untung ke orang siku-siku aja, tang ukai ke mensia mayuh di Sarawak.
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.