Latest Stories
Sections
Petunggal Taib, Hamed Sepawi ti nyadi pengerusi dalam SOPPOA
Pengawa dagang sawit Sarawak diatu udah mantaika penyai ke bendar sida udah bekau sida balat ngutuk kompeni Wilmar ari menua Indonesia, ti udah madahka pasal juluk ati sida deka ngubah ulah jai sida ti berusakka rampa menua ngelama tu.
Penerang dalam surat berita ti dikeluarka sida ba minggu nyin kemari nunjukka tindak sida nya enda nanggul Gerempung Orang Ti Beempu Kebun Dandang Besai Sawit Sarawak (SOPPOA) kelimpah ari pengawa sida ti ngulihka untung, taja pan pengawa sida ti nguji empelas mua diri.
Agi mega, sebaka enggau pengawa dagang ti bukai di Sarawak, SOPPOA endang dikemataka terit Taib Mahmud lalu gerempung nya nyereminka ulah jai iya empu.
Pengerusi SOPPOA iya nya petunggal Taib, Hamed Sepawi ti mega nyadi pengerusi ba kompeni-kompeni besai ti bukai baka Sarawak Energy Bhd, Naim Candera, Ta Ann enggau Sarawak Plantations enggau mega Gerempung Pemansang Pengawa Dagang Kayu Batang, nyengkaum mayuh agi kompeni enggau kebun dandang besai ti bukai.
Nya alai lebuh SOPPOA mansutka jaku sida kitai tau nyadang tindak sida nya endang datai ari runding Taib lalu pengeringat iya ti madahka Wilmar deka nguji meresi nama diri nya nadai ngelala sekat sempadan.
Tang dalam proses nya SOPPOA dipeda udah mansutka langgur Taib ti deka nebang mayuh agi kampung di Sarawak enti dibandingka enggau maya dulu ari tu. Disadang nyentukka sebagi ari tiga bagi rampa menua di Sarawak!
Reti leka jaku ‘kampung’ ba Taib nya nyengkaum kebun sawit ngambika iya tau ngumbai rampa kampung asal Sarawak agi besai
Diatu menua Sarawak dibungkur sejuta hektar kebun sawit, lalu nyerumba nya Kepala Menteri seruran madahka menua Sarawak mengkang bisi 80% rampa kampung bungas.
Taib enggau bakih politik iya, Menteri Pemansang Tanah Sarawak, James Jemut Masing, udah madahka sida ngembuan juluk ati deka muka mayuh agi kebun sawit nyentuk ngagai 2 juta hektar datai ba taun 2015 ila.
Tu mih peluang dikena sida ngisi kuchik sida nengah pengawa politik.
Tang pengeringat iya ngagai pengawa bejalaika atur enggau chara ti meruan agi ba rampa menua, chunto iya, nyeliahka diri ari nganchurka tanah paya gemu, dipeda baka ti mantaika langgur asal Taib nya.
Ringat ke tanggungpengawa manah ngagai rampa menua ti dikumbai tau ngeruga Pengelikun Menua!
SOPPOA bisi madahka ngagai kami langgur sida ti deka muka nyentuk ke 3 juta hektar kebun dandang besai sawit lalu melakangka garis atur entarabansa.
Sarawak mengkang nyadi sebuah menua ti agi nejuka kampung paya tanah gemu ditebang sepeneka ati. Tu ari ketegal Taib Mahmud ti seruran ngumbai diri duduk tinggi ari undang-undang menua, lebih agi ba pengawa ngulihka duit.
Tu mih siku orang ti ngumbai diri nyadika tuai ba pengawa nyaga pemanah rampa menua lalu ngemesaika ‘dagang temuai-eko’ ba hotel enggi sida sebilik ti didirika sida atas tanah orang bansa asal ti udah dirampas sida.
Pengawa rangka enggau ngerusak rampa menua nya udah meri malu ngagai menua Malaysia ti diatu benung nanggam sempekat dagang pechuma enggau Gerempung Eropa (EU) ti deka ngelaungka menua Sarawak. Kebuah baka nya laban Taib mengkang enggai bejalaika tanggungpengawa nyaga tanah enggau kampung di menua iya empu nya enggau kampung Borneo.
Bala orang ti beranakka puku dagang enggau bala penyukung iya dalam SOPPOA diatu dipeda besenutuk runding ba chara sida ngulihka untung ti kamah ari pengawa ngerusak dunya tu, lebih agi ti mai penanggul ngagai raban bansa asal ti udah dirampas sida tanah pesaka lalu udah nya dikena muka pengawa industri ti semina deka nguntungka seraban orang politik ti bekuasa aja.
Enggau nya SOPPOA udah bulih penuduk ba raban orang ti balat ngeruga gaya hari lalu bala orang dagang sida ti selalu bebulaka asil pansik saintifik ti ngumbai sida aja ti nemu agi ari bala saintis lebuh asil pansik nya deka nanggul penguntung sida.
Terang bendar diatu ‘pansik besaintifik’ di menua Malaysia ti dipelanja gerempung baka SOPPOA nya deka nyimpul penemu madahka pengawa nebang kampung nadai nanggul tanah enggau rampa menua lalu udah nya sida deka ngasuh orang mayuh arapka penemu sida.
SOPPOA udah nyadi kaban Aum Dagang Sawit Meruan dalam taun 2008 suba. Patut kini endur sida diatu diketuka nyadi kaban?
Aku nemu nama utai ti manah ke aku empu. Taib enggau bala orang ti beempu kebun sawit ti taluk ngagai iya
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.