Latest Stories
Sections
Raban polis benung nyaga bala tukang tumbang MM Golden ba sebengkah penyarut ujung minggu
Pekara ti seruran dikemesaika Taib ti dikumbai iya ‘pemansang’ diatu dikumbai ‘penyalah makai suap’ munyi ti disebut siku tuai menua di Malaysia ke dulu suba, Mahathir Mohamad.
Ari penyarut ti udah nyadi entara raban polis enggau orang bansa asal di pelilih Baram ba ujung minggu nyin kemari, Mahathir udah ngenang pasal pengawa ngulih ke kayu batang chara ti ngelanggar undang-undang ti balat udah ngerusak rampa kampung asal di menua Malaysia.
No longer responsible – Mahathir speaks out
Ba buah kenang iya ti senutuk enggau penemu raban NGO rampa menua, Mahathir bisi ngenang pengelenyau 70% ari rampa kampung asal Malaysia, ti udah ngeruga pengidup orang bansa asal Malaysia, lalu iya mega bejaku ke pasal penyalah makai suap ti rangka sekeda orang ti ngujungka pengerusak rampa menua.
Dalam blog iya, iya udah ngerintaika nama kebuah raban orang ti rindu kepemanah rampa menua enggau raban bansa asal berasai irau bendar ati ke pengawal ngulihka kayu batang ti enda betagang, ti udah ngujungka pengelenyau kampung endur orang bansa asal beridup sereta mega ngujungka sungai nyadi kamah sereta mabu.
Iya besalahka pengawa ngulihka kayu batang ti enda betagang nya bepun ari penyalah makai suap lalu mansutka jaku tanya, sekali ke menua Malaysia patut majak ngulihka pengaya ari pengawa nebang kayu batang?
Kayu batang ti dichuri kompeni MM Golden ari tanah NCR orang bansa asal di Baram – diatu raban polis benung nyaga bala tukang tumbang nya
Mahathir nyebut bala orang ti bulih untung ari numbangka kayu batang nya bala sida ti endang udah kaya raja.
Lalu, munyi ku iya nambah, bala orang ti kena tuntung penanggul pengidup nya raban orang bansa asal ti merinsa ti endang bepanggai pengidup ba kampung.
Iya mansutka pengasai malu iya ba raban orang ti kaya-kaya di menua Malaysia ti udah ditemu ngerusak rampa kampung ti pemadu berega di dunya tu ngambi ke sida majak nyadi kaya.
Tambah mega, kenu ku Dr M, rampa kampung Malaysia nya “pesaka tuai ti pemadu berega”.
Enti bala tuai menua Malaysia meretika rampa kampung mua pesaka ti pemadu berega, nama kebuah sida majak nebang kampung lalu meri awak ngagai kebun dandang besai sawit enggau utai bukai ti dikumbai sida “pemansang”.
Tu mih maya ti besai bendar guna ke Dr M nya nemuai ke menua Sarawak lalu ngayanka sukung iya ngagai raban bansa asal, ti udah bebendar amat nguji ngetanka tanah NCR sida kena keruga kompeni MM Golden
Kompeni MM Golden udah dipilih perintah menua Sarawak nebang semua kayu dulu ari pengawa nirika tekat Baram ti udah dilanggurka, taja pan pemendar nirika tekat Baram nya bedau diberi.
Nama kebuah raban polis nyukung bala tukang tumbang lalu ukai ngelindung bala orang asal ti bempu tanah NCR?
Perintah menua Sarawak ti betuaika Gabenor Taib enggau kaban iya Kepala Menteri Adenan Satem ngembuan pendiau ti jai laban seruran muru sebarang sapa temuai ti deka ngayanka sukung sida ba orang bansa asal ti nirika empang jalai.
Tang, sekali ke seduai nya deka ngelabuhka bos seduai ti dulu suba nya, siku veteran politik Malaysia, Dr Mahathir?
Ba pengelama lebih setaun raban orang asal ti kih tu udah ngelindung kandang menua sida ari ti kena keruga bala tukang tumbang ti ngelanggar atur
Udah beberapa taun enda mujur nyukung bala orang bansa asal ari Malaysia Timur napi keruga mafia kayu batang ti rangka, Taib Mahmud, Dr M patut nemuai ngagai bala orang bansa asal ti enda bidik nya.
Tambah mega raban bansa asal nya semina minta ngambika undang-undang enggau proses nya dibasa lalu dipejalaika enggau lurus.
Kompeni MM Golden nadai kuasa nebang kampung sida lalu raban polis enggau perintah menua patut nagang pekara tu majak dikereja, lalu ukai mantu bala tukang tumbang nya berusakka tekat jalai lalu ngemba sida ngena ujung senapang.
Pengawa ti dikemendarka Adenan Satem nya atur ngaga jalai masuk ngagai tapak projek tekat hidro Baram ti bedau dikemendarka.
Taib enggau Adenan – raban polis bejaga ngelingi seduai. Tang seduai tu tuai menua ti balat agi ngelanggar undang-undang.
Nyadika sebagi ari lisin nebang kayu batang (ti enda dikemendarka undang-undang ulih raban bansa asal) MM Golden udah diberi kontrak ngaga jalai masuk ke guna perintah menua.
Ba ujung minggu nyin kemari, munyi ti direpotka bala aktivis rampa menua, raban polis udah ngerumpang empang jalai lalu udah nya pindah ngagai siti agi empang jalai ti didirika komp;eni MM Golden dikena nagang pemasuk orang bansa asal ngachau pengawa sida ti benung ngaga jalai.
Tang bala polis ti besenyata nya nadai ngepunka penyarut tauka pengasar, lalu sida ngemendarka orang bansa asal dia mansutka buah penemu ti udah nya lalu ngalihka cherita ti madahka empang jalai polis nya dirusak bala orang bansa asal.
Diatu raban polis udah diengkahka ba endur ti mar ulih bala bos politik sida ti belanggarka undang-undang.
Kebuah pia laban pekara tu patut didinga dalam kot sebedau sebarang pemutus dipejalaika dikena nebang kampung tauka nirika tekat hidro, lalu bala tukang tumbang enggau perintah Sarawak patut surut dulu nganti pechara dalam kot udah diatur.
Tambah mega, sida tu ti tama lalu bekerugaka tanah enggau kampung enggi orang bansa asal.
Tang Adenan enggau Taib mengkang enggai nganti pemutus kot laban seduai nemu diri tetap alah bechara.
Ari ti ngena chara kasar dulu lalu udah ngeluluka diri enda salah lebuh kot mutuska pechara – tu endang nyadika amal ti selama di menua Sarawak nyentuk ke sehari tu. Orang bansa asal udah ditejuka nadai agi menua endur beridup kelimpang ari ti diberi pampas ti mimit bendar, lalu pemutus pechara majak diapil perintah.
Bekau kena keruga
Mahathir patut nemuai ngagai endur empang jalai nya didirika lalu nyenbut leka jaku BADU AGI ngagai penyalah makai suap ngulihka kayu batang, lalu mega ngagai ulah salah nugungka pengaya baka ti dikereja Taib Mahmud.
Mahathir besetuju ke penemu ti madahka 70% ari rampa kampung di Malaysia nya udah rusak, lalu iya nyangkal jaku bula ti suah disebut Taib Mahmud ti ngumbai selampur menua Sarawak agi penuh laban kampung bungas ti enda kala ditegu.
Mahathir ngaku pemula nya terang bendar lalu iya mengkang besalah penyalah makai suap nya pun semua penanggul tu.
Diatu bedau laun ke Mahathir ngemetulka utai ti udah salah kereja lalu mantah Taib, enti iya sanggup datai ke menua Sarawak lalu ngayanka sukung iya ba Empang Jalai di Baram!
Kami begunaka sukung udah bekau kami nguan empang jalai tu ngiga pengelurus, Dr M
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.