Suratberita Pengawa Dagang The Economist Ari Menua UK Madahka Tu Mih Maya Ti Manah Endur “Perintah Apek Bayat” Malaysia Ti Betuaika Najib Nya Nyurutka Diri

• 13 Apr 2015
• BM 翻译

Pemanah nama Menteri Besai Malaysia, Najib Razak, ba tikas entarabansa sehari tu dipeda suyam udah bekau sebuah artikel berita dikeluarka suratberita pengawa dagang pemadu tebilang di menua Britain.

Suratberita pengawa dagang The Economist endang kenyau ari suba nyadika penyungkak runding enggau peransang pengawa dagang di menua UK.

Ba berita ti dikeluarka dalam minggu tu ti ngena topik “Repression in Malaysia” udah nekanka pasal pekara ti dikumbai sida “nadai bepenyambung” entara leka jaku liberal dalam PR Najib enggau pekara ti bendar pasal “perintah apek bayat” iya.

Nya udah nyadika jaku kutuk ti terang sereta tebuka enggau terus ti dipansutka kepala suratberita ti datai ari menua tunga ke barat.

Suratberita The Economist udah meresa enggau silik enggau nadai bechiping ba Perintah Malaysia ke diatu lalu manding iya enggau jaku dalam PR Najib ti dipelanja iya enggau ungkus ti besai-besai ti endur iya seruran didinga ngemesaika Malaysia nya ‘sebuah menua demokrasi ti moden ngembuan pupu raban bansa, jalai pengarap enggau adat asal’ ngena chara ti baru.

The Economist nyimpulka penemu sida, tu mih maya endur dunya patut nulak gambar modenisasi ti jelan ti seruran dikenataika bala tukang ensera tunsang Najib lalu iya patut belabuh ngaku ti endur iya ngena pengasar ba bala munsuh politik iya, nyungkak politik bebagi bansa ke guna politik iya empu lalu perintah iya nya kelalu balat dipalit penyalah makai suap.

Undang-undang penagang pengawa kasar (ti udah tembu dipesetujuka enggau belalai) udah netapka nya nyadika sebengkah chara dikena nekan semua munsuh politik dalam menua iya empu – di Malaysia.

The Economist mega nangkan Presiden Obama ketegal iya ti udah ‘nyukung’ gaya progresif PR Najib, nyerumba atur dalam perintah Malaysia empu ti udah enggau benung menyati, beduan lalu ngejil bala tuai penyakal ti endang ngembuan juluk ati politik liberal ti bendar.

The Economist mega nunjukka pengawa nipu ba tiap kali bepilihbesai, skandal pengelenyau dui twang turu 1MDB enggau pengawa ngubah undang-undang dikena ngejil sebarang orang ti mantah ti endur Najib betemegah ke diri deka madamka laban enggai ke Presiden Obama enda agi rindu bemain golf enggau iya dudi hari ila, tang iya udah enda tau enda nginsil penemuai iya ke negeri Washington.

“Menua-menua ti nyadi kaban dagang Malaysia patut diterangka utai ti bendar nyadi di Malaysia empu. Sida patut mechat penyalah makai suap di Malaysia, pengusut ba kuasa pengelepas enggau politik bebagi bansa. Sida patut ngansak pengawa madamka Undang-undang Pengasut enggau ngejil nadai betatak pengelama sebarang saspek ti dipeda sida ngereja penyaalah. Nyentuk ngagai atur pulai manah, ukai semina main golf aja ti patut diiyar ke tisi; tang langgur penemuai Menteri Besai ke nengeri Washington ba taun tu mega patut ditangguhka dulu,” pia ku penemu The Economist nya, ti dikeluarka kena 11hb April 2015 tu tadi.

Tau dibacha enggau lenak agi nengah internet tauka peda nangkanka tu

PERINTAH APEK BAYAT BEMAIN POLITIK BEBAGI BANSA, NAJIB RAZAK PATUT NYURUTKA DIRI

April 11hb, 2015

Menteri Besai Malaysia, Najib Razak, udah ngayanka menua iya nyadika sebengkah menua model Islam ti jelan – iya nya sebengkah menua demokrasi mayuh pupu raban bansa enggau adat asal enggau mega nyadika tuai menua ti ulih bebatak asur penemu enggau peranak menua nya empu.

Najib udah bejaku pasal langgur iya ti deka madamka undang-undang kasar ti dikena ba maya perintah British kelia seraya ngerembaika pengawa dagang ti kreatif. Nyerumba nya, bala tukang ensera tunsang iya madahka kepala sida nya merambu deka sebarang kuasa ti mudah ngerijat dalam parti politik iya empu, UMNO, ti lama udah bepagut ba kuasa lalu udu dipalit raban kroni enggau atur politik samseng ti kasar.

Presiden Obama udah nyukung ulah nya dulu suba. Obama nyadika presiden ari menua Amerika Syarikat ti ke terubah kenyau ari taun 1966 ti nemuai ke Malaysia. Ba ujung taun nyin kemari di Hawaii iya udah merindang ati diri seraya bemain golf enggau Najib. Rumah Burak udah chakah bendar nusui pasal “pemansang ba kaul” entara menua Amerika enggau menua Malaysia.

Tang tu mih maya endur kitai patut nangkan Najib pasal takah ti majak besai entara cherita ti ditusui tunsang enggau berita ti endang amat-amat nyadi. Ekonomi menua Malaysia diatu mega dituntung penanggul skandal 1MDB, iya nya sebengkah wang turu ti dipenyadi Najib lalu diatu wang turu nya udah balat ditinggang utang ti manggai $12 billion.

Rekod kuasa pengelantang mensia mega tau bendar ngasuh ati orang mayuh irau. Tiga taun ke udah Najib udah munaska undang-undang perintah koloni British ti kelalu kasar, iya Akta Keselamatan Dalam Negeri, ti ngemendarka orang ti salahnnya ditangkap enggau enda ibuh dipechara. Tang ba minggu tu perintah Najib udah numbuhka Undang-undang Penagang Pengawa Kasar (POTA) ti ngemendarka orang ti salah nya ditanka enggau naka pengelama. Taja pan undang-undang (POTA) nya digaga dikena ngelaban soldadu penyelawai jihad, tang bala lawyer enggau gerempung siviks ulih belabaka undang-undang nya tau dikena ba rampa ti besai agi.

Gempung parti politik ti betuaika Najib ngena dua chara iya nya pengasar enggau enda bechiping dikena sida ngelaban munsuh politik sida. Ba pengawa bepilihbesai ke penudi tu tadi iya nya dalam 2013, gempung parti Najib udah alah undi popular ke terubah iya. Tang sida ulih mengkang bepagut ba kuasa ketegal sitak udah dibagi mit-mit. Tang udah nya Najib udah ngukum tuai penyakal ti chakah sereta regas, Anwar Ibrahim, ti ba bulan Februari kemari udah ditinggang ukum jil ketegal beleman sama lelaki. Jaku kutuk orang di Amerika nya dipeda enda bebendar.

Kenyau ari beberapa taun tu udah sekeda ari bala aktivis enggau bala tuai penyakal ti kena tan nya majak betambah ba Akta Hasutan, iya nya sebengkah agi undang-undang rambau perintah koloni British dikena ngulihka merdeka. Najib kala didinga besemaya munaska undang-undang nya, tang diatu undang-undang nya digaga tegap agi enggau atur ukum ti berat agi lalu genteran jaku ti dikena nagang sebanrang orang mansutka jaku ti ngeleseka pengarap Islam.

Ba bala sida ti udah kala ditangkap baruh Undang-undang Hasutan nya bala orang ti udah mantah penumbuh undang-undang hudud, ukum ti berat enggau ukum mandatori, nyengkaum ukum dituku enggau batu enti ditemu salah beleman sesama penempa, baka ti bisi dalam undang-undang Islam. Undang-undang hudud enda engkeman dipejalaika di menua Malaysia, tang orang Islam ari parti penyakal keran deka ngena undang-undang hudud di menua Kelantan. Perintah BN-UMNO enda tentu deka nerima undang-undang nya, tang chara belalai sida nyukung laban dikena sida mechahka serakup parti penyakal Pakatan Rakyat ti benung nyikap diri enda betuaika Anwar Ibrahim.

Enggau chara meransang semengat Islamis, perintah BN-UMNO ditemu benung chakap nyepu bara api bebagi bansa enggau bida jalai pengarap dalam sebengkah menua majoriti bansa Melayu (enggau Islam) enggau raban minoriti China enggau India. Ba rambau penyarut politik bebida bansa taun 1969 suba, menua Malaysia nyau ka tumbang. Bemainka isu bebida bansa tau bendar nganu penyerakup raban bansa. Dikena ngemanahka maya dudi UMNO, Najib patut miki kaul enggau orang bansa China enggau India.

Menua-menua ti nyadi kaban dagang Malaysia patut diterangka utai ti bendar nyadi di Malaysia empu. Sida patut mechat penyalah makai suap di Malaysia, pengusut ba kuasa pengelepas enggau politik bebagi bansa. Sida patut ngansak pengawa madamka Undang-undang Pengasut enggau ngejil nadai betatak pengelama sebarang saspek ti dipeda sida ngereja penyaalah. Nyentuk ngagai atur pulai manah, ukai semina main golf aja ti patut diiyar ke tisi; tang langgur penemuai Menteri Besai ke nengeri Washington ba taun tu mega patut dipadamka.