Penemuai Najib Ke Sarawak Dipeda Nyadika Kimpin Tumu Iya Napi Bepilihbesai

• 8 Jun 2015
• BM 翻译
• English
• Malay

Seraya napi pengeringat orang mayuh pasal GST di serata menua nyerumba bakih dagang iya, Jho Low, ti kena tuduh enchuri duit tabung bansa bebillion-billion ringgit ari 1MDB, Najib udah nimbal ngena chara bekimpin ngatur mayuh ‘program nagih sukung’ ti ditagaka dikena ngenegapka kuasa iya.

Sehari tu nyau datai ba idar Kuching Sarawak, ti endur sebuah stadium udah disewa dikena ngatur pengerami nyambut penatai lalu muji-muji siku tuai menua – serak tu bisi 10,000 orang disadang datai ngulu pengawa tu.

Bala orang mayuh ti datai ngulu pengerami tu endang diambi BN lalu sida diberi pemakai ti pechuma, baju-T sepasang siku enggau perengka pengangkut ti dipelanja BN – pia mega besereta enggau duit belanja RM25 + tambang pulai-mansang (pechuma) ke tiap iku.

Disimpulka ngena jaku pandak, tiap iti pengerami kimpin ‘Aku Rinduka Najib’ tu begunaka belanja bejuta-juta ringgit.

Bepuluh-puluh buah bas udah dikena ngangkut bala orang ti diasuh ngulu pengerami ke Kuching dari pelilih menua Sibu, Sarikei, Julau enggau Bintulu nengah malam, besereta enggau duit belanja RM35 siku-siku. Parti UPP disadang melanja pejalai sida tu, ti mega meri baju-T pechuma ngagai bala orang ti diangkut ngena bas tu.

Baka ni chara atur pengerami tu dipelanja?

Duit bajet ti diagihka ngagai Opis Menteri Besai udah ditikika kenyau ari Najib Razak mangku pengawa nya. Tiga taun ke udah tu bajet nya ditambah ari RM14.6 billion, ngagai RM16.5 billion lalu ngagai RM19.6 billion taun tu tadi.

Tang taja baka nya pengarap sekeda orang nyau makin tendu ba chara duit bajet bebillion-billion ringgit nya dipelanja.

Pekara ti terang sereta nyata bendar nya ba pengerami parti politik ukai guna ti betul ngena duit orang mayuh tu, lalu utai ti enda ulih diterima nya, agenda politik ba orang siku-siku ba sebuah parti politik, ti endur Najib diatu dipeda majak chakah agi ngetanka penuduk iya ti nyadi tuai menua.

Najib enda tau sepeneka ati iya ngeruga wang turu menua dikena iya melanja kimpin dikena iya ngenegapka penduduk iya dalam parti UMNO empu.

Nyerumba nya Sarawak Report bisi nerima penerang dari dalam pasal sebengkah agenda ti bukai ti diperambu Najib maya iya bekimpin ke menua Sarawak.

Sebedau tengah hari hari Tiga tu tadi, beberapa jam sebedau Menteri Besai enggau bini iya datai di padang penyangkai bilun Kuching nepan jet seduai empu, dia bakih dagang iya, Bustari Yusuf bisi betemu lalu berandau enggau Kepala Menteri Sarawak, Adenan Satem.

Bustari Yusuf, ti kala rapat kaul enggau Rosmah Mansor bini Najib, mega bekaul rapat enggau Najib empu kenyau ari dulu suba, munyi ti ditusui pemeri penerang ari dalam. Bustari seruran dipeda nyereta Najib seduai Rosmah ke menua tasik.

Lalu kami ulih ngamatka penerang nya Bustari nya nyadika orang ti melanja penemuai Najib di Kuching minggu tu, udah bekau iya ti lama nyadi tukang wang ke parti PBB kenyau ari Taib Mahmud nyadi Kepala Menteri suba.

Kena lemai hari Tiga nyin kemari, Menteri Besai enggai bini iya udah dijamu ba sebengkah pengerami makai malam dikena muji seduai iya dalam Serakup Dayak Bidayuh Bansa (DBNA). Taun nyin kemari Bustari udah nyuaka duit bantu RM300,000 ngagai serakup ti nengah siku menteri ‘pengentara’, dalam cabinet perintah Sarawak, Michael Manyin.

Terang bendar, Bustari Yusuf ngarapka pemeri iya nya disambut enggau tempap jari ti inggar lalu pia mega, orang dagang tu mega ngarapka diri ulih majak beranakka puku ba perintah ti betuaika Najib Razak
Sarawak Report bisi bulih penerang ti madahka Bustari Yusuf udah mujur diberi semua kontrak projek ngagai jalai besai Pan Borneo ti dipelanja ngena duit ari Perintah Besai, beduduk ba ketegal-ketegal ti enda ulih diterangka ngena leka jaku ti muntang.

Menyadi Bustari Yusuf empu, iya nya Fadillah Yusuf ti nyadi Menteri Kerejaraya dalam Perintah Besai, ulih ditekanka besalah ngereja konflik bebalutka batang pengawa iya.

Sarawak Report bisi diterangka ti madahka Bustari bisi meri penemu iya ngagai Adenan ngambika ngatur bepilihbesai Sarawak tumu agi – iya nya beberapa bulan dulu ari timpuh.

Undi-undi bisi nunjukka awakka Kepala Menteri nya ngatur ‘kimpin tumu’ dikena ngabas ubah ba chura perintah Taib Mahmud lalu pia gimik anti makai suap ti udah dipeda mujur dikena ngangkatka pemanah nama BN ba bepilihbesai ti deka diatur ila.

Najib lalu ngena peluang ari pemujur BN menua Sarawak ti mayuh menang kerusi bepilihbesai dikena iya nyungkak kuasa iya nyadi tuai ba tikas menua Malaysia.

Tu diperatika nyadika kebuah Najib ngansak Adenan ngubah langgur iya ngatur bepilihbesai Sarawak taun baru awakka diatur tumu ke agi ba taun tu!

Lalu ukai semina nya aja, laban Bustari enggau Najib bisi agenda seduai empu ti ngena pengerapat kaul seduai enggau Adenan ngambika numbuhka parti UMNO di menua Sarawak, munyi ku penerang ti bisi datai ba Sarawak Report.

Tu mih agenda ti dipejuraika di belakang pintu nyerumba penemuai iya ke Kuching, nitihka penerang ti diberika ngagai kami, nyerumba Najib ti ngansak Adenan ngatur bepilihbesai tumu agi.

Kami udah ngeluarka rintai nama ‘pengari ti dikemendarka’ dikena Najib enggau Bustari nekan Adenan awakka nyukung rintai nama nya dikena ba bepilihbesai tu ila.

Rintai nama pengari ti disadang sida taluk, nitihka penerang ti diberi ngagai kami:

Rintai nama pengari rayat enggau bala YB ti dipilih Najib, Rosmah, Fadillah enggau Bustari
1. Datuk Wan Hamzah Wan Paie – N.5 Demak Laut, PBB *
2. Fazzrudin Abdul Rahman – N.6 Tupong, PBB *
3. Datuk Abdul Karim Rahman Hamzah – N.14 Asajaya, PBB
4. Hamzah Brahim – N.15 Muara Tuang, PBB *
5. Datuk Michael Manyin Anak Jawong – N.18 Tebedu, PBB
6. Aidel Lariwoo – N.20 Sadong Jaya, PBB
7. Simoi Peri – N.23 Lingga, PBB
8. Datuk Mong Anak Dagang – N.26 Bukit Begunan, PRS
9. Malcolm Mussen Anak Lamoh – N.29 Batang Ai, PRS
10. Gerald Rentap Anak Jabu – N.31 Layar, PBB *
11. Robert Lawson Chuat – N.32 Bukit Saban, PBB
12. Abdullah Saidol – N.36 Semop, PBB
13. Alexander Anak Vincent – N.43 Ngemah, PRS
14. Annuar Rapaee – N.49 Nangka, PBB
15. Datuk Joseph Mauh Anak Ikeh – N.52 Tamin, PRS
16. Datuk John Sikie Anak Tayai – N.53 Kakus, PRS
17. Tan Sri Datuk Amar Dr. James Jemut Anak Masing – N.56 Baleh, PRS
18. Liwan Anak Lagang – N.57 Belaga, PRS
19. Datuk Dr. Stephen Rundi Anak Utom – N.60 Kemena, PBB
20. Ripin Lamat – N.62 Lambir, PBB
21. Dennis Ngau – N.67 Telang Usan, PBB
*Manuk Sabung enggi Fadillah Yusuf

Rintai nama Kaban Parlimen ti bulih sukung ari Najib, Rosmah, Fadillah enggau Bustari:
1. Anthony Nogeh Anak Gumbek – P.192 Mas Gading, SPDP
2. Datuk Dr. Wan Junaidi Tuanku Jaafar – P.193 Santubong, PBB
3. Datuk Seri Fadillah Yusuf – P.194 Petra Jaya, PBB
4. Rubiah Wang – P.197 Kota Samarahan, PBB
5. Nancy Shukri – P.200 Batang Sadong, PBB
6. Datuk Rohani Abdul Karim – P.201 Batang Lupar, PBB
7. Masir Anak Kujat – P.202 Sri Aman, PRS
8. William Nyallau Anak Badak – P.203 Lubok Antu, PRS
9. Datuk Norah Abdul Rahman – P.206 Tanjong Manis, PBB
10. Datuk Joseph Entulu Anak Belaun – P.214 Selangau, PRS
11. Wilson Ugak Anak Kumbong – P216 Hulu Rajang, PRS
12. Dato’ Seri Tiong King Sing – P217 Bintulu, SPDP
13. Anyi Ngau – P220 Baram, SPDP

Tu nyadika gempung ti dikuasa Adenan, Jabu enggau Fadillah diri menyadi, ti saum penemu deka ngenegapka penumbuh UMNO di Sarawak.

Engka bala orang Sarawak empu patut mechat penemu Najib ti deka ngenegapka parti-arti asal Sarawak emu?

Raban bansa Dayak nya sebengkah raban bansa ti ‘taluk’ ngagai BN, lalu mudah bendar nyerahka undi sida ngagai BN ketegal sepinggai asi.

Diatu rayat Sarawak patut belabuh madahka Najib, kelimpah ari sida ti manjung leka jaku “Kami Rinduka Najib”, patut ditukar enggau “Kini Penunga Duit Kami?” lalu “Beri Pulai Semua Duit Kami!”