Latest Stories
Sections
Suah ngulu aum Raban Pengarah 1MDB …
Diatu udah ulih dikamatka Jho Low, siku orang dagang China ti agi biak ari Malaysia ti udu bekontroversi, kala ngulu aum 1MDB lalu iya suah bulih lalau ari Menteri Besai nengah telefon binching iya.
Cherita tu tebantai udah bekau Jho Low enggau mega bakih iya, Najib Razak suah bebula penerang ti medahka iya ngekuarka jaku perintah ba atas sebarang pengawa enggau pekara dalam wang turu pemansang menua nya.
Penerang-penerang ti betambah ti datai ari bala pemesai ti benung bekereja enggau sida ti udah badu bekereja madahka Jho Low ukai semina bisi bekaul enggau pengawa nanggam sempekat dagang knusi ngaika Najib Razak (to digela iya “BB”, tauka Big Boss), tang mega di tampak agi sekumbang ti baum nya.
Sarawak Report udah dipadahka Jho Low bisi ngembuan paspot Amerika, sebengkah penyalah ba undang-undang Malaysia ti nagang peranak menua ngembuan lebih ari siti peranak.
Tu dipelabaka nama kebuah iya mengkang enggai datai ngagai aum pansik PAC di KL, baka ti benung dipinta orang diatu.
Enggau testimoni ti betambah bekaul enggau skandal tu ukai semina ke udah digempuruka dalam PAC, tang mega ti datai ari penerang-penerang ti bukai, nitihka pemeri penerang ari dalam 1MDB empu.
Tu mai reti, mayuh ari bala pemansik nemu lalu ngelala batang pengawa Jho Low dalam 1MDB lebih agi nengah penerang ti diberika ngagai Sarawak Report lebuh kami mantaika repot kami ke terubah pasal dagangkunsi PetroSaudi ba bulan Mach taun tu tadi.
Udah nya kami bisi nuliska repot pasal, baka ni mayuh dokumen enggau emel bekaul enggau dagangkunsi nya, nunjukka Jho Low endang betanggungpengawa ngatur pejalai dagangkunsi ngarika Menteri Besai.
Ba pun proses nya iya udah nyintak pansut US$700 juta lalu udah nya beratus juta ‘diinjau’ ari 1MDB.
Penerang ti udah nya nuju ngagai simpul penemu ti sebaka, ti endur Jho Low ngarika Menteri Besai, ti nyadika pemegang sher pemadu besai lalu mega orang ti nyain semua pekara wang dalam wang turu nya.
Jho Low begulai enggau sida Najib sebilik enggau mega dua iku pengarah dalam PetroSaudi, Tarek Obaid enggau Putera Teruki bin Sulaiman
Lebuh iya ditanya pasal batang pengawa iya, sehari udah bekau Sarawak Report mansutka cherita pasal 1MDB, Jho Low udah madahka ngagai raban pengarang berita ti ngerandau iya, orang ti beguna agi ba pengawa ngaga pemutus nya Najib Razak.
Mudh bendar ngumbai jaku tuduh nya ‘enda bepelasar”?
Taja pan baka nya, Perintah udah mechahka sunyi ti benung ngelingi pansik ti benung dipejalai ke nya.
‘Repot Interim’ Kepala Audit Menua udah bejalaika surat tesau ngagai bala pemansik enggau mega raban PAC, enggau pengarap awakka nadai agi komen orang nyentuk ngagai pengujung inkuiri nya.
Tang, kena hari Dua tu tadi, Sapit Menteri Pekara Wang Menua udah madahka repot nya udah ‘meresi’ pemanah nama 1MDB.
Keruga nya udah mai provokesyen ngagai siku pengari DAP ti benung nyadi kaban dalam PAC nya ngambika mantaika respon iya dalam media ti endur iya madahka penerang ari Sapit Menteri nya sebengkah ‘jaku bula’.
Penatai Jho Low ti suah ngulu aum bala pengarah nya ngalitka ati orang mayuh, tang penerang ari Tony Pua nya deka nyungkak bala pemerati kes nya ngaga pemutus penemu ti madahka mayuh agi salah guna kuasa udah kala dikereja.
Dibuai ari pengawa nyadi pengerusi dalam komiti iya empu? Mohd Bakke Salleh
Bedau tentu lama tu udah pansut siti berita ti madahka pengerusi asal 1MDB, iya nya Mohd Bakke Salleh udah badu mangku pengawa iya, udah bekau penerang pasal dagangkunsi enggau PetroSaudi nya ditemu orang mayuh.
Suratberita The Star udah nuliska repot sida ti madahka raban pengarah tekenyit udah bekau sida tetemuka US$700 juta dari US$1 billion ti asal nya ngambika bisi diangkatka 1MDB udah dikelimpangka masuk ngagai akaun ti bukai.
Mohd Bakke Salleh, ti nyadi Pengarah urusan dalam Felda enggau sida ti bukai udah minta ngambika duit nya patut dipulaika.
Lebuh peminta sida nya enda dikibuhka, iya ditemu ngemaduka diri ari pengawa iya nya lalu udah diganti enggau bakih Najib, Lodin Wok Kamaruddin, ti udah lama bekereja enggau Najib kenyau ari dalam Opis Menteri Pekara Dalam Menua, lalu Lodin maya nya bisi kereja dalam kompeni-kompeni pekara penyaga menua.
Siku agi ari raban dalam lembaga nya, Azlan Mohd Zainol ari KWSP mega ditemu udah badu mangku pengawa iya dalam 1MDB.
Suratberita The Star mega ngayanka pengirau ati bala pengarah ti madahka pemindah duit nadai udah diterangka ba atas aset-aset dalam 1MDB ari PetroSaudi dikena ngemendarka ‘bayar’ US$700 juta ngagai indu kompeni nya.
Kepala Audit menua mantaika repot interim iya ngagai PAC – taja pan sebarang orang ditagang berandau dalam kandang beberapa jam, tang Opis Menteri Pekara Wang udah madahka 1MDB nya udah beresi
Tu nyadi siti agi isu ti ngasuh ati irau ke bala raban pengarah 1MDB lebuh sida diayanka penerang dagangkunsi enggau PetroSaudi ti dipejalaika enggau jampat ba bulan September 2009 ulih Jho Low.
Enggau nya, nama batang pengawa enggau kuasa Jho Low nyadi pengerusi semua macham aum bala pengarah ti endur iya mega suah betanya nengah telefon binching iya enggau Menteri Besai ngambika iya ulih mejal bala pengarah nerima semua macham isi sempekat ti udah nya ngujungka mayuh ari bala sida udah minta badu bekereja taja pan baru beberapa minggu 1MDB nya ditumbuhka?
Tu mih sekeda ari jaku tanya ti deka dipansik raban PAV dalam beberapa minggu ti deka datai tu – sekali ke Jho Low nya dipeguna tauka enda.
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.