Surat-Surat Penerang 1MDB Ti Udah Dikachau Sereta Dibali – KU SAPA!

But dibantaika pengari parti DAP, Tony Pua

But dibantaika pengari parti DAP, Tony Pua

Dalam kandang beberapa hari, dia pengari 1MDB udah ragak bendar nuduh Sarawak Report laban dikumbai sida udah “ngachau” sekeda surat penerang, ti dikeluarka kami bekaul enggau salah atur pekara duit beratus-ratus juta dalam wang turu nya.

Tang mayuh agi chunto ti endur bala pemesai dalam 1MDB nya empu udah bekachauka surat-surat penerang lalu diatu majak dibantaika – ke sekali tu dikena nipu bank ngambi ngemendarka duit injau ngagai wang turu nya beratus-ratus juta ringgit ti disadang enda dikereja sida enti sema sida nemu pekara ti amat nyadi dalam akaun-akaun 1MDB nya.
Nadai perut malu mih sida dalam 1MDB nya nuduh Sarawak Report ngereja penyalah ti sebaka – bekachauka surat-surat penerang!

Pekara ti dibantaika pengari DAP, Tony Pua, ke diatu nya bekaul enggau pekara wang.
Ba sebengkah jaku enerang Tony Pua madahka iya bisi tetemuka siti ubah ti nyelai ti dikereja 1MDB dalam surat Repot Pekara Wang ti dianjung sida ngagai sekeda bank Malaysia lebuh sida ti nginjau duit.

Tony Pua madahka repot pekara wang nya diterima sekeda bank Maysia (Maybank, RHB, Alliance enggau HwangDNS) ari 1MDB, ti endur sekeda leka jaku dalam repot nya udah diubah.

Nya nadai begunaka orang ti kelalu pandai ba pekara wang ngelala isi surat penerang nya baka ti udah dikachau bala pemesai 1MDB. Reti nya bank udah diayanka sepenyampau duit ti diengkahka ke tisi dikena mayar pulai utang ti dipinta sida.

Tang ke bendar iya duit nya udah dipelanjaka.

Sebagi ari isi Repot Taun 2014 1MDB ti udah dikachau bala pemesai sida empu

Sebagi ari isi Repot Taun 2014 1MDB ti udah dikachau bala pemesai sida empu

Ulah ngerichau ti ngasuh bank saru tu tau dikumbai penyalah ti besai. Tony Pua udah nunjukka bagi dalam undang-undang penyati ti bisi bekaul enggau nya, taja pan orang mayuh endang nemu, semua bansa pemula enggau tipu nya endang belaban enggau undang-undang menua.

Ba sekeda bala orrang ti nitihka pengerembai skandal 1MDB nya, engka enda alit ati enggau penerang ti baru tu, laban Sarawak Report udah kala mantaika pasal cherita 1MDB udah ngeluarka surat-surat penerang ti pelesu baka ti dulu ari tu, ke sekali tu ba surat-surat penerang akaun ari bank.

Sepuchuk surat ari raban penerit undang-undang Singapura ti ditujuka ngagai bala pemansik Malaysia dalam bulan Mach taun tu tadi udah ngamatka surat akaun bank ti dikirumka CEO 1MDB Arul Kanda ngagai bank BSI di Singapura nya udah ditulak bank laban ditemu pelesu sereta bula.

Terang bendar mih surat ti dikirumka Arul ngena faks nya ngagai pampang bank BSI Singapura nya dikena ngabas sekali ke sida udah kala ngirumka akaun 1MDB di bendar ngagai anak kompeni Brazen Sky ba bulan November 2014 suba.

Akaun tu udah diayanka 1MDB ngagai orang mayuh madahka nya bisi ngundan “duit tunai” ba penyampau US$1.103 billion.

Raban penerit undang-undang Singapura madahka ngagai bala pemansik Malaysia, surat nya ngundan penerang ti enda betul lalu surat penerang ari Arul Kanda nya bedau dikeluarka bank lalu surat nya enda ulih ngayanka isi ke bendar dalam akaun ba Brazen Sky.

Udah bekau Sarawak Report ngeluarka penerang tu ba bulan April kemari, 1MDB enggau Opis Menteri Wang Malaysia udah tepejal ngau diri udah bula ngagai orang mayuh ti madahka akaun dalam BSI nya bisi ngundan duit tunai.

Menteri Wang Ke-2 udah madahka reti leka jaku ti dikena iya nya ngambarka duit dalam akaun nya ngena “unit”. Tang “unit” nya enda ulih ditentuka ngagai penyampau mata duit.
Tu ngujungka Sarawak Report nuduh 1MDB enggau perintah menua Malaysia ke diatu rindu bendar “ngenyarutka runding orang mayuh”.

Tambah mega, Opis Menteri Pengelikun Dalam Menua udah merambu deka nutup sekeda gerempung pengerembai berita ti rajin bendar nuliska pasal pengerembai skandal 1MDB bekaul enggau ‘penyalah’ ti berupai bendar tu.

Ke bendar iya 1MDB enggau bala menteri nya empu ti udah ngenyarutka sereta ngerichauka runding orang mayuh ngena mayuh macham jaku bula, pengawa ngubah surat-surat penerang enggau ensera-ensera ti berubah-ubah bekaul enggau 1MDB enggau pengelenyau duit menua bebillion-billion ringgit.

Sign-up to receive regular updates from Sarawak Report

We send out the latest story at 7am Malaysia time

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments