Raja Pelesu! – Kami Mantaika Pasal ‘Pemeri Belalai’ Ke Najib!

• 3 Nov 2015
• BM 翻译
• English
• Malay

Diatu Sarawak Report ulih mantaka penerang pasal ‘duit pemeri’ US$681 juta ari raban raja menua Timur Tengah ti dipasukka dalam akaun bank Najib Razak kejang ti deka ngatur pengawa bepilihbesai nyin kemari.

Nama raja ti murah ati, ti udah meri bebillion-billlion dollar nya kemari, ‘Saud Abdulaziz Majid al-Saud’.

Kami nemu ari penerang batang tubuh ti diberi dikena nerangka penatai duit bayar US$100 juta, ti udah masuk ke dalam akaun Najib di AmPrivate Banking di Kuala Lumpur ba bulan Februari 2001 suba.

Bank udah minta penerang orang ti ngirumka duit nya ari siku agen ti mindahka duit nya ngagai akaun Menteri Besai lalu sepuchuk surat udah dikirumka ari opis orang nya ngagai opis bank.

Pun berita kami madahka surat nya ti benung disimpan bank, ngundan sekeda penerang ti enda terang tang dikeluarka ari ‘opis Saud Abdulaziz Majid al-Saud’, ti adai mri alamat penuh enggau lumur telefon opis.

Surat nya disain chap jari ‘Saud Abdulaziz al-Saud’.

Pekara ti nyungkak jaku tanya pasal proses undang-undang enggau atur ti patutt dititihka AmBank, ti endur 23% ari syer nya diempu ANZ Bank (ari menu Australia enggau New Zealand) ti yadika pemegai syer nya.

CEO AmBank, Ashok Ramamurthy, ti diinjau bekerja ariANZ bank, udah badu mangku pengawa iya ba bulan Januari tu tadi ketegal bisi ditemu ngereja penyilap ba nitihka atur bank ba utang bebillion-billion ringgit ke 1MDB – sebengkah isu mengkang nyadi jaku bantah sekeda orang politik di Malaysia datai ke sehari tu.

Pekara nya pasal Menteri Besai ti udah nerima pemeri ari orang siku ti nyelai udah mai penanggul ngagai bank nya.

Sarawak Report udah ngamatka undang-undang ti ngelaban penyalah ngubah duit enggau ngelaban pengasar di Arab Saudi (laban ngaitka nama Saud) mai reti semua rayat patut ngamatka ngena paspot ke sebarang orang ti bisi bekaul enggau pemindah duit ke sebarang penyampau. Tu nyengkaum sebarang orang ari Malaysia ti ngena kompeni menua tasik di British Virgin Islands (BVI).

Sebarang surat ti nadai alamat pengirum enggau nadai penerang diri tau kena kelese lalu sapa-sapa tau nyangka pemeri nya tau dilepaska baka nya aja ketegal penerima pemeri nya siku Menteri Besai Malaysia, ti diatu udah dirintaika dalam nama orang ti benung diperatika ari raban orang politik.

Ba pengalabeberapa taun tu AmBank udah mansang nyadi bank ti dikerinduka Najib enggau mega sekeda kompeni dagang enggi menua, nyengkaum 1MDB.

Kami dipadahka enda kurang ari empat bengkah bayar udah diterima tama ngagai akaun Menteri Besai besereta enggau penerang batang tubuh diri entara 2011 enggau 2013, nyengkaum dua iti agi bayar ti nyadika penyampau semua nya US$681 juta, baka ti udah dibantaika Sarawak Report dalam bulan Julai nyin kemari.

Pemindah duit nya mungkur sepenyampau US$200 juta, lalu nya mai reti sepenyampau satu billion udah mujur dipindahka masuk ngagai UMNO ti datai ari, kenu ku penerang, raja Arab Saudi.

Penerang tu dikamatka opis SPRM dalam bulan Julai taun tu, lebuh raban pemansik sida nya madahka sida udah macha empat iti surat ari pemeri ti sama ngagai bank nya.

Tu nunjukka pemeri tu udah mindahka duit ti kelalu mayuh masuk ngagai akaun Najib kejang pengawa bepilihbesai, lalu ketegal ke asal nya, ke guna ti enda terang.

Pekara nya udah ngerak sekeda penerit undang-undang ti ngelaban penyalah ngubah duit entarabansa, nyengkaum Australia, New Zealand enggau Arab Saudi ti napi tuduh ngelanggar undang-undang pekara bank sida enggau mega undang-undang ngelaban pengasar.

Nyerumba nya, jaku tanya kami ba batang tubuh ‘Raja Arab’ nya lalu nadai disaut sapa-sapa.Nama Saud Abdulaziz Majid al-Saud nya variasyen nama selama ke sekeda raja Arab, tang nadai nyemetak nunjukka sapa-sapa nama tuai menua nya siku-siku
Tang Sapit Menteri Besai Malaysia ti baru Zahid Hamidi madahka diri udah betemu enggau raja enggau anak raja ari menua Timur Tengah ti kenu ku iya “orang diri sebilik ti pemeri sereta gerah jari”, lebuh sereta iya mangku pengawa baru nya nganti TS Muhyddin Yassin, siku ari menteri ti betanyaka pasal pemeri nya sebedai kena pechat Najib.

Pia mega raban pemesai ari opis SPRM bisi udah madahka bala sida udah diuluka bekelala enggau sekeda orang ti nyadi pemeri ti kala nuliska surat ti udah dipeda sida dalam AmBank.

Penerang SPRM nya berupai bendar enda senutuk enggau sekeda dokumen bank ti bisi udah diterima Sarawak Report, ti madahka pemindah duit US$681 juta ari kompeni Tanore Finance Corporation nya nyadika “bayar” kelimpah ari ti dikumbai pemeri.

Ensera pasal orang pemeri ari menua Arab Saudi nya nyadi mar bendar dikarapka udah bekau raban bala raja diri sebilik disidi sereta dipansik enggau silik.

Tang Raja Abdullah, ti ke-4 pemadu kaya di menua Arab Saudi, semina bisi duit simpan US$18 billion. Reti nya, baka ni ku iya sanggup beserara enggau US$1 billion ti lalu diberi iya ngagai Najib.

Reti nya, enti orang diri sebilik ari bala raja nya kurang agi pengaya, kitai tentu enda nyadang sida ulih meri nyampau nya enggau belalai, lalu penerang tu enda masuk akal.

Kami nadai nemu sapa-sapa ari raban orang ti kaya-kaya ari menua Arab nya bisi nama enggau pangkat ti sebaka enggau orang ti meri baja ti bisi ba surat ari Saud Abdulaziz Majid al-Saud, lalu orang ti ba tikas ke-50 nya Aman Hariri, ti semina bisi pengaya ba penyampau US$2 billion, munyi ti diayanka ba laman web Arabian Business.

Sanggup kini orang ti bisi US$2 billion tauka kurang ari nya meri setengah ari pengaya nya ngagai Najib semina ketegal ti ngembuan penemu berat ke tu tauka nya?

Tauka orang pemeri nya datai ari ruang bilik raban raja, ti resia di menua nya?

Ke bendar iya, anak raja Arab Saudi ti pemadu kaya, Putera Alwaleed udah terang bendar madahka diri deka meri semua pengeraja iya ke tuju ti manah-manah, lalu iya nyadi siku orang pemeri ti mentas ari bala orang Timur Tengah ti rinduka Najib enggau bala penyukung BN.

Tang nitihka penerang Forbes, semua pengaya iya semina bisi US$34 billion.

Nya alai, nama kebuah Najib patut nentuka tuju satu billion dollar nya?
Mayuh jaku tanya udah dikenataika ba opis Duta Arab Saudi di London lalu ngasilka mayuh agi jaku tanya.

Opis protokol sida udah nerangka, kelimpah ari nama ti bisi diregista dalam AmBank nya sebaka enggau nama sekeda raban raja Arab Saudi, tang bisi pengurang ba formality ti beguna – nama bala raban raja nya patut bisi leka jaku ‘bin’ di sepemanjai nama sida, ambi ke banding, Saud Abdulaziz bin Majid bin al-Saud.

Baka ti udah diterangka ti endur bala raja ti bempu nama ti nyau ka sebaka enggau Saud Abdulaziz Majid al-Saud nya siku Gabenor ke pelilih Medinah, iya nya Abdulaziz bin Majid, iya nya uchu raja Arab Saudi ti dulu suba.

Orang ari peturun raja tu bisi siku anak lelaki ti sebaka nama iya nya Abdu Aziz bin Majed al-Saud. Tang nadai penerang nunjukka orang diri sebilik tu datai ari raban orang ti gerah jari, tauka nama sida tu dirintaika entara orang ti kaya-kaya di menua Arab ti bisi pengeraja US$2 billion.

Kami minta orang ti gerah jari ti udah kala meri bebillion-billion dollar, kelimpah ari kitai bedagang enggau siku raja Arab ti pelesu, dikemesaika ngambi ke nerangka pasal pemayuh bayar ti dipasukka ngagai akaun Menteri Besai?