Demokrasi Sarawak Ti Sakit Udu Mantaika Pemuntan Iya Enggau Chara Ngantung Tuai Penyakal

YB Chong nya siku tuai parti penyakal pemadu besai di menua Sarawak, Democratic Action Party (DAP). Iya mega nyadika pengari rayat ti udah kena pilih di sitak bepilihbesai Kota Sentosa, Kuching, Sarawak, ti bisi lebih kurang 25,000 pengundi.

Kemari, Speaker DUN, Awang Asfia, udah ngantung iya lalu ngasuh iya pansut ari Dewan aum, ti endur YB Chong dituduh mansutka rambai jaku ‘chara kira-kira David Copperfield’ ke bajet, ti dikumbai Awang Asfia nya jaku ti ‘ngeleseka’ Dewan.

Chong deka digantung sepemanjai aum, ti endur DUN Sarawak semina baum enda lebih ari dua minggu ba ‘demokrasi’ nya.

Asfia empu nya ukai kaban Dewan ti kena pilih rayat tang dipaduka Taib Mahmud. Gabenor nya maduka iya dalam taun 2000 lalu Asfia udah nyadi ‘kepala pengajar’ ke Dewan – ti endur tau peneka ati nutup mulut sapa-sapa ti dikumbai iya panchar bejaku, madamka mikrofon sekeda kaban Dewan ti dikumbai iya ‘inggar’ lalu madahka bala YB utai ti tau dikereja enggau enda tau dikereja sida lebuh maya sida baum.

Nya alai, enggau chara padu mangku pengawa baka nya, Speaker DUN Sarawak (enggau mega Sabah) bukai ari orang politik ti dipilih nengah undi, tang dipilih bala bakih YB sida, baka ba parlimen selama di serata dunya, tang siku birokrat ti dipaduka tuai eksekutif dalam perintah, iya nya Kepal Menteri empu.

Penyelai tu tunsang ari atur demokrasi selama laban kaban ti dipilih rayat, ke bendar nya nadai bekuasa atas eksekutif, ti bepengawa nyadi kuasa pemadu tinggi di menua nya.

Kuasa eksekutif ti maduka Speaker uduk penilat, ti nentuka pendiau enggau ulat kaban Dewan lalu ‘ngukum’ chara bepilih-pilih sapa-sapa sida ti dikumbai mai penanggul ke Kepala Menteri.

Parlimen bedemokrasi bukai di serata dunya tentu deka berasai alit ati ke sistem autoritarian parlimen Sarawak ti udah ngerampas kuasa ari bala pengari rayat lalu ngengkahka sebaka tikas enggau kuasa eksekutif. Tang mayuh orang di Sarawak enda nemu pasal pekara tu lalu perintah BN enda beguai-guai madahka reti ti bendar demokrasi tu.

Enggau nya, nama ‘jaku kelese’ ba jaku tuai penyakal nya ti tau ngujungka iya digantung lalu disipak pansut ari Dewan di sepemanjai aum nya?

Chong udah nyungkak asai irau ati orang mayuh enggau bala pengundi – pekara ti bekaul enggau duit menua enggau pengawa masau belanja ti mayuh ari wang turu menua Sarawak.

Iya udah ngena leka jaku ‘kira-kira duit chara David Copperfield’ dikena mantaika penusah ati bala bakih YB ti ditujuka enggau atur bebelanja lebih sereta betimbah-ayah, ti endur menua nya bulih untung ti mimit. Nya ukai pengawa kaban penyakal ti nyungkak isu nya lalu ukai saut ti nandaka perintah tu udah suntuk saut?

Chong udah dikumbai nyadika duri ba perintah menua ba pekara pasal salah atur duit menua. Ba pun aum iya udah mansutka jaku madahka pengirau ati orang mayuh – duit injau ti enda terang ti udah dipunka Taib dikena ba mayuh bengkah projek ti enda nyengala, ti endur perintah menua mengkang mayar pulai bungai duit injau ti mayuh.

Chong enggau parti iya, DAP, udah meri jaku tangkan lima taun ke udah, ti endur nyau lebih setengah ari bajet menua udah dikeruga dikena ngelanjarka injau duit ke sekeda projek besai-besai ti enda ditemu sapa-sapa. Penyampau duit ti mayuh udah dipasukka ngagai endur bukai baka ‘Wang Turu Sekeda Agensi Ti Dikemendarka’, disadang dikena nyamin duit, ti udah diinjau dikena melanja sekeda projek SCORE.

Bala orang Sarawak udah lenyau semua utai laban mayuh agi projek dalam SCORE nya dikuasa sekeda kompeni enggi sida Taib Mahmud sebilik.

Pekara ti deka ditunjukka Chong nya bisi duit injau ti mayuh chara nyelai.

Nama kebuah tau baka nya?

Sarawak Report udah nusui isu tu dulu suba, nanyaka nama kebuah Kepala Menteri ngangkatka bon tauka duit injau bebillion-billion dollar nyadika chunto, ba kes Sarawak Energy, nengah sebengkah kompeni ti bependiau nyelai, Equiti Energy, ngena bon ti diangkatka di Labuan, lalu enda ngangkatka duit nengah bank dalam menua tu enggau chara ti selama?

Nama kebuah rayat Sarawak empu enda diterangka, perintah patut mayar bunga duit jali 6%, taja pan bunga duit 3% tau dikena ba perintah?

Chong mega udah narit perati Dewan ngagai duit jali ti bukai, nyengkaum duit dikena melanja sebuah kompeni perintah ti benama Equisar, ti mega diatur nengah Labuan lalu mayar pulai bunga duit injau dua kali lipat.

Nama kebuah nya nyadi ‘jaku kelese’ dikena ngaga sebengka fakta betanya ngarika bala rayat – laban duit dalam wang turu nya endang datai ari rayat empu?

Pengenggai nyaut jaku tanya Chong nya, lalu ngena kuasa muru Chong ari Dewan, ketegal udah bejalaika tanggungpengawa iya ti betanya nya, semina nejuka orang mayuh nginga entelah.

Enti rayat Sarawak enda diberi saut sapa ti meri duit jali ke projek-projek bemisteri ti nyelai-nyelai, ari nya sida bisi kuasa deka nemu enti tikas bunga duit jali ngemesai nya diberi ngagai sida Taib Mahmud ti enda badu-badu beranakka puku ari ti nejuka duit nya datai ba jari bala pengurus belanja di menua bukai ti bebas chukai.

Mar bendar dikarapka insentif bukai ke Kepala Menteri ngemendarka duit jali ti mayuh awakka bisi ditanggung Menua Sarawak.

Enti bisi dalih bukai ti ulih dikarapka, nama kebuah pengari rayat enda diberi peluang ninga enggau terang lalu ba endur ti betul – iya nya dalam Dewan Undangan Negeri Sarawak?

Sign-up to receive regular updates from Sarawak Report

We send out the latest story at 7am Malaysia time

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments