Dini Ubah Iya? Sida Taib Sebilik Majak Ngerampas Tanah Di Sarawak

Abdul Hamed Bin Mohd Sepawi – petunggal Abdul Taib Bin Mahmud

Abdul Hamed Bin Mohd Sepawi – petunggal Abdul Taib Bin Mahmud

Sebengkah repot berita ari Radio Free Sarawak (RFS) udah nusui pasal rumpak tanah ti majak dikereja bala sida Taib Mahmud ti udah badu nyadi Kepala Menteri Sarawak, ti diatu Gabenor Sarawak.

Rumpak tanah ke diatu bisi ngaitka petunggal Taib ti mega nyadika proksi iya, Abdul Hamed Mohd Sepawi, ti udah kala ditusui dalam Sarawak Report laban bisi kaul penyarut tanah di Sarawak nyentuk ke Liberia lalu mega nyentuk ke Tasmania.

Dalam bulan Enam 2011, raban pemansik SPRM udah muka keretas pansik ba penyalah makai suap Taib. Tang, asil pansik nya lalu bedau dipansutka nyentuk ke sehari tu.

Adenan Satem ti nganti Taib, ba taun 2014 kemari, udah bulih puji ari mensia mayuh lebuh iya ngempuruka enam iku tauke kompeni kayu batang (nyengkaum kompeni ti bisi kaul enggau Hamed Sepawi baka kompeni Samling enggau Ta Ann) lalu mantah sereta ngutuk sida laban ngereja penyalah “makai suap”.

Lalu ba bulan Tujuh taun nyin kemari Adenan udah mansutka jaku “nadai agi muka ladang. Nadai agi ngeruga enggau ngubah kampung bungas nyadi ladang.”

Tang ba pun taun 2016 tu lalu raban bansa asal di menua nya enggau bala NGO udah ngasaika nadai mayuh ubah udah nyadi. Upreshal Singh ari raban NGO Malaysia Friends of The Orangutans (FOTO) madahka ngagai Sarawak Report nya sida berasai enda.

lantang ati ngagai Kepala Menteri laban nadai udah nerima sebarang saut ari iya taja pan iya ti mansutka jaku madahka deka nyaga kampung di Sarawak ari kena keruga. Gaya utai ti nyadi nya agi sebaka enggau gaya ti sebedau tu.

Ba pun bulan tu tadi, raban bansa Iban ari Kampung Raeh di Kota Samarahan udah berandau enggau pengarang berita radio RFS madah ke gaya utai ti ngeruga sida. Sida madahka kompeni Usaha Jasamaju Sdn Bhd nya dikaitka enggau Hamed Sepawi udah besemaya deka mayar pampas laban ngemansangka tanah sida nyadi ladang.

Kelimpah ari ti badu nebang kampung nyentuk ke ngagai raban bansa nya dibayar pampas, sida madahka ngagai RFS kompeni nya majak ngeruga menua nya dia.

Bala pengereja pengawa enggau perengka kompeni nya majak bekereja taja pan kompeni nya lalu bedau mayar pampas munyi ti disemayaka sida

Bala pengereja pengawa enggau perengka kompeni nya majak bekereja taja pan kompeni nya lalu bedau mayar pampas munyi ti disemayaka sida

Udah ti meda diri enda badu kena keduan, raban bansa asal ngayanka bantah sida kena 17hb tu tadi lalu ngerampas dua buah lipan enggi kompeni nyadika chara sida ngemuntanka kereja kompeni nya.

Pengawa kompeni Usaha Jayamaju ti udah nya ngenataika komplen sida pasal raban bansa ti ngachau perengka sida ba balai polis Kota Samarahan lalu udah nya ngujungka bala orang kampung udah dikangauka ngambika dipansik.

Nitihka sekeda ari raban bansa asal ti bisi berandau enggau RFS, raban polis dipeda enggau jampat betindak lalu nangkap sida ti udah nya lalu ngukum sida ngena Seksyen 506 Kanun Keseksaan, ti dikena ba atas orang salah ketegal ngemba orang bukai. Kerita lipan kompeni pan diambi pulai lalu diberi ngagai kompeni Usaha Jayamaju.

Tang lebuh orang raban bansa asal Kampung Raeh nunjukka penerang ti madahka tanah di menua nya endang enggi sida, baka ti disukung dokumen ari Opis Tanah & Survei, raban polis enggai ngambi tindak. Nya alai, nadai ubah ba polis ti udah puntan nyukung kuasa pengempu tanah entara maya Taib enggau tuai perintah ti diatu.

Siku ari orang raban bansa asal nunjuk ngagai tunga tanah ti nyadika penyarut nya. Tang dini duit pampas ti udah disemayaka sida?

Siku ari orang raban bansa asal nunjuk ngagai tunga tanah ti nyadika penyarut nya. Tang dini duit pampas ti udah disemayaka sida?

Peninga ti berandau enggau RFS madahka sida berasai irau bendar laban enda ulih ngalahka kompeni nya ti bisi kaul enggau perintah lalu Hamed Sepawi mega siku ari Taib Mahmud sebilik ti benung nyadi Gabenor Sarawak ti nguasa semua pekara ekonomi di Sarawak nengah dagang iya ti disukung perintah Sarawak.

Kami enda ulih ngelaban kompeni tu laban sida bisi sukung politik ti kering!

Orang raban bansa asal ditangkap lalu diukum ngena Seksyen 506

Orang raban bansa asal ditangkap lalu diukum ngena Seksyen 506

Tu ukai keterubah iya Sarawak Report tetemuka pengawa kompeni Usaha Jasamaju. Ba taun 2011 kemari kami kala nusui baka ni kompeni tu ti udah diberi surat pala tanah ti kena balut penyarut ba kampung galau Ensengei ari adi Taib empu, Raziah Mahmud.

Bala orang bansa asal madahka sida enda chukup duit dikena ngulih sukung lawyer, tang sida madahka ngagai RFS sida deka majak ngetanka kuasa pengempu sida ba tanah sida nya.

Tu mih maya Adenan Satem patut ngamatka jaku iya empu.

Orang bansa asal madahka diri udah mutus ati ngetanka tanah menua sida empu

Orang bansa asal madahka diri udah mutus ati ngetanka tanah menua sida empu

 

Sign-up to receive regular updates from Sarawak Report

We send out the latest story at 7am Malaysia time

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments