Latest Stories
Sections
Anang main-main – Lawyer Bansa menua Switzerland, Michael Laubersaid, enggai nerima penerang Apandi ti nguji ngelamun skandal 1MDB
Opis Lawyer Bansa menua Switzerland kena hari Lima tu tadi udah mansutka penerang ti mantaika pasal skandal 1MDB ti nguji dilamun Najib Razak enggau Lawyer Bansa Malaysia, Apandi.
Enggau meri timbal ke penerang ari Apandi ba pun minggu tu tadi madahka Najib udah “beresi” ari sebarang tuduh penyalah baka ti digaga SPRM, Lawyer Bansa Switzerland, Michael Laubersaid, udah mansutka penerang media ngarika menua iya empu, Switzerland.
Dokumen siti lambar surat nya ti dikirumka nerupa siti peminta ba Malaysia dalam pansik sida nya ba kes penyalah 1MDB, udah nyadika pengerak selampur kes ba piak Switzerland.
Ngena chara nya, Laubersaid nya udah ngenegapka agi semua tuduh ti dituliska dalam Sarawak Report enggau bala pemansik bukai ba 1MDB ngelama tu, kenyau ari penerang ti ba peranak Switzerland, Xavier Justo, dibantaika ke terubah iya dalam portal berita tu.
Klik ditu ke penerang media ti penuh
Dikena nerangka peminta nya Laubersaid udah mayuh mantaika penerang, dikena ngamatka pengirau ati orang mayuh ba penyalah makai suap pemadu besai dalam 1MDB.
Iya udah nyebut angka baru US$4 billion nyadika amaun ti dipelabaka endur bala pegawai iya arap bendar udah diubah ari wang turu pemansang nya. Sebuah penyampau ti endang ditagaka ngagai sekeda projek ekonomi enggau sosial di Malaysia.
Ari ti ngeluarka penerang baka tu Laubersaid udah mantaika kelipak ti dikereja 1MDB enggau CEO bari sida Arul Kanda enggau bos iya, Menteri Pekara Wang Malaysia (Najib Razak) ba pengawa sida nerangka pengelenyau bebillion-billion ringgit ari 1MDB.
Isi surat Lawyer Bansa menua Switzerland nya ukai nuju sapa-sapa ti dikumbai iya bempu tanggungpengawa ngereja penyalah nya tauka penyalah ti tau ngujungka sida patut didawa.
Ba rintai nama orang ti ditemu iya ngereja penyalah nya “pemesai perintah ari menua tasik” disadang iya udah disuap; “bala pemesai perintah ari Malaysia enggau mega ari menua Arab”.
Iya madahka prosiding penyalah ti dibuka kena 14hb Ogos 2015 nyin kemari dikena ngelaban dua iku pemesai 1MDB enggau sekeda orang ti enda disebut nama ngena undang-undang menua Switzerland, sebengkah prosiding ti bedau kala dipansutka.
Sarawak Report deka nambahka rintai nama orang ti dientelahka Lawyer Bansa Switzerland nya, dipelabaka nyengkaum Menteri Besai Malaysia Najib Razak, Shahrol Halmi, Jho Low, Khadem al-Qubaisi enggau Mohd al-Husseiny.
Bala orang ti disebut nama di atas nya suah udah diayanka dalam berita skandal 1MDB. Penyalah ti dirintaika Lawyer Bansa Switzerland, baik ke sida nya ngereja penyalah sama-sama tauka kediri-diri nya “nyuap pemesai perintah ari menua bukai; ngereja penyalah dalam opis perintah; ngubah duit”.
Tuduh ti terus ti dipansutka Lawyer Bansa Switzerland nya udah nejuka Menteri Besai Najib napi tuduh ti ditujuka ngagai 1MDB nyadika pengalih perening nya puang aja.
Penerang media ari Lawyer Bansa nya udah nerangka raban pemansik menua sida idah ngerembaika pasnik sida nya semua aspek skandal dalam 1MDB munyi ti kala ditusui Sarawak Report. Iya ngelansa pasal empat bidang pengawa, tang madahka engka bisi mayuh agi, nyengkaum PetroSaudi, SRC International, Genting/Tanjong enggau ADMIC.
Kaul sida enggau sekeda bank ari menua Switzerland dalam skandal 1MDB deka ngujungka bala orang ti ngereja penyalah nya nesal.
Leissner (enggau bini iya) ngelarika diri ari GSI lebuh kena tuju jaku tanya
Sekeda bank Switzerland baka RBS Coutts urich, JP Morgan urich, BSI, Falcon Bank enggau Bank Privee Edmond de Rothschilde Europe sama bela bisi napi jaku tanya bekaul enggau atur sida ti ngubah duit beratus juta dollar nengah akaun bank enggi bala orang enggau pemesai politik ti udah diayanka.
Lalu pia mega enggau bank Goldman Sachs ari menua Amerika nyadika pengirau ati orang mayuh bekaul enggau skandal tu. Tim Leissner ti nyadi pemesai dalam bank nya di Singapura ditemu ba minggu nyin kemari bekemisi ke menua tasik enggau bini iya. Bank nya kala ditusui Sarawak Report nerima bayar ti kelalu besai ke pengawa sida ti ngangkatka bon ke 1MDB.
Laubersaid madahka Lawyer Bansa ari Malaysia kala betemu enggau iya di Switzerland ba bulan September nyin kemari lalu besemaya deka mantu ba pansik enggau bedawa ke sapa-sapa ti bisi kaul dalam skandal 1MDB. Saup nya, ku Laubersaid, lalu bedau dikamatka Malaysia.
Utai ti disebut Apandi ngagai orang mayuh di Malaysia nya ukai utai ti disemayaka iya ba bala pemesai penerit undang-undang di Switzerland.
Laubersaid madah ke diri nyau semakin lenyau sabar iya laban taja pan bebillion-billion ringgit udah ditemu lenyau, kompeni ti napi pengerugi nya nadai meri sebarang komen.
Raban penerit undang-undang Switzerland nya nembuka penerang sida laban kompeni ari Malaysia nya nadai nyungkak isu pasal pengerugi ti kelalu besai nya, raban penerit undang-undang Switzerland meri lalau ngagai kompeni ti rugi nya enggau Perintah Malaysia pasal pemutus prosiding penyalah kala udah diputarka.
Sebedau belabuh enggau aum ke bala pengarang berita, Lawyer Bansa Switzerland enggau bala pemesai iya udah berandau enggau raban pengarang berita ari Wall Street Journal madahka pengirau ati diri lalu sida udah tetemuka penerang pasal pemindah duit ti dikaitkan enggau 1MDB nengah sekeda bank Swiss.
Ba ujung minggu tu tadi SPRM, Bank Negara Malaysia enggau sekeda orang politik Malaysia udah bisi didinga mantah pemutus penemu Apandi ti ngasuh nutup kes skandal 1MDB udah nemu bakih baru sida ba tikas entarabansa.
Penerang penuh ari Lawyer Bansa Switerland
Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.