Jalai Nuju Pengeraja – Richard Riot Kaban Parlimen, DIAYANKA!

Jalai alun enda digaga dalam sitak iya empu – taja pan kompeni iya udah nerima duit kontrak!
Diatu kami ulih ngayanka pengawa luar Sapit Menteri Menua Luar, Kaban Parlimen SUPP/BN ke sitak parlimen Serian Richard Riot Anak Jaem, mega ditemu bekaul dalam pengawa ngulihka pengeraja nengah kontrak ke projek dalam sitak iya empu.

Ba kes tu sebengkah projek ngaga jalai alun ti beungkus RM9.3 juta udah diberi ngagai kompeni iya empu, iya nya kompeni Akjaemura Jaya Sdn Bhd, ti diarika siku ari anak lelaki iya.
Cherita Pasal Jalai Alun Di Serian

Ditunu – sebuah ari perengka kena ngaga jalai enggi kontraktor di menua Tebedu
Isu jalai alun nya sebengkah pekara ti sensitif di pelilih menua ti diarika Richard Riot. Orang bansa Bidayuh di endur nya lama bendar udah nengah jalai ti jai ketegal ditengah lori balak enggau lori kebun dandang besai, ke semua nya ngena nama ‘pemansang’ munyi ti selalu dikemesaika perintah BN.

Baka selama mega, pengawa ngaga jalai alun suah bendar disemayaka genap kali maya bepilihbesai, tang semaya nya suah agi ti balang.
Tambah mega, sebedau bepilihbesai DUN taun siti nyin kemari, mayuh bendar perengka dikena ngaga jalai alun diajung tama ngagai pelilih menua nya, lalu bala pengundi udah ditangkan enda tau enda ngundi BN dikena nentuka pengawa tau jampat belabuh dikereja – tang enda mukai-mukai udah tembu pengawa ngundi, semua perengka nya diambi kontraktor pulai magang! Ni penyuah Richard Riot, ti nyadi Sapit Presiden SUPP, sebuah parti kroni BN, ulih ngumbai diri selalu mujur bemain-main baka nya?

Udah chukup tu ke menua Serian?

Endang patut bendar enti parti SUPP lenyau mayuh bendar kerusi maya bepilihbesai DUN taun nyin kemari, enti baka tu chara sida ngaul bala pengundi!

Pengeringat Bala Rakyat Nyau Majak Nyadi

Pengeringat bala orang di menua Serian endang udah disadang. Bedau lama tu udah, di pelilih Tebedu, lebuh lori-lori balak dianjung masuk ngagai kandang tanah orang bansa asal udah sida ti nyukung perintah BN Taib, udah balat bendar ditunu. Bansa Bidayuh nya sebengkah bansa orang asal ti nelap sereta likun bendar pendiau, tang enti ati sida nyau pedis ketegal suah dikemulaka, nadai sapa-sapa ulih belabaka nama pengawa ti deka dikereja sida nangkan ke nya?

Richard Riot enggau Michael Manyin begunaka puji ari bala pengundi laban mujur meri projek jalai alun ke menua Serian
Sebengkah agi penyalah dalam pengawa ngaga jalai alun udah direkodka, nya pan nyangka projek ti pemadu besai rega udah kala dikereja.
Jalai alun Terbat-Mapu semanjai 5 kilometer nya udah dipenyadi dalam sebengkah pengawa ti dikereja dua iku pengari rakyat di menua nya, ti datai ngena bilun engkabang, dipeda baka ti dirami ketegal gaga ke diri dipuji bekaul enggau projek nya.

Tang jalai alun nya mengkang enda dipenyadi!

Aram kitai sama-sama beratika baka ni pengaga ati Richard Riot enggau kaban ADUN iya, Michael Manyin, ba sebengkah pengawa bejadi ke projek jalai alun baka ti direpot dalam suratberita Borneo Post! Iya ti bendar projek nya (dikereja kompeni Naim Candera enggi Hamed Sepawi/Taib Mahmud), lalu ulih tau ke enda kini projek nya nyadi nyata? Pekara ti tau ngirauka ati kitai laban nama Richard Riot empu bisi bekaul terus dalam projek-projek ngaga jalai alun di sitak menua iya empu.

Nitih ke rekod ari laman web enggi Lembaga Pembangunan Industri Binaan (CIDB) Malaysia, projek nya diberi nama “Cadangan Membinaan dan Menyiapkan Jalan Kpg. Sorak Melayu, Serian, Bahagian Samarahan”.

Sebengkah projek ti nyau deka manggai sepuluh juta ringgit!

Pengawa nya udah diberi ngagai kompeni Akjaemura Jaya Sdn Bhd, sebengkah kompeni enggi Kaban Parlimen Serian ti mega siku Sapit Menteri Menua Luar!

Nengah nama anak iya, Richard Riot endang siku pemegai share ti besai dalam projek nya!
Diatu, nyau udah nyadika pematut iya, sebarang orang politik nerima lalu bejalaika projek ngena nama kompeni diri empu (seagi-agi nadai sapa nemu pasal pengawa nya). Sida deka bulih jaku puji laban bejalaika projek nya, kelimpah ari ti bekuasa atas pekara belanja projek nya!

Tu mai reti, sida iya tau ngelepaska pengawa nya ngagai bakih politik tauka kroni parti sida (ba rega ti jauh baruh) lalu laluh duit belanja projek nya deka disimpan sida ke guna diri empu, ke guna pengawa dalam parti, tauka dikena nyuap bala tuai kampung, enggau pekara-pekara bukai.
Enti sema jalai alun nya nyadi digaga, nya udah siti bonus, tang projek nya enda dijamin (manah tauka enda)!

Kami enda nemu enggau silik baka ni Richard Riot melanjaka laluh duit ari projek jalai alun nya. Tang kami semina nemu, iya enda patut diberi peluang nya. Sapa-sapa orang politik endang ENDA PATUT nerima sebarang duit belanja kontrak ke kompeni sida empu, tauka kompeni enggi sida sebilik.

Pekara baka nya udah dikumbai makai suap, lalu kami pan nemu nya!

Want to get alerts for new articles ? see our Subscribe page

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments