Preseiden menua switzerland ngerah pengawa mansik reta taib!

Preseiden menua switzerland ngerah pengawa mansik reta taib!

Sepuchuk surat ti ditujuka ngagai gerempung NGO ti bepalan di Switzerland, iya nya Gerempung Duit Turu Bruno Manser, dia Presiden Serakup Menua Switzerland Micheline Calmy-Rey bisi udah madahka diri udah meri penerang pasal reta-tengkira Taib Mahmud ngagai gerempung FINMA (ti nyadi penyanding penemu ba pekara wang enggau dagang menua Switzerland), ngambika berengkah bejalaika pansik.

Micheline Calmy-Rey nya siku tuai menua serakup Switzerland.

Surat nya, ti dikirumka kena 8hb April tu tadi, betopik “Mekuka semua reta-tengkira enggi Abdul Taib Mahmud, ti disimpan di menua Switzerland”. Dalam surat nya Presiden serakup menua Swiss nya udah minta semua opis perintah iya ngemataka sereta ngemetulka penanggul ti datai ari jaku bantah orang di serata dunya pasal reta Taib Mahmud ti ulih iya enggau chara salah ari pengawa ngulihka kayu kampung.

Jaku puji ngagai Gerempung Duit Turu Bruno


Presiden Calmy-Rey ngemunka surat iya enggau jaku terima kasih ngagai Gerempung Duit Turu Bruno Manser (BMF) ketegal pengawa sida ngelaban penyalah makai suap. Gerempung duit turu tu ditumbuhka dikena orang ngingatka Bruno Manser, iya nya siku bansa Swiss ti udah kala mantu bansa Penan ngelaban pengawa ngerusak rampa menua ari ti betebangka kayu kampung. Apin lama tu udah gerempung BMF nya udah nguluka orang di serata dunya tu ngayanka pengeringat sida ba mua sekeda reta sida Taib Mahmud sebilik, nyengkaum di nengeri London, Seattle, San Francisco, Tasmania, Sydey, Adelaide enggau di Ottawa.

Gerempung BMF udah kering bendar jaku madahka Taib Mahmud disadang bisi beranakka puku enggau mayuh dalam sistem bank menua Swiss lalu siku ari sida sebilik bisi mega ditemu nampil jadi enggau bansa Swiss. Bedau tentu lama ti udah, Taib ditemu ngubah endur iya beranaka puku ari Switzerland ngagai menua Monaco, iya nya sebengkah menua ti ngembuan atur ti gerah bendar sereta nadai kiruhka sapa-sapa orang ti deka nyimpan duit dalam bank di menua sida. Nambah ke nya sida Taib Mahmud sebilik mega bisi ngaga kaul ti manah enggau Putera Albert ari Monaco, nyengkaum melanja gerempung duit turu enggi anak raja nya empu, ti ngumbai diri ngemeratka pengawa ngemataka pemanah rampa menua!

Putera Albert bisi udah nemuai ngagai palan pengelantang ati Mulu Resort taun nyin kemari, iya nya sebengkah palan enggi sida Taib Mahmud sebilik, udah kandang menua nya dirampas sida ari bansa Berawan.

Semua rampa menua di endur nya udah ditebang magang lalu diatu menua nya dituntung penanggul ampuh bah, diumbaka perambu Taib ti ngaga tekat ai ba sungai-sungai di serata menua Sarawak. Tu sebengkah ari projek SCORE ti disadang tau mai penguntung ti besai ngagai kontrak sida Taib Mahmud sebilik.

Diatu Gerempung Bansa, UN, udah mansutka penemu sida deka ngambi pulai ikas Warisan Dunia ari kandang endur Taman Negara Mulu nya ti kala udah ditetapka sida dulu suba nyadi ke palan Warisan Dunia. Pengirau ati ti baka tu, ti mega diseretaka enggau penerang-penerang pasal penyalah ngerampas tanah-tanah ti dikereja Taib, enggau perening orang mayuh di serata dunya tu ba chara Taib ti kelalu lama bekuasa di menua Sarawak.

Surat ari presiden nya ngundan jaku terima kasih iya ngagai BMF ketegal pemendar sida ngelaban penyalah makai suap, lalu besemaya deka mulaika semua puku duit simpan ngagai menua-menua ti endur beranakka puku nya. Presiden Calmy-Rey mega bisi madahka menua iya udah mulaika 1.7 billion Swiss Franks, ti dipelabaka sida semina sebagi ti mimit ari pemayuh reta enggi Taib Mahmud nya.


Dalam surat iya mega, Presiden Calmy-Rey bisi nerangka pasal penanggul penyalah makai suap ngena duit menua, ti endur Perintah Malaysia bisi tanggung pengawa minta pemendar ari Perintah Swiss meku ke semua reta ti disadang reta haram, lalu enggau nya menua-menua baka Switzerland tentu berasai kena ansak enti nganti Taib kena buai ari pengawa iya.

Kelimpah ari nya, Presiden menua Switzerland nya mega bisi ngaitka pekara ti bekaul enggau sekeda tuai-tuai menua bukai ti bisi beranakka puku taja pan sida bisi ngereja penyalah ngeruga pengeraja menua diri empu baka di menua Libya, Egypt enggau Tunisia.

Siti jaku tanya ditu, sanggup tauka enda Menteri Besai Najib Razak ngambi tindak undang-undang atas Taib? Di menua Malaysia Taib endang ditemu bekuasa atas pejalai parti BN, laban pemujur parti iya di Sarawak ti menang mayuh kerusi dalam DUN ngelama tu. Enti Najib enda mujur bejalaika pansik enggau sidi baka ti dipinta perintah Swiss, penanggul nya deka majak ngerembai.

Your views are valuable to us, but Sarawak Report kindly requests that comments be deposited in suitable language and do not support racism or violence or we will be forced to withdraw them from the site.

Comments

comments